Read new_tumbuka_bible Mutendeko 22 Bible Online

Mutendeko 22 - new_tumbuka_bible bible

Mutendeko 22

¹Pamanyuma pa vinthu ivi, Chiuta wakamuyezga Abrahamu, ndipo wakati kwa iyo, “Abrahamu!” Ndipo Abrahamu wakati, “Ndine pano.”

²Chiuta wakati, “Tora Yisake, mwana wako yekha na yekha mweneuyo ukumutemwa, ndipo ruta ku charu cha Moriya, ukamupereke kwenekura kuŵa sembe yakocha, pa limoza la mapiri leneilo ndamkukurongora.”

³Ntheura na mulenjelenje Abrahamu wakaŵika chiskaro pa mbunda yakhe, wakatorapo ŵateŵeti ŵakhe ŵaŵiri na kuruta nayo, ndiposo na mwana wakhe Yisake. Wakadumula nkhuni za sembe yakocha, na kuruta ku malo gheneagho Chiuta wakamuphalira.

⁴Pa zuŵa la chitatu, Abrahamu wakinuska maso, ndipo wakaghawona malo ghara patali.

⁵Ntheura Abrahamu wakaŵaphalira ŵateŵeti ŵakhe, wakati, “Kharani pano na mbunda. Ine na msepuka titi tirute kura kuya kasopa, ndipo tamukwizaso kwa imwe.”

⁶Abrahamu wakatora nkhuni za kukawochera sembe na kumuthwikiska Yisake. Iyomwene wakayegha moto na chimayi. Ntheura ŵakaruta pamoza wose ŵaŵiri wuwo.

⁷Yisake wakayowoya na Abrahamu ŵawiske, “Ŵadada!” Iyo wakati, “Ndine pano, mwana wane.” Yisake wakati, “Nkhuwona moto na nkhuni. Kweni kasi walinkhu mwana-mberere mweneuyo tamkupereka kuŵa sembe yakocha?”

⁸Abrahamu wakati, “Mwana wane, Chiuta iyomwene wamkupereka mwana-mberere wa sembe yakocha.” Ntheura ŵakaruta pamoza wose ŵaŵiri wuwo.

⁹Para ŵakafika pa malo agho Chiuta wakamuphalira, Abrahamu wakazenga jochero penepapo, na kuŵikapo nkhuni makora ghene. Wakamukaka Yisake mwana wakhe, na kumugoneka pa jochero pachanya pa nkhuni zira.

¹⁰Ndipo Abrahamu wakatora chimayi kuti wamukome mwana wakhe.

¹¹Kweni mungelo wa FUMU wakachemerezga kwa iyo kufumira kuchanya, wakati, “Abrahamu, Abrahamu!” Iyo wakati, “Ndine pano.”

¹²Mungelo wakati, “Ungamukomanga msepuka chara, nanga nkhumuchitira kanthu kalikose. Sono ndamanya kuti ukupulikira Chiuta, pakuti ulije kukanilira mwana wako yekha na yekha.”

¹³Abrahamu wakinuska maso ghakhe ndipo kumanyuma kwakhe wakawona mberere yanarume yakoreka masengwe mu chivwati. Abrahamu wakaruta, ndipo wakaya kayitora mberere yira na kuyipereka kuŵa sembe yakocha mu malo gha mwana wakhe.

¹⁴Ntheura Abrahamu wakathya malo ghara kuti, “FUMU yiti yipereke.” Na lero wuwo ŵanthu ŵakuyowoya kuti, “Pa phiri lakhe, FUMU yiti yipereke.”

¹⁵Mungelo wa FUMU wakachemerezga kachiŵiri kwa Abrahamu kufumira kuchanya,

¹⁶wakati, “FUMU yikuti, ‘Ndajirapizga ndekha, chifukwa wachita chinthu ichi, ndiposo ulije kukanilira mwana wako yekha na yekha,

¹⁷kuti ndamkukutumbika. Ndamkwandaniska mphapu yako kuti yiŵe nga ndi nyenyezi za kuchanya, ndiposo nga ndi muchenga uwo uli mu mphepete mwa nyanja. Mphapu yako yamkuthereska ŵarwani ŵawo.

¹⁸Ndipo mu mphapu yako ndimo mafuko ghose gha pa charu cha pasi ghamkutumbikikira, chifukwa iwe wandipulikira.’ ”

¹⁹Abrahamu wakawerera ku ŵateŵeti ŵakhe, ndipo wose ŵakaruta pamoza ku Beyeresheba. Abrahamu wakakhara kwenekura.

²⁰Pamanyuma pa vinthu ivi, Abrahamu wakapulika kuti Milika, muwoli wa Nahoro munung'una wakhe, nayo wakamubabira ŵana.

²¹Mwana wa uŵere wakaŵa Uzi, ndipo munung'una wakhe wakaŵa Buzi. Pakaŵaso Kemuwele wiske wa Aramu,

²²ndiposo na Kesede, Hazo, Pilidasha, Yidilafu, na Betuwele.

²³Betuwele ndiyo wakababa Rebeka. Ntheura ŵana aŵa ŵankhonde na ŵatatu ndiwo Milika wakamubabira Nahoro, munung'una wa Abrahamu.

²⁴Mwanakazi muchoko wa Nahoro, mweneuyo zina lakhe likaŵa Rewuma, nayoso wakababa Teba, Gahamu, Tahashi na Maaka.