Read new_tumbuka_bible Mutendeko 27 Bible Online

Mutendeko 27 - new_tumbuka_bible bible

Mutendeko 27

¹Para Yisake wakachekura, ndipo maso ghakhe nagho ghakatondeka kuwona makora, wakachema Esau mwana wakhe murara, ndipo wakati kwa iyo, “Mwana wane.” Esau wakazgora wakati, “Ndine pano.”

²Yisake wakati, “Wona, ine sono ndachekura, ndipo kuti nkhumanya chara zuŵa la nyifwa yane.

³Sono tora mahomwa ghako, phodo yako ya mivwi na uta wako, urute ku thengere ukandikomere nyama.

⁴Undiphikire chakurya chakunowa chira nkhuchitemwa ndipo wize nacho kwa ine kuti ndirye, mwakuti ndikutumbike pambere ndindafwe.”

⁵Rebeka wakapulikizganga para Yisake wakayowoyanga kwa Esau mwana wakhe. Ntheura para Esau wakaruta ku thengere kuya kakoma nyama na kwiza nayo,

⁶Rebeka wakayowoya na mwana wakhe Yakhobe wakati, “Ndangupulika ŵawuso ŵakuyowoya na mukuru wako Esau kuti,

⁷‘Ukandikomere nyama na kundiphikira chakurya chakunowa kuti ndirye, mwakuti ndikutumbike panthazi pa FUMU pambere ndindafwe.’

⁸Ntheura sono mwana wane, pulikira mazgu ghane kwakuyana na umo nkhukulangulira.

⁹Ruta sono ku mskambo, ukanditorere kwenekura twana twa mbuzi tuŵiri tuweme kuti ndiŵaphikire ŵawuso chakurya chakunowa nga ndi umo ŵakutemwera.

¹⁰Ndipo wamupereka chakurya ku ŵawuso kuti ŵarye, mwakuti ŵakutumbike pambere ŵandafwe.”

¹¹Kweni Yakhobe wakati kwa Rebeka, “Amama, Esau mukuru wane wali na maweya mu thupi, ine ndili wambula maweya.

¹²Panji ŵadada ŵizamkundipapaska, ndipo ndizamkuwoneka nga ngwa kupusika na kujitorera nthembo pa ndamwene mu malo mwa chitumbiko.”

¹³Ŵanyina ŵakazgora ŵakati, “Mwana wane, pa ine ndipo paŵenge nthembo yako. Kweni iwe pulikira waka mazgu ghane. Sono rutanga ukanditorere twana twa mbuzi tura.”

¹⁴Ntheura Yakhobe wakaruta wakaya katutora na kupereka ku ŵanyina. Iwo ŵakaphika chakurya chakunowa, icho ŵawiske ŵakatemwanga.

¹⁵Sono Rebeka wakatora vyakuvwara viweme chomene vya mwana wakhe murara Esau, vyeneivyo vikaŵa mu hema, ndipo wakamuvwarika Yakhobe mwana wakhe muchoko.

¹⁶Wakamuvwarikaso vikumba vya twana twa mbuzi mu mawoko ghakhe na mu singo yakhe apo pakaŵavye maweya.

¹⁷Ndipo wakatora chingwa na chakurya chakunowa vyeneivyo wakaphika, na kumupira Yakhobe.

¹⁸Yakhobe wakaruta ku ŵawiske ndipo wakati, “Ŵadada!” Iwo ŵakati, “Ndine pano. Kasi ndiwe njani mwana wane?”

¹⁹Yakhobe wakazgora wakati, “Ndine Esau mwana winu wa uŵere. Ndachita umo mwangundiphalira. Ndaŵeya wukani kuti murye nyama iyo ndamwana winu ndamuphikirani kuti munditumbike.”

²⁰Kweni Yisake wakamufumba mwana wakhe wakati, “Mwana wane, kasi wayisanga uli mwaluŵiro?” Iyo wakazgora wakati, “Chifukwa FUMU, Chiuta winu ndiyo wangundipa mwaŵi.”

²¹Sono Yisake wakati kwa Yakhobe, “Senderera kuno kufupi ndikupapaske, mwana wane, kuti ndimanye usange ndiwe nadi mwana wane Esau panji chara.”

²²Ntheura Yakhobe wakasenderera kufupi na Yisake ŵawiske, ndipo wiske wakamupapaska wakati, “Mazgu nga Yakhobe, kweni mawoko nga Esau.”

²³Iyo kuti wakamupanikizga chara, chifukwa mawoko ghakhe ghakaŵa na maweya, nga ndi mawoko gha Esau mukuru wakhe. Ntheura wakayamba kumutumbika.

²⁴Kweni wakafumbaso wakati, “Kasi ndiwe nadi mwana wane Esau?” Iyo wakazgora wakati, “Inya.”

²⁵Yisake wakati, “Zanga nayo kwa ine nyama iyo wandinozgera kuti ndirye, ndipo ndikutumbikenge.” Ntheura wakiza nayo ndipo wakarya. Wakamutoreraso vinyo ndipo wakamwa.

²⁶Sono wiske Yisake wakati kwa iyo, “Senderera kufupi ndipo undivumbatire mwana wane.”

²⁷Iyo wakasenderera pafupi na kumuvumbatira. Yisake wakanuska sungu la vyakuvwara vyakhe ndipo wakamutumbika wakati, “Wona, sungu la mwana wane liri nga ndi sungu la munda uwo FUMU yawutumbika.

²⁸Chiuta warokweske jumi la kuchanya, wakupe nyata mu minda yako, ndipo wakupe vyakurya vinandi na vinyo!

²⁹Ŵanthu ŵakuteŵeterenge iwe, ndipo ŵamitundu ŵakulambirenge. Uwuse ŵabali ŵako, ndipo ŵabali ŵako ŵakulambirenge iwe. Watembeke yose uyo wakukutemba, ndipo watumbikike yose uyo wakukutumbika.”

³⁰Para Yisake wakamara waka kupereka vitumbiko, Yakhobe wakafumapo panthazi pa ŵawiske. Nyengo yeneiyo Esau mukuru wakhe nayo wakafika kufumira uko wakaŵambanga.

³¹Nayoso wakaphika chakurya chakunowa, ndipo wakiza nacho kwa ŵawiske wakati, “Wukani ŵadada murye nyama iyo ndamwana winu ndamuphikirani kuti munditumbike.”

³²Yisake wakati kwa iyo, “Kasi ndiwe njani?” Iyo wakazgora wakati, “Ndine Esau mwana winu wa uŵere.”

³³Yisake wakambwambwantha chomene, ndipo wakati, “Kasi wanguŵa njani uyo wangukoma nyama na kwiza nayo kwa ine? Ndangurya yose pambere iwe undafike. Inya, wati waŵenge wakutumbikika.”

³⁴Para Esau wakapulika mazgu gha ŵawiske wakalira chomene na mtima wakuŵinya. Wakayowoya ku ŵawiske wakati, “Ŵadada, nditumbikani na ine wuwo.”

³⁵Kweni Yisake wakati, “Munung'una wako wangwiza ndipo wandipusika. Iyo ndiyo wapoka chitumbiko chako.”

³⁶Esau wakati, “Asi ndimo kukumuyanira kuti wachemeke Yakhobe? Iyo wapoka malo ghane kaŵiri. Wakapoka uŵere wane. Sono wandipokaso chitumbiko chane.” Ntheura iyo wakafumba wakati, “Kasi mulije kundisungirako chitumbiko nane?”

³⁷Yisake wakamuzgora Esau wakati, “Wona, ndamwimwika iyo kuŵa wakukuwusa iwe, ndipo ŵabali ŵakhe wose ndamupa kuŵa ŵateŵeti ŵakhe. Ndamupa vyakurya na vinyo. Kasi ndikuchitirechi sono iwe, mwana wane?”

³⁸Esau wakaŵafumba ŵawiske wakati, “Kasi mwanguŵa na chitumbiko chimoza pera ŵadada? Munditumbike na ine wuwo, ŵadada.” Esau wakamba kulira.

³⁹Sono Yisake ŵawiske ŵakati kwa iyo, “Malo ghako ghakukharamo ghaŵavyenge nyata, jumi yizamkuŵa pa minda yako chara.

⁴⁰Uti uŵenge wamoyo pakurwa nkhondo, ndipo uti uteŵetere munung'una wako. Kweni para wamugarukira, wamkuphyora goliwoli la muwuso wakhe.”

⁴¹Esau wakamutinkha Yakhobe chifukwa cha chitumbiko cheneicho ŵawiske ŵakamupa. Iyo wakati mu mtima wakhe, “Mazuŵa ghakutengerera ŵadada ghaneng'enera. Apo ndipo ndamkumukoma Yakhobe munung'una wane.”

⁴²Kweni para Rebeka wakapulika maghanoghano ghose gha Esau, mwana wakhe murara, wakamuchema Yakhobe. Wakamuphalira wakati, “Mukuru wako Esau wakujikhungurufya pakunozgekera kukukoma.

⁴³Ntheura sono mwana wane pulikira mazgu ghane. Wuka chimbilira kwa mudumbu wane Labani ku Harani.

⁴⁴Ukakhareko nayo kanyengo kusuke kutukutwa kwa mukuru wako kugowoke,

⁴⁵ndiposo ukari wa mukuru wako pa iwe ugowoke, ndipo iyo waruwe icho wamuchitira. Penepapo ndizamkutuma ŵanthu kwiza kakutora. Nchifukwa uli ndipokeke, imwe mwa ŵaŵiri wuwo, mu zuŵa limoza?”

⁴⁶Rebeka wakati kwa Yisake, “Ndavuka nawo nkhanira