Read new_tumbuka_bible Mutendeko 2 Bible Online

Mutendeko 2 - new_tumbuka_bible bible

Mutendeko 2

¹Ntheura kuchanya na charu cha pasi na vyose ivyo vili mwenemumo vikamara kulengeka.

²Pa zuŵa la chinkhonde na chiŵiri, Chiuta wakaŵa wamarizga mlimo wakhe uwo wakachitanga. Pa zuŵa ili la chinkhonde na chiŵiri wakapumula[2] ku milimo yose iyo wakachitanga.

³Ntheura Chiuta wakatumbika zuŵa la chinkhonde na chiŵiri ndipo wakalipatula, pakuti pa zuŵa leneilo wakapumula ku mlimo wakhe uwo wakachita wa kulenga.

⁴Iyi ndiyo ndondomeko ya kalengekero ka kuchanya na charu apo vikalengekera. Para FUMU Chiuta wakalenganga charu cha pasi na vyose vya kuchanya,

⁵vyakumera vya mu minda vikaŵa vindamere pa charu, ndiposo vivwati vya mu thondo vikaŵa vindambe kumera, chifukwa FUMU Chiuta wakaŵa wandarokweske vura pa charu. Ndiposo kukaŵavye munthu wakulima charu.

⁶Kweni nyathutwe wakakweranga kufumira pa charu na kuthilira charu chose.

⁷Penepapo FUMU Chiuta wakawumba munthu kufumira ku dongo la pasi, na kuthutiramo mu mphuno zakhe muvuchi wa umoyo. Ndipo munthu wakazgoka wamoyo.

⁸Ndipo FUMU Chiuta wakata munda mu Edeni, cha ku mafumiro gha dazi. Mwenemumo ndimo wakaŵika munthu mweneuyo wakamuwumba.

⁹Sono FUMU Chiuta wakamezga mu dongo makuni ghakutowa gha vipambi viweme pakurya. Pakati pa munda wakamezgapo khuni la umoyo na khuni la kumanyira uweme na uheni.

¹⁰Mronga ukafuma mu Edeni kuthilira munda uwu, ndipo kufuma penepara ukagaŵikana kuŵa mironga yinayi.

¹¹Zina la mronga wakudanga ndi Pishoni. Uwu ukwenda na kuporota mu charu chose cha Havila, uko kuli golide.

¹²Golide la charu icho ndiweme. Kuliso ulimbo wa sungu liweme ndiposo na libwe lakuzirwa la onike.

¹³Zina la mronga wa chiŵiri ndi Gihoni. Uwu ukwenda na kuporota mu charu chose cha Etiyopiya.

¹⁴Zina la mronga wa chitatu ndi Tigirisi uwo ukwenda ku mafumiro gha dazi kwa msumba wa Ashuru. Mronga wa chinayi ndi Yufurate.

¹⁵Sono FUMU Chiuta wakamutora munthu yura na kumuŵika mu munda wa Edeni, kuti wawulimenge na kuwupwererera.

¹⁶Ndipo FUMU Chiuta wakamuphalira munthu yura, wakati, “Uli mwanangwa kurya vipambi vya khuni lirilose mu munda.

¹⁷Kweni vipambi vya khuni la kumanyira uweme na uheni ungaryanga chara, chifukwa mu zuŵa leneilo uti uryere, ufwenge nadi.”

¹⁸FUMU Chiuta wakati, “Nkhuweme chara kuti munthu wakharenge yekha. Nditi ndimupangire movwiri wakumwenerera.”

¹⁹Ntheura FUMU Chiuta wakatora dongo na kuwumba vinyama vyose vya mu thengere na viyuni vyose vya mudera, ndipo wakiza navyo kwa munthu kuti wawone mazina agho wangavithya. Zina lose ilo munthu wakathya chamoyo chilichose, leneilo ndilo likaŵa zina lakhe.

²⁰Sono munthu wakathya mazina vyakuŵeta vyose, viyuni vya mudera, na vinyama vyose vya mu thengere. Kweni kwa munthu kuti kukasangika movwiri wakumwenerera chara.

²¹Ntheura FUMU Chiuta wakamugoneka munthu tulo tuzitu. Apo wakaŵa wachali mu tulo, Chiuta wakatorako mbambo yakhe yimoza na kuwezgerapo nyama apo yikafuma.

²²Ndipo mbambo iyo FUMU Chiuta wakatorako ku mwanarume wakayizgora kuŵa mwanakazi, ndipo Chiuta wakiza nayo kwa mwanarume.

²³Ndipo munthu wakati, “Uyu sono nchiwangwa cha viwangwa vyane ndiposo munofu wa munofu wane. Wati wachemekenge, ‘Mwanakazi’,[3] chifukwa wakatoreka kufuma ku mwanarume.”

²⁴Pa chifukwa ichi, mwanarume wati waside ŵawiske na ŵanyina, na kubatikana na muwoli wakhe, ndipo ŵati ŵaŵe thupi limoza.

²⁵Ndipo wose ŵaŵiri wuwo mwanarume na mwanakazi ŵakaŵa nkhule, kweni kuti ŵakaŵa na soni chara.