Read new_tumbuka_bible Mutendeko 18 Bible Online

Mutendeko 18 - new_tumbuka_bible bible

Mutendeko 18

¹FUMU yikamuwonekera Abrahamu pafupi na makuni ghakuru gha musoro gha ku Mamure, apo wakakharanga pa muryango wa hema lakhe pa nyengo iyo kukocha chomene.

²Abrahamu wakinuska maso ghakhe, ndipo wakawona ŵanthu ŵatatu ŵimilira pafupi na iyo. Wakati waŵawona, wakachimbira kufuma pa muryango wa hema na kuya kakumana nawo, ndipo wakasindamira pasi.

³Iyo wakati, “Fumu yane, ndamuŵeyani, usange sono ndasanga uchizi panthazi pinu, mureke kujumphilira waka pa muteŵeti winu.

⁴Rekani tumaji tuchoko waka tutoreke kuti mugeze mu malundi ghinu, ndipo mupumule musi mwa khuni.

⁵Rekani nditore chakurya chichoko waka kuti nkhongono zinu ziweleremo, pakuti mwafika kwa nda muteŵeti winu, ndipo pamanyuma mungarutanga.” Iwo ŵakazgora ŵakati, “Chita umo wayowoyera.”

⁶Ntheura mwaluŵiro Abrahamu wakanjira mu hema umo mukaŵa Sara wakati, “Nozga luŵiro miyeso yitatu ya ufu uweme, uwukonkhe ndipo uphike vingwa vipapati.”

⁷Abrahamu wakachimbilira ku vyakuŵeta, wakaya katorako ngwata yitechi na yiweme ndipo wakamupa muteŵeti mweneuyo wakayinozga maluŵiro.

⁸Ndipo wakiza na chambiko, mkaka na nyama ya ngwata iyo wakaphika, ndipo wakavikhazika panthazi pawo. Iyo wakimilira pafupi nawo musi mu khuni apo iwo ŵakaryanga.

⁹Iwo ŵakati kwa iyo, “Kasi Sara muwoli wako wali nkhu?” Abrahamu wakazgora wakati, “Wali mu hema.”

¹⁰Ndipo FUMU, yumoza wa ŵanthu ŵara, yikati, “Ndamkuwera nadi kwa iwe pa nyengo iyi chirimika chikwiza ndipo Sara muwoli wako wizamkuŵa na mwana mwanarume.” Sara wakategherezganga kuseri kwa muryango wa hema.

¹¹Abrahamu na Sara ŵakaŵa ŵachekuru chomene ndipo pa nyengo iyi Sara wakaŵa kuti wareka kugeza.

¹²Ntheura Sara wakaseka mu mtima wakhe wakati, “Umo ine ndachekulira, ndipo na umo mufumu wane nayo wachekulira, kasi ndingamanya kukondwaso na mufumu wane?”

¹³Penepapo FUMU yikati kwa Abrahamu, “Nchifukwa uli Sara wakaseka na kuti, ‘Kasi sono nditi ndibabe nadi mwana, apo ndili muchekuru?’

¹⁴Kasi kaliko kanthu ako nkhanonono chomene kwa FUMU? Ndizamkuweraso pa nyengo yeneyiyi chirimika chikwiza, ndipo Sara wizamkuŵa na mwana mwanarume.”

¹⁵Kweni Sara wakakana wakati, “Ine kuti ndanguseka chara.” Pakuti iyo wakopanga. Kweni FUMU yikati, “Inya, iwe wanguseka.”

¹⁶Ŵanthu ŵara ŵakawuka kufuma penepara, ndipo ŵakarazga ku Sodomu. Abrahamu wakaruta nawo kuya kaŵaperekezga mu nthowa.

¹⁷Sono FUMU yikati, “Kasi ndimubisenge Abrahamu icho ndili pafupi kuchita?

¹⁸Asi Abrahamu wati waŵenge fuko likuru na lankhongono, ndipo mafuko ghose gha pa charu cha pasi ghamkutumbikikira mwa iyo?

¹⁹Chara nadi, pakuti ndamusora mwakuti walangulire ŵana ŵakhe na ŵa mu nyumba yakhe awo ŵakwiza pamanyuma pakhe kuti ŵendenge mu nthowa ya FUMU pakuchita urunji na kweruzga mwakunyoroka. Mwa ntheura ine FUMU nditi ndimuchitirenge Abrahamu icho nkhapangana nayo.”

²⁰Penepapo FUMU yikati, “Chitengero nchikuru cha kususka Sodomu na Gomora ndipo kwananga kwawo nkhwakofya chomene.

²¹Ntheura nditi ndikhire sono, mwakuti ndiwone usange ŵakuchita nadi uheni kwakuyana na chitengero icho ndapulika. Penepapo nditi ndimanye usange ndi ntheura chara.”

²²Ntheura ŵaŵiri mwa ŵanthu ŵara ŵakaruta kurazga ku Sodomu. Kweni Abrahamu wakimilira penepara panthazi pa FUMU.

²³Abrahamu wakasenderera pafupi wakati, “Kasi muparanyenge nadi ŵanthu ŵarunji pamoza na ŵanthu ŵakwananga?

²⁴Usange ŵanthu ŵarunji ŵangaŵamo 50 mu msumba uwu, kasi muparanyenge nadi malo agha kwambula kughareka chifukwa cha ŵanthu ŵarunji 50 awo ŵalimo?

²⁵Mureke kuchita chinthu cha ntheura, kukoma ŵarunji pamoza na ŵakwananga, mwakuti ŵarunji ŵayane waka na ŵakwananga. Ichi chingachitikanga na imwe chara. Asi Mweruzgi wa charu chose wakwenera kuchita urunji?”

²⁶Ndipo FUMU yikati, “Usange ndamkusangamo ŵarunji 50 mu msumba wa Sodomu, ndamkughareka malo ghose chifukwa cha iwo.”

²⁷Abrahamu wakatiso, “Ndajitorera chikanga kuyowoya namwe Fumu, ndamweneine ndili fuvu na vyoto pera.

²⁸Kweni panji pa ŵanthu ŵarunji 50 papereŵerenge ŵankhonde, kasi napo muparanyenge msumba wose pakuti papereŵera ŵankhonde?” FUMU yikazgora, yikati, “Usange ndamkusangamo ŵarunji 45, ndamkuwuparanya chara.”

²⁹Abrahamu wakafumbaso, wakati, “Usange ŵangasangikamo ŵanthu 40 pera, kasi mwamkuwuparanya?” FUMU yikazgora, yikati, “Ichi kuti ndichitenge chara chifukwa cha ŵanthu 40.”

³⁰Ndipo Abrahamu wakati, “Ndaŵeya Fumu, mungakwiyanga chara, kweni ndiyowoye ndipera. Usange mungasangika ŵanthu 30 pera, kasi mwamkuwuparanya?” FUMU yikazgora, yikati, “Ichi kuti ndichitenge chara chifukwa cha ŵanthu 30.”

³¹Abrahamu wakatiso, “Ndajitorera chikanga kuyowoya ntheura kwa imwe Fumu. Usange ŵangasangikamo ŵanthu 20 pera, kasi mwamkuwuparanya?” FUMU yikazgora, yikati, “Ichi kuti ndichitenge chara chifukwa cha ŵanthu 20.”

³²Ndipo Abrahamu wakati, “Ndaŵeya Fumu, mungakwiyanga chara, kweni ndiyowoye kamoza pera. Usange mungasangika ŵanthu khumi pera, kasi mwamkuwuparanya?” FUMU yikazgora, yikati, “Ndiwuparanyenge chara chifukwa cha ŵanthu khumi.”

³³FUMU yikati yayowoya na Abrahamu yikaruta ndipo Abrahamu nayo wakawerera ku kwakhe.