Read new_tumbuka_bible Mutendeko 19 Bible Online

Mutendeko 19 - new_tumbuka_bible bible

Mutendeko 19

¹Ŵangelo ŵaŵiri ŵara ŵakafika ku Sodomu na mise ndipo Loti wakakhara mu chipata cha msumba ura. Para Loti wakaŵawona wakawuka kuya kakumana nawo. Wakasindamira pasi,

²ndipo wakati, “Ŵasekuru ŵane, ndaŵeya, patukirani kuno ku nyumba ya nda muteŵeti winu, mugeze mu malundi na kugona ndipo muwukenge na mulenjelenje na kuruta.” Iwo ŵakati, “Chara, titi tigone mu msewu wa mu msumba.”

³Kweni wakaŵakoserezga chomene. Ntheura ŵakapatukira kwa iyo na kunjira mu nyumba yakhe. Loti wakaŵanozgera chakurya. Wakaphika vingwa vyambula chirungo, ndipo iwo ŵakarya.

⁴Kweni ŵachali ŵandarute kuya kagona, ŵanarume ŵa mu msumba wa Sodomu, ŵanyamata na ŵarara, kwambula wakukharapo, ŵakayizingirizga nyumba kwete.

⁵Ŵakachemerezga kwa Loti, ŵakati, “Ŵalinkhu ŵanarume awo ŵafika kwa iwe usiku uno? Ŵafumiskire kuno kwa ise kuti tigonane nawo.”

⁶Loti wakafuma na kuruta kwa iwo, ndipo wakajarako ku muryango.

⁷Iyo wakati, “Mwa ŵabali, nkhumuŵeyani, rekani kuchita uheni wa ntheura.

⁸Wonani sono, ndili na ŵana ŵasungwana ŵaŵiri awo ŵandamumanye mwanarume. Rekani ndiŵafumiskire kwa imwe, ndipo muchite nawo nga ndi umo mukukhumbira. Kweni mungachitanga kanthu chara ku ŵanarume aŵa, pakuti mbalendo ŵane ndipo nkhwenera kuŵavikirira.”

⁹Kweni iwo ŵakati, “Fumako iwe!” Ŵakatiso, “Munthu uyu ndi mulendo muno, kasi ndiyo sono wakukhumba kuŵa mweruzgi! Sono titi tikuchitire uheni ukuru kuruska ŵanarume aŵa.” Penepapo ŵakamugundizga chomene Loti, ndipo ŵakasenderera kuti ŵaswe chijaro.

¹⁰Kweni ŵanarume ŵara ŵakanyoroska mawoko ghawo na kumuguzira Loti mu nyumba kwa iwo, ndipo ŵakajarako.

¹¹Ŵakaŵaburumutizga maso ŵanarume ŵara ŵakaŵa pa muryango wa nyumba, wose ŵanyamata na ŵarara, mwakuti ŵakatondeka kusanga muryango.

¹²Sono ŵangelo ŵara ŵakati kwa Loti, “Kasi uli nawo ŵabali ŵako muno, ŵakweni, ŵana ŵako ŵanarume na ŵanakazi, ndiposo na wose awo uli nawo mu msumba? Uŵafumyemo.

¹³Tili pafupi kupankhura malo pakuti chitengero kususka ŵanthu ŵakhe chaŵa chikuru panthazi pa FUMU, ndipo FUMU yatituma kwiza kaghapankhura.”

¹⁴Ntheura Loti wakafuma na kuŵaphalira ŵakweni ŵakhe, ŵeneawo ŵakajalira ŵana ŵakhe ŵasungwana, wakati, “Wukani, fumanimo mu malo ghano, chifukwa FUMU yili pafupi kupankhura msumba uwu.” Kweni ŵakweni ŵakhe wakawona nga ndi para wakuchita myati.

¹⁵Ku matandakucha ŵangelo ŵara ŵakamukoserezga Loti ŵakati, “Wuka, tora muwoli wako, na ŵana ŵako ŵanarume na ŵanakazi aŵa ŵali pano, mzire mumare petu para msumba ukulangika.”

¹⁶Kweni Loti wakaziurika. Ntheura ŵangelo ŵakaŵakora waka pa kawoko, iyo na muwoli wakhe na ŵana ŵakhe ŵanakazi ŵaŵiri, pakuti FUMU yikaŵa na lusungu na iyo. Ŵakamufumiska na kumuŵika kuwaro kwa msumba.

