Read new_tumbuka_bible Mutendeko 20 Bible Online

Mutendeko 20 - new_tumbuka_bible bible

Mutendeko 20

¹Abrahamu wakafumako ku Mamure, ndipo wakaruta ku charu cha ku Negebu, ndipo wakaya kakhara pakati pa malo gha Kadeshi na Shuru. Wakaya kakhara mu msumba wa Gerara nga mulendo.

²Abrahamu wakayowoyanga za Sara muwoli wakhe kuti ndi mudumbu wakhe. Ntheura Abimeleki karonga wa ku Gerara wakatuma ŵanthu ndipo ŵakamutorera Sara kwa iyo.

³Sono Chiuta wakiza kwa Abimeleki mu maloto na usiku ndipo wakati kwa iyo, “Uti ufwenge chifukwa cha mwanakazi uyo ulikutora, pakuti ndi muwoli wamwene.”

⁴Kweni Abimeleki wakaŵa wachali wandamumanye. Ntheura wakati, “Fumu, kasi imwe muti mukomenge fuko lambula kafukwa?

⁵Asi Abrahamu wakandiphalira kuti ndi mudumbu wakhe ndipo mwanakazi nayo wakati Abrahamu ndi mudumbu wakhe? Nkhachita ichi na mtima uweme ndiposo na wambula kafukwa.”

⁶Penepapo Chiuta wakayowoya nayo mu maloto, wakati, “Inya nkhumanya kuti wachita ichi na mtima uweme. Ndicho chifukwa nkhakukanizga kuti undinangire ndiposo kuti umukhwaske.

⁷Ntheura sono umuwezgere munthu uyo muwoli wakhe. Iyo ndi nchimi, wati wakurombere ndipo uti uŵenge wamoyo. Kweni usange ulije kumuwezgera, manya kuti uti ufwenge nadi, iwe na wose ŵa mu nyumba yako.”

⁸Abimeleki wakawuka na mulenjelenje ndipo wakachema nduna zakhe zose na kuziphalira vinthu vyose ivi uku zikupulika. Ntheura nduna zira zikopa chomene.

⁹Sono Abimeleki wakachema Abrahamu ndipo wakati kwa iyo, “Kasi nchinthu uli icho watichitira? Ndipo kasi ndakwanangirachi iwe, kuti utorere pa ine na pa ufumu wane kwananga kukuru uku? Wandichitira chinthu icho chikwenera kuchitika chara.”

¹⁰Abimeleki wakamufumba Abrahamu wakati, “Fundo yako yikaŵa yakuti uli pakuchita chinthu ichi?”

¹¹Abrahamu wakati, “Nkhachita ichi chifukwa nkhaghanaghana kuti, kuno kulije na munthu yumoza uyo wakopa Chiuta, ndipo kuti ŵati ŵandikome chifukwa cha muwoli wane.

¹²Ndipo nadi ndi mudumbu wane. Iyo ndi mwana wa ŵadada, kweni kuti tili kubabika kwa amama ŵamoza chara, ndipo nkhamutora kuŵa muwoli wane.

¹³Para Chiuta wakandiyingiska kufumira mu nyumba ya ŵadada, nkhamuphalira kuti usange ukunditemwa, kose uko tamkwenda ukayowoyenge kuti uyu ndi mudumbu wane.”

¹⁴Ntheura Abimeleki wakatora mberere na mbuzi, ng'ombe ndiposo na ŵateŵeti ŵanarume na ŵanakazi, wakapereka kwa Abrahamu, na kumuwezgera Sara muwoli wakhe.

¹⁵Penepapo Abimeleki wakamuphalira Abrahamu, wakati, “Wona, charu chose icho chikuwoneka panthazi pako nchane. Uli mwanangwa kukhara pose apo watemwa.”

¹⁶Kwa Sara wakati, “Ndapereka kwa mudumbu wako ndarama za siliva chikwi chimoza. Izi ndizo ziti ziŵenge chipanikizgo kuti iwe warunjiskika apo ŵanthu wose awo uli nawo ŵakuwona na ŵanthu ŵanyakhe wose.”

¹⁷Penepapo Abrahamu wakaromba kwa Chiuta, ndipo Chiuta wakamuchizga Abimeleki ndiposo na muwoli wakhe pamoza na ŵateŵeti-kazi ŵakhe, mwakuti ŵangamanya kubaba.

¹⁸Pakuti FUMU yikajara mphapo za wose ŵa mu mbumba ya Abimeleki chifukwa cha Sara, muwoli wa Abrahamu.