Read new_tumbuka_bible Mutendeko 26 Bible Online

Mutendeko 26 - new_tumbuka_bible bible

Mutendeko 26

¹Mu charu chira mukaŵaso njara, pa dera pa njara yira yikaŵako kale mu mazuŵa gha Abrahamu. Ndipo Yisake wakaruta ku Gerara kwa Abimeleki karonga wa ŵaFilisiti.

²Sono FUMU yikamuwonekera Yisake ndipo yikati, “Ungakhiliranga ku Eguputo, kweni ukhare mu charu icho nditi ndikuphalire.

³Upanjwe mu charu chino, ndipo nditi ndiŵenge nawe. Nditi ndikutumbikenge chifukwa nditi ndipereke vyaru ivi vyose kwa iwe na ku mphapu yako. Ndifiskenge chirapo icho nkharapa ku ŵawuso, Abrahamu.

⁴Nditi ndandaniske mphapu yako nga ndi nyenyezi za kuchanya, ndipo nditi ndipereke ku mphapu yako vyaru ivi vyose. Mu mphapu yako ndimo mafuko ghose gha mu charu ghati ghatumbikikirengemo.

⁵Ndikutumbikenge chifukwa Abrahamu wakapulikira mazgu ghane na kusunga mazgu ghane, vilayizgo vyane, malangulo ghane na marango ghane.”

⁶Ntheura Yisake wakakhara ku Gerara.

⁷Para ŵanthu ŵa kwenekura ŵakamufumba vya muwoli wakhe, iyo wakati, “Ndi mudumbu wane.” Wakopanga kuŵaphalira kuti, “Ndi muwoli wane.” Wakaghanaghananga kuti panyakhe ŵenecharu ŵangamukoma chifukwa cha Rebeka, pakuti wakaŵa wakutowa chomene.

⁸Yisake wati wakhara kura nyengo yitali, Abimeleki karonga wa ŵaFilisiti, wakalingizga pa dangazi. Wakalaŵiska kuwaro, ndipo wakawona Yisake wakusoŵera na Rebeka muwoli wakhe.

⁹Abimeleki wakamuchema Yisake, ndipo wakati, “Nadi, uyo ndi muwoli wako. Chifukwa uli ukuyowoya kuti, ‘Ndi mudumbu wane?’ ” Yisake wakati kwa iyo, “Chifukwa nkhaghanaghananga kuti panyakhe ndingafwa chifukwa cha iyo.”

¹⁰Abimeleki wakati, “Kasi nchinthu uli icho watichitira ise? Yumoza wa ŵanthu ŵane mphanyi wakagona na muwoli wako, ndipo mphanyi ise watitorera mu majuvyo.”

¹¹Ntheura Abimeleki wakachenjezga ŵanthu wose wakati, “Uyo wati wamukhwaske munthu uyu panji muwoli wakhe wati wakomeke.”

¹²Yisake wakaseŵa mbuto mu charu chira ndipo wakakorora vyakurya vinandi chomene chirimika chira, chifukwa FUMU yikamutumbika.

¹³Yisake wakaŵa musambazi, ndipo usambazi wakhe ukakulirakulira wakasuka wakaŵa na vyuma vinandi chomene.

¹⁴Wakaŵa na mberere na mbuzi, ng'ombe zinandi ndiposo na ŵateŵeti ŵanandi, mwakuti ŵaFilisiti ŵakaŵa nayo na sanje.

¹⁵Sono visimi vyose ivyo ŵateŵeti ŵa ŵawiske ŵakajima mu mazuŵa gha Abrahamu, ŵaFilisiti ŵakavijara na kuviwunda na dongo.

¹⁶Ndipo Abimeleki wakati kwa Yisake, “Fumako kwa ise, chifukwa waŵa na nkhongono chomene kuruska ise.”

¹⁷Yisake wakafumako kura, ndipo wakajintha mahema ghakhe mu dambo la Gerara na kukhara kwenekura.

¹⁸Yisake wakajimaso visimi vyeneivyo vikajimika mu mazuŵa gha Abrahamu ŵawiske, chifukwa ŵaFilisiti ŵakavijara Abrahamu wakati wafwa. Wakavithya mazina gheneagho ŵawiske ŵakavithya pakudanga.

¹⁹Ŵateŵeti ŵa Yisake ŵakajima mu dambo, na kusanga mbwiwi za maji.

²⁰Ŵaliska ŵa ku Gerara ŵakamba kulimbana na ŵaliska ŵa Yisake ŵakati, “Maji agha ngithu.” Ntheura Yisake wakachithya chisimi chira “Eseki”,[16] chifukwa ŵanthu ŵakalimbana nayo.

²¹Ŵakajimaso chisimi chinyakhe, naposo pakaŵa kulimbana. Ntheura wakachithya zina la Sitina.[17]

²²Wakafumako kura ndipo wakajima chisimi chinyakhe. Pa ichi pakaŵavye kulimbana. Ntheura wakachithya zina la Rehoboti,[18] wakati, “Chifukwa sono FUMU yatinozgera malo, ndipo titi tandanenge mu charu.”

²³Kufuma penepara Yisake wakakwerera ku Beyeresheba.

²⁴FUMU yikamuwonekera ku usiku wenewura, yikati, “Ine ndine Chiuta wa ŵawuso Abrahamu. Ungopanga, chifukwa ndili nawe ndipo nditi ndikutumbikenge, na kwandaniska mphapu yako, chifukwa cha muteŵeti wane Abrahamu.”

²⁵Ntheura Yisake wakazengapo jochero na kusopa FUMU. Wakajintha hema lakhe pa malo ghara, ndipo ŵateŵeti ŵakhe ŵakajima chisimi penepara.

²⁶Abimeleki wakaruta kwa Yisake kufumira ku Gerara, pamoza na Ahuzati nduna yakhe, na Fikolo murongozgi mukuru wa ŵasilikari ŵakhe.

²⁷Yisake wakaŵafumba wakati, “Kasi mwizirachi kwa ine, pakuti mukunditinkha ndipo mwandichimbizga ku kwinu?”

²⁸Iwo ŵakati, “Sono tikuwona nadi kuti FUMU yili nawe. Ntheura taghanaghana kuti paŵe chirapo pakati pa imwe na ise. Tichite phangano na iwe,

²⁹kuti ureke kutichitira uheni, nga ndi umo nase tilije kukusuzgira iwe, nanga nkhukuchitira kanthu kaheni, kweni uweme pera. Tikakuzomerezga kuti urute mu mutende. Sono ndiwe wakutumbikika wa FUMU.”

³⁰Ntheura Yisake wakaŵanozgera chiphikiro, ndipo iwo ŵakarya na kumwa.

³¹Na machero ghakhe ŵakawuka na mulenje chomene, ndipo ŵakarapa. Yisake wakaŵaperekezga ndipo ŵakapatukana mu mutende.

³²Zuŵa leneilo ŵateŵeti ŵa Yisake ŵakiza ndipo ŵakamuphalira za chisimi icho iwo ŵakajima. Iwo ŵakati, “Taghasanga maji.”

³³Yisake wakachithya zina lakuti Shiba. Ndicho chifukwa msumba ura ukuchemeka Beyeresheba mpaka sono.

³⁴Para Esau wakaŵa wa virimika 40 wakatora Yuditi, mwana wa Beyeri muHiti kuŵa muwoli wakhe, ndiposo na Basemati mwana wa Eloni muHiti.

³⁵Ŵanakazi aŵa ŵakakwenyerezganga chomene mtima wa Yisake na wa Rebeka.