¹⁷Para ŵakaŵafumiskira kuwaro kwa msumba, ŵakati, “Chimbirani kuti muponoske umoyo winu. Kulaŵiska kumanyuma chara nanga nkhwima palipose mu dambo. Chimbilirani ku mapiri mzire muparanyike.”

¹⁸Loti wakati, “Chara, gowokani fumu yane.

¹⁹Nda muteŵeti winu ndasanga uchizi panthazi pinu ndipo mwarongora lusungu lukuru kwa ine pakuponoska umoyo wane. Kweni kuti ndingamanya kuchimbilira ku mapiri chara, mzire soka lindisange, ndifwe.

²⁰Wonani, pafupi apo pali msumba uchoko, uko ndingamanya kuchimbilirako. Rekani ndichimbilire kwenekura. Asi ndi msumba uchoko? Ndipo umoyo wane uti uponoskekenge.”

²¹Mungelo yura wakati kwa iyo, “Wona, ichi nacho nkhukuzomerezga. Kuti nditi ndipankhurenge chara msumba weneuwu wawuzunura.

²²Yendeska, chimbilira kwenekuko chifukwa nditi ndichitenge kanthu chara usuke ufike kura.” Ndicho chifukwa zina la msumba ura ukachemeka Zowara.[10]

²³Dazi likafumanga waka para Loti wakanjira mu msumba wa Zowara.

²⁴Penepapo FUMU yikarokweskera sulufure na moto pa Sodomu na Gomora.

²⁵Ntheura FUMU yikabwangandula misumba yira pamoza na dambo lose na wose awo ŵakakharanga mu misumba yira, ndiposo na chilichose icho chikamera pa malo ghara.

²⁶Kweni muwoli wa Loti mweneuyo wakaŵa pa masinda pakhe wakalaŵiska kumanyuma, ndipo wakazgoka chiduli cha mchere.

²⁷Na mulenjelenje Abrahamu wakaruta pa malo gheneghara wakimilirapo zuŵa lira panthazi pa FUMU.

²⁸Wakalaŵiska ku msumba wa Sodomu na wa Gomora, ndiposo na ku charu chose cha dambo. Wakawona waka josi likutoroka mu charu nga ndi josi lakufuma mu ng'anjo ya moto.

²⁹Sono para Chiuta wakaparanya misumba ya mu dambo, wakamukumbuka Abrahamu, ndipo wakamuthaska Loti ku pharaniko yeneiyo yikaparanya misumba yeneyira Loti wakakharangamo.

³⁰Loti wakafuma mu msumba wa Zowara, na kuya kakhara mu mphanji mu mapiri, pamoza na ŵana ŵakhe ŵanakazi ŵaŵiri, pakuti wakopanga kukhara mu Zowara. Ntheura wakakharanga mu mphanji pamoza na ŵana ŵakhe ŵara.

³¹Mwana wakhe wa uŵere wakati kwa munung'una wakhe, “Ŵadada ŵachekura, ndipo kulije mwanarume pa charu uyo wangatitora kwakuyana na luso lwa charu.

³²Tiye tiŵamweske vinyo ŵadada, ndipo titi tigone nawo mwakuti tisungiremo mphapu mwa ŵadada.”

³³Ntheura usiku wenewura wiskewo ŵakamumweska vinyo. Mwana wa uŵere wakaruta kuya kagona na wiske. Wiske wakamanya chara apo iyo wakiza kagonanga na apo wakarutiranga.

³⁴Na machero ghakhe, mwana wa uŵere wakati kwa munung'una wakhe, “Mayiro na usiku, ine nkhagona na ŵadada. Tiye tiŵamweske vinyo na usiku uno wuwo, ndipo iwe urute ukagone nawo, kuti tisungiremo mphapu mu ŵadada.”

³⁵Ntheura usiku wenewura wiskewo ŵakamumweska vinyo. Munung'una wakaruta kuya kagona na wiske. Wiske kuti wakamanya chara apo wakiza kagonanga na apo wakarutiranga.

³⁶Ntheura ndimo ŵana ŵaŵiri ŵara ŵa Loti ŵakatorera nthumbo ku wiskewo.

³⁷Mwana wa uŵere wakababa mwana mwanarume, ndipo wakamuthya zina lakhe Mowabu.[11] Iyo ndiyo wiskewokuru wa ŵaMowabu mpaka sono.

³⁸Munung'una nayoso wakababa mwana mwanarume, ndipo wakamuthya zina lakhe Beni Ami.[12] Iyo ndiyo wiskewokuru wa ŵaAmoni mpaka sono.