Read new_tumbuka_bible Mutendeko 16 Bible Online

Mutendeko 16 - new_tumbuka_bible bible

Mutendeko 16

¹Sarayi, muwoli wa Abramu, kuti wakamubabira mwana na yumoza chara. Kweni wakaŵa na muteŵeti-kazi muEguputo zina lakhe Hagara.

²Sono Sarayi wakati kwa Abramu, “FUMU yili kundijara ine kubaba ŵana. Ntheura njira mu muteŵeti-kazi wane mwakuti panyakhe ndingaŵa na ŵana kwizira mwa iyo.” Abramu wakamupulikira Sarayi.

³Ntheura para Abramu wakakhara virimika khumi mu charu cha Kanani, Sarayi, muwoli wakhe, wakatora Hagara muEguputo, muteŵeti-kazi wakhe, na kumupereka kwa Abramu, mufumu wakhe, kuti nayo waŵe muwoli wakhe.

⁴Abramu wakamumanya Hagara, ndipo wakaŵa na nthumbo. Para Hagara wakawona kuti wali na nthumbo, wakamba Sarayi fumukazi yakhe.

⁵Ntheura Sarayi wakati kwa Abramu, “Ubudi uwu wachitikira ine uŵenge pa iwe. Ine ndine nkhamupereka muteŵeti-kazi wane kwa iwe. Ndipouli na umo wakawonera kuti wali na nthumbo wandiyuyura pera ine. FUMU ndiyo yeruzge uyo wananga pakati pa iwe na ine.”

⁶Kweni Abramu wakati kwa Sarayi, “Uyu ndi muteŵeti-kazi wako ndipo wali pasi pa iwe. Chita nayo umo ukukhumbira.” Penepapo Sarayi wakamba kumuyuzga Hagara mwakuti wakamuchimbira.

⁷Mungelo wa FUMU wakakumana nayo Hagara pa mbwiwi mu mapopa, pa nthowa ya kuruta ku Shuru.

⁸Mungelo wakati, “Hagara, muteŵeti-kazi wa Sarayi, kasi wafuma nkhu ndipo ukuruta nkhu?” Iyo wakazgora wakati, “Nkhuchimbira fumukazi yane Sarayi.”

⁹Mungelo wa FUMU wakamuphalira wakati, “Werera kwa fumukazi yako ndipo ukayipulikirenge.”

¹⁰Mungelo wa FUMU wakatiso, “Nditi ndandaniske chomene ŵa mphapu yako mwakuti ŵamkupendeka chara chifukwa cha unandi wawo.”

¹¹Mungelo wa FUMU wakatiso, “Wona, uli na nthumbo ndipo utibabenge mwana mwanarume. Uti umuthyenge zina lakhe Ishimaele,[7] chifukwa FUMU yapulika suzgo yako.

¹²Wati waŵenge nga ndi boli. Wati waŵe wakwimikana na munthu waliyose, ndipo munthu yose wati wimikane nayo. Ndipo wizamkukhara wakupindikana na ŵabali ŵakhe wose.”

¹³Ntheura Hagara wakayithya FUMU iyo yikayowoyanga nayo kuti, “Imwe ndimwe Chiuta wakuwona.” Pakuti wakati, “Kasi ndawona nadi Chiuta na kuŵa wamoyo pamanyuma pakumuwona?”[8]

¹⁴Pa chifukwa ichi mbwiwi yira yikathyika “Mbwiwi ya uyo ngwamoyo mweneuyo wakundiwona.” Yili pakati pa Kadeshi na Beredi.

¹⁵Ntheura Hagara wakamubabira Abramu mwana mwanarume. Ndipo Abramu wakamuthya mwana wakhe mweneuyo Hagara wakababa zina lakuti Ishimaele.

¹⁶Abramu wakaŵa wa virimika 86 apo Hagara wakamubabira Abramu, Ishimaele.