Read new_tumbuka_bible Mutendeko 17 Bible Online

Mutendeko 17 - new_tumbuka_bible bible

Mutendeko 17

¹Para Abramu wakaŵa wa virimika 99, FUMU yikamuwonekera ndipo yikati kwa iyo, “Ine ndine Chiuta Mwenenkhongono zose. Undipulikirenge ine ndipo uŵenge wambula kalema.

²Nditi ndimike phangano lane pakati pa ine na iwe, ndipo ndamkukwandaniska chomene.”

³Penepapo Abramu wakawa kavunama ndipo Chiuta wakati kwa iyo,

⁴“Nkhwimika phangano lane pakati pa ine na iwe. Uti uŵenge wiskewokuru wa mafuko ghanandinandi.

⁵Sono zina lako kuti liŵengeso Abramu chara, kweni liŵenge Abrahamu, chifukwa ndakuzgora kuŵa wiskewokuru wa mafuko ghanandinandi.

⁶Nditi ndikwandaniske na kukuzgora kuti uŵe mafuko gha ŵanthu. Ŵakaronga ŵati ŵafumire mwa iwe.”

⁷“Nditi ndimike phangano pakati pa ine na iwe, na mphapu yako iyo yikwiza pamanyuma pako, mu miwiro yawo yose, ndipo lizamkuŵa phangano la muyirayira. Ine nditi ndiŵenge Chiuta wako na wa mphapu yako iyo yikwiza pamanyuma pako.

⁸Nditi ndipereke kwa iwe na ku mphapu yako iyo yikwiza pamanyuma pako, charu cheneicho iwe sono ukukharamo nga ndi mulendo. Nditi ndipereke charu chose cha Kanani kuŵa chiharo chako cha muyirayira ndipo ine nditi ndiŵenge Chiuta wawo.”

⁹Chiuta wakati kwa Abrahamu, “Sono iwe ukwenera kusunga phangano lane, iwe pamoza na mphapu yako iyo yikwiza pamanyuma pako mu miwiro yawo.

¹⁰Chimanyikwiro cha Phangano lane ilo usungenge, leneilo liŵenge pakati pa ine na iwe na mphapu yako iyo yikwiza pamanyuma pako ndi ichi: mwana mwanarume yose mukati mwinu wakotorekenge.

¹¹Muti mukotorekenge, ndipo ichi chiti chiŵe chimanyikwiro cha phangano pakati pa ine na imwe.

¹²Ndipo mwana mwanarume yose mukati mwinu uyo ngwa mazuŵa ghankhonde na ghatatu wakotoreke. Mwanarume wa muwiro uli wose wakwenera kukotoreka manyi ngwa kubabika mu nyumba yinu panji ndi mweneuyo mwagula na ndarama zinu kufuma kwa mulendo mweneuyo kuti ngwa mphapu yinu chara.

¹³Ntheura uyo wababikira mu nyumba yako na uyo wagulika na ndarama zako, wose ŵaŵiri wuwo ŵati ŵakotorekenge. Ndimo chiti chiŵirenge chimanyikwiro pa thupi linu cha phangano lane la muyirayira na imwe.

¹⁴Mwanarume yose uyo walije kukotoreka ŵamufumyemo mu ŵanthu ŵakwakhe pakuti iyo waswa phangano lane.”

¹⁵Chiuta wakamuphalira Abrahamu wakati, “Kwakuyana na Sarayi muwoli wako, uti umuchemengeso Sarayi chara. Sono zina lakhe liŵenge Sara.

¹⁶Nditi ndimutumbike na kumupa nadi mwana mwanarume mwa Sara. Nditi ndimutumbike ndipo wati waŵenge nyinawo wa mafuko ndiposo pa ŵa mphapu yakhe ŵakaronga ŵa ŵanthu ŵati ŵafumenge mwa iyo.”

¹⁷Ntheura Abrahamu wakawa kavunama ndipo wakaseka pakuti wakati mu mtima wakhe, “Kasi mwana wangababika mwa uyo wali na virimika 100? Kasi Sara, mweneuyo sono wali na virimika 90, wangababa?”

¹⁸Abrahamu wakati kwa Chiuta, “Mwe Chiuta, ka mphanyi Ishimaele ndiyo mwamutumbika waka.”

¹⁹Chiuta wakamuphalira wakati, “Chara, kweni Sara muwoli wako wati wakubabire mwana mwanarume. Uti umuthye zina lakuti Yisake.[9] Nditi ndimike phangano la muyirayira pakati pa ine na iyo, ndiposo na mphapu yakhe pamanyuma pakhe.

²⁰Ine ndapulika umo wayowoyera pa Ishimaele. Wona, nditi ndimutumbikenge na kuchita kuti wababane na kwandana chomene. Iyo wati waŵe wiskewo wa ŵakaronga 12 ndipo nditi ndimuzgore kuŵa fuko likuru.

²¹Kweni nditi ndimike phangano pakati pa ine na Yisake, mweneuyo Sara wati wakubabire pa nyengo nga ndi yino mu chirimika icho chikwiza.”

²²Para Chiuta wakamara kuyowoya na Abrahamu, wakafumako kwa iyo.

²³Abrahamu wakatora Ishimaele mwana wakhe pamoza na ŵazga wose, ŵanarume awo ŵakababiwira mu nyumba yakhe, ndiposo na wose awo wakagula na ndarama zakhe nawo wakaŵakotora pa zuŵa leneilo, nga ndi umo Chiuta wakamuphalirira.

²⁴Abrahamu wakaŵa wa virimika 99 apo wakakotorekanga.

²⁵Ishimaele mwana wakhe wakaŵa na virimika 13 apo wakakotorekanga.

²⁶Ntheura mu zuŵa leneilo pera Abrahamu na mwana wakhe Ishimaele ŵakakotoreka.

²⁷Ŵanarume wose ŵa mu nyumba yakhe, wakubabiwira mu nyumba yakhe na awo wakagula ku ŵalendo na ndarama zakhe, ŵakakotoreka pamoza nayo.