Read new_tumbuka_bible Mutendeko 15 Bible Online

Mutendeko 15 - new_tumbuka_bible bible

Mutendeko 15

¹Pamanyuma pa vyeneivi, mazgu gha FUMU ghakiza kwa Abramu mu mboniwoni kuti, “Ungopanga Abramu, ine ndine chiskango chako. Njombe yako yakuruska yiti yikule chomene.”

²Kweni Abramu wakati, “Mwe FUMU Chiuta, kasi muti mundipenge vichi pakuti ndilije mwana, ndipo muhaliri wa nyumba yane ndi Eliyezere wa ku Damaseko.”

³Abramu wakatiso, “Wonani, mulije kundipa mwana. Ntheura muzga wakubabika mu nyumba yane ndiyo wati waŵenge muhaliri wane.”

⁴Kweni mazgu gha FUMU ghakiza kwa iyo ghakati, “Muzga uyu kuti ndiyo wati waŵenge muhaliri wako chara. Mwana wako na wako ndiyo wati waŵenge muhaliri wako.”

⁵Penepapo FUMU yikamutorera kuwaro ndipo yikati, “Laŵiska kuchanya ndipo upende nyenyezi, usange ungamanya kuzipenda.” Penepapo yikati kwa iyo, “Ntheura ndimo ŵamkuŵira ŵa mphapu yako.”

⁶Abramu wakapulikana na FUMU. Ntheura pa chifukwa ichi FUMU yikamupima kuti ndi murunji.

⁷Yikatiso kwa iyo, “Ine ndine FUMU, iyo yikakufumya ku Uru mu charu cha Babuloni, kuti ndikupe charu ichi kuti chiŵe chako.”

⁸Kweni Abramu wakati, “Mwe FUMU Chiuta, kasi nditi ndimanye uli kuti chizamkuŵa chane?”

⁹FUMU yikati kwa iyo, “Unditorere mwana wa ng'ombe mwanakazi wa virimika vitatu, mbuzi yanakazi ya virimika vitatu, mberere yanarume wa virimika vitatu, nkhunda na njiŵa yichoko.”

¹⁰Abramu wakiza navyo vyose ivi kwa FUMU, na kuvidumula paŵiri. Wakachigoneka chipitika chilichose kuthyana waka na chinyakhe. Kweni viyuni vira wakavidumula paŵiri chara.

¹¹Para makuŵi ghakakhiliranga pa nyama Abramu wakaghaŵinganga.

¹²Para dazi likanjiranga, Abramu wakaŵa na tulo tuzitu chomene, ndipo mdima ukuru na wakofya ukamuwira.

¹³Sono FUMU yikati kwa Abramu, “Umanyiske nadi kuti ŵa mphapu yako ŵamkuŵa ŵalendo mu charu icho kuti nchawo chara, ŵamkuŵa ŵazga kwenekuko ndipo ŵamkunyekezgeka virimika 400.

¹⁴Kweni ine ndamkweruzga mtundu wa ŵanthu uwo ŵamkuwuteŵetera, ndipo pamanyuma ŵamkufuma na vyuma vinandi.

¹⁵Iwe wamwene uti wizamkufwa mu mutende. Wizamkuŵikika mu dindi ndipo ndiwe muchekuru chomene.

¹⁶Kweni ŵa muwiro wa chinayi ndiwo ŵamkuwereraso kuno, pakuti ubendezi wa ŵaAmori undakwanire.”

¹⁷Likati lanjira dazi ndipo kukaŵa mdima, Abramu wakawona josi likusunkha na chenje cha moto chakulilima vikajumphanga pakati pa vipikita vira vya nyama.

¹⁸Pa zuŵa lenelira FUMU yikapangana na Abramu, yikati, “Ku mphapu yako ndiko ndapereka charu ichi, kwamba ku mronga wa ku Eguputo kuya kafika ku mronga ukuru, mronga wa Yufurate,

¹⁹charu cha ŵaKeni, ŵaKenizi, ŵaKadimoni,

²⁰ŵaHiti, ŵaPerezi, ŵaRefayimu,

²¹ŵaAmori, ŵaKanani, ŵaGirigashi, na ŵaYebusi.”