Read new_tumbuka_bible Mutendeko 21 Bible Online

Mutendeko 21 - new_tumbuka_bible bible

Mutendeko 21

¹FUMU yikamukumbuka Sara ndipo yikamuchitira ivyo yikapangana nayo.

²Ntheura Sara wakaŵa na nthumbo, ndipo wakamubabira Abrahamu mwana mwanarume mu uchekuru wakhe, pa nyengo yeneiyo Chiuta wakayizunura.

³Abrahamu wakamuthya mwana wakhe mweneuyo Sara wakamubabira zina lakhe Yisake.

⁴Abrahamu wakamukotora Yisake para wakaŵa na mazuŵa ghankhonde na ghatatu, nga ndi umo Chiuta wakamulangulira.

⁵Abrahamu wakaŵa wa virimika 100 para Yisake wakababikanga.

⁶Sono Sara wakati, “Chiuta wandikondweska na kundisekeska ine. Yose uyo wapulikenge ichi wati wasekerere nane.”

⁷Ndipo wakatiso, “Ndi njani wati wamuphalirenge Abrahamu kuti Sara wamkonkheska mwana? Kweni ndamubabira mwana mwanarume apo iyo ndi muchekuru.”

⁸Mwana yura wakakura, ndipo ŵakamurumura. Abrahamu wakanozgera chiphikiro chikuru pa zuŵa lakulumulira Yisake.

⁹Zuŵa limoza Sara wakawona kuti Ishimaele, mwana mweneuyo Hagara muEguputo wakamubabira Abrahamu, wakusoŵera na Yisake mwana wakhe.

¹⁰Ntheura wakati kwa Abrahamu, “Umuchimbizge mwanakazi muzga uyu pamoza na mwana wakhe kuti mwana wa mwanakazi uyu wareke kwiza kahara chuma pamoza na Yisake mwana wane.”

¹¹Chinthu ichi chikamukwenyerezga Abrahamu chifukwa cha Ishimaele mwana wakhe.

¹²Kweni Chiuta wakati kwa Abrahamu, “Ureke kukwenyerera mu mtima pa chifukwa cha msepuka, na pa chifukwa cha mwanakazi muzga wako. Vyose ivyo Sara wakukuphalira umupulikire, chifukwa ndi mwa Yisake umo mphapu yako yichemekerenge.

¹³Mwana wa mwanakazi muzga yura nayoso ndamkumuzgora kuŵa fuko, chifukwa iyo nayo ndi mphapu yako.”

¹⁴Ntheura Abrahamu wakawuka na mulenjelenje ndipo wakatora chakurya na maji mu thumba la chikumba na kumupa Hagara. Wakaviŵika pa chiŵegha chakhe pamoza na mwana ndipo wakamuphalira kuti warutenge. Hagara wakawukapo, ndipo wakayingayinga mu mapopa gha ku Beyeresheba.

¹⁵Para maji ghakamumalira mu chikumba, wakamuŵika mwana musi mu chivwati.

¹⁶Penepapo Hagara wakaruta na kukhara pasi pataliko na mwana, panji kwakuyana na mtunda wa mamita 100, chifukwa wakati, “Ndingawonanga mwana wane wakufwa ntheura chara.” Wakati wakhara penepara pafupi nayo, mwana wakalira chomene.[13]

¹⁷Chiuta wakapulika kulira kwa msepuka ndipo mungelo wakamuchema Hagara kufumira kuchanya wakati, “Kasi ukusuzgikirachi Hagara? Reka kopa, pakuti Chiuta wapulika kulira kwa msepuka, penepara wangumugoneka.

¹⁸Wuka, munyamure mwana ndipo umukoreske na woko lako, chifukwa nditi ndimuzgore kuŵa fuko likuru.”

¹⁹Penepapo Chiuta wakajula maso gha Hagara, ndipo wakawona chisimi cha maji. Iyo wakaruta na kuzuzga maji mu thumba la chikumba, ndipo wakamupa msepuka kuti wamwe.

²⁰Chiuta wakaŵa nayo msepuka ndipo iyo wakakura. Wakakharanga mu mapopa ndipo wakaŵa nkhocho yakufikapo.

²¹Wakakharanga mu mapopa gha Parani ndipo ŵanyina ŵakamutorera mwanakazi kufuma mu charu cha Eguputo.

²²Pa nyengo yeneyira Abimeleki na Fikolo mweneuyo wakaŵa murongozgi mukuru wa nkhondo yakhe ŵakamuphalira Abrahamu, ŵakati, “Chiuta wali nawe mu vyose ivyo ukuchita.

²³Ntheura sono rapa kwa ine mu zina la Chiuta kuti uti undipusikenge chara, nanga nkhu ŵana ŵane na ku ŵazukuru ŵane. Kweni chita kwa ine kwakuyana na umo ine ndakuchitira iwe mu kugomezgeka, ndimo wize kachitire nane, ndiposo na charu icho ukukharamo nga ndi mulendo.”

²⁴Ndipo Abrahamu wakati, “Nkhurapa.”

²⁵Penepapo Abrahamu wakadandaula kwa Abimeleki chifukwa cha chisimi cha maji, icho ŵateŵeti ŵa Abimeleki ŵakamuphanga.

²⁶Kweni Abimeleki wakati, “Nkhumanya chara uyo wachita chinthu ichi. Iwe kuti ulikundiphalirapo ine chara, ndipo ndindapulikepo na kale mpaka muhanya uno.”

²⁷Ntheura Abrahamu wakatora mberere na mbuzi, ng'ombe na kumupa Abimeleki, ndipo ŵaŵiri aŵa ŵakachita phangano.

²⁸Abrahamu wakapatulapo ŵana-mberere ŵanakazi ŵankhonde na ŵaŵiri kufuma mu mskambo.

²⁹Abimeleki wakati kwa Abrahamu, “Kasi ukung'anamulachi pakupatulapo ŵana-mberere ŵanakazi aŵa ŵankhonde na ŵaŵiri?”

³⁰Abrahamu wakati, “Ŵana-mberere ŵanakazi aŵa mupokerere kufuma kwa ine nga ndi chipanikizgo kuti ndine nkhajima chisimi ichi.”

³¹Ntheura malo ghara wakaghathya Beyeresheba,[14] chifukwa penepara wose ŵaŵiri wuwo ŵakachita chirapo.

³²Ŵakati ŵachita phangano ili ku Beyeresheba kura, Abimeleki na Fikolo murongozgi mukuru wa nkhondo yakhe, ŵakawerera ku charu cha ŵaFilisiti.

³³Sono Abrahamu wakapanda khuni la kusoperako la mtaŵa pa malo gha Beyeresheba, ndipo penepara wakayisopa FUMU, Chiuta wa muyirayira.

³⁴Abrahamu wakakhara nga ndi mulendo mu charu cha ŵaFilisiti mazuŵa ghanandi.