Read new_tumbuka_bible Mutendeko 25 Bible Online

Mutendeko 25 - new_tumbuka_bible bible

Mutendeko 25

¹Abrahamu wakatora mwanakazi munyakhe zina lakhe Ketura.

²Ketura wakababa Zimurani, Yokishani, Medani, Midiyani, Ishibaki na Shuwa.

³Yokishani wakababa Sheba na Dedani. Ŵana ŵa Dedani ŵakaŵa Ashurimu, Letushimu na Lewumimu.

⁴Ŵana ŵa Midiyani ŵakaŵa Efa, Efere, Hanoki, Abida na Elida. Wose aŵa ŵakaŵa ŵa mphapu ya Ketura.

⁵Abrahamu wakamupa Yisake vyose ivyo wakaŵa navyo.

⁶Kweni Abrahamu wakapereka vyawanangwa ku ŵana ŵa ŵawoli ŵakhe ŵachoko. Apo wakaŵa wachali wamoyo, Ŵakaŵafumyako kwa mwana wakhe Yisake na kuŵatuma ku charu cha ku mafumiro gha dazi.

⁷Abrahamu wakakhara virimika 175.

⁸Sono Abrahamu wakaŵa muchekuru chomene ndipo wakafwa wali na virimika vinandi. Iyo wakalonda ŵasekuru ŵakhe

⁹Ŵana ŵakhe, Yisake na Ishimaele, ŵakumusunga mu mphanji ya Makipela, mu munda wa Efuroni mwana wa Zohara muHiti, ku mafumiro gha dazi, kwa Mamure.

¹⁰Uwu ukaŵa munda uwo Abrahamu wakagula ku ŵaHiti. Abrahamu na Sara muwoli wakhe ŵakasungika penepara.

¹¹Abrahamu wakati wafwa, Chiuta wakatumbika mwana wakhe Yisake mweneuyo wakakharanga pafupi na mbwiwi ya uyo ngwamoyo mweneuyo wakundiwona.

¹²Iyi ndiyo miwiro ya ŵana ŵa Ishimaele, mwana wa Abrahamu, mweneuyo Hagara, muEguputo, muteŵeti-kazi wa Sara, wakamubabira Abrahamu.

¹³Mazina gha ŵana ŵa Ishimaele kwakuyana na umo ŵakababikira ghakaŵa agha: Nebayoti, mwana wa uŵere wa Ishimaele, Kedara, Adibeyele, Mibisamu,

¹⁴Mishima, Duma, Masa,

¹⁵Hadadi, Tema, Yeturu, Nafishi na Kedema.

¹⁶Aŵa ndiwo ŵakaŵa ŵana 12 ŵa Ishimaele, ndipo vikaya na misasa yawo vikathyika kwakuyana na mazina ghawo. Wose aŵa ŵakaŵa ŵakaronga mu mafuko ghawo.

¹⁷Ishimaele wakaŵa wa virimika 137 apo wakafwiranga, ndipo wakalonda ŵasekuru ŵakhe.

¹⁸Ŵana ŵakhe wakakhara kufuma ku Havila mpaka ku Shuru, ku mafumiro gha dazi kwa charu cha Eguputo, pakurazga ku Asiriya. Iwo ŵakakhara pa ŵekha kulimbana na ŵabali ŵawo.

¹⁹Iyi ndiyo miwiro ya ŵana ŵa Yisake mwana wa Abrahamu. Abrahamu wakababa Yisake.

²⁰Yisake wakaŵa na virimika 40 apo wakatoranga Rebeka, mwana wa Betuwele muAramu wa ku charu cha Padani Aramu, mweneuyo mudumbu wakhe wakaŵa Labani muAramu.

²¹Yisake wakamurombera muwoli wakhe kwa FUMU, pakuti wakaŵa chumba FUMU yikamuzgora lurombo lwakhe ndipo Rebeka muwoli wakhe wakaŵa na nthumbo.

²²Ŵana ŵakalimbana mukati mwakhe, ndipo iyo wakati, “Usange kuli ntheura, nchifukwa uli ndili na umoyo?” Ntheura wakaruta kuya kafumba kwa FUMU.

²³FUMU yikamuphalira, yikati, “Mafuko ghaŵiri ghali mu nthumbo yako, mitundu yiŵiri ya ŵanthu yamkubabika mwa iwe yeneiyo yizamkugaŵikana. Fuko limoza lizamkuŵa lankhongono kuruska linyakhe. Mukuru wakhe wamkuteŵetera munung'una wakhe.”

²⁴Para mazuŵa ghakuti wababe ghakakwana, wakababa ŵamuleza.

²⁵Wakudanga wakafuma muswesi ndipo thupi lakhe lose likaŵa nga ndi malaya gha maweya. Ntheura ŵakamuthya zina lakhe Esau

²⁶Pamanyuma munung'una wakhe wakababika, ndipo woko lakhe likora chitende cha Esau. Ntheura ŵakamuthya kuti Yakhobe. Yisake wakaŵa wa virimika 60 para Rebeka, wakababiranga ŵana ŵara.

²⁷Para ŵasepuka ŵakati ŵakura, Esau wakaŵa chiŵinda wakuchenjera, munthu wakutandara mu thengere. Kweni Yakhobe wakaŵa munthu wakuzika wakukhara mu mahema.

²⁸Yisake wakamutemwa Esau chifukwa wakaryangako nyama izo wakaŵambanga. Kweni Rebeka wakatemwa Yakhobe.

²⁹Zuŵa limoza para Yakhobe wakaphikanga nchunga ziswesi, Esau wakiza kufuma ku thengere ndipo wakaziya chomene.

³⁰Ntheura Esau wakati kwa Yakhobe, “Ndipeko nchunga ziswesi izo, chifukwa ndaziya.” Ntheura zina lakhe likathyika Edomu.[15]

³¹Kweni Yakhobe wakazgora wakati, “Undiguliske danga uŵere wako.”

³²Ndipo Esau wakati, “Ndili pafupi kufwa. Kasi kuŵa wa uŵere kundiŵirenge na chandulo uli?”

³³Yakhobe wakati, “Rapa danga.” Ntheura Esau wakarapa kwa iyo ndipo wakaguliska uŵere wakhe kwa Yakhobe.

³⁴Penepapo Yakhobe wakamupa Esau chingwa na nchunga ziswesi. Iyo wakarya na kumwa, ndipo wakawuka na kuwukapo. Ntheura ndimo Esau wakayuyulira uŵere wakhe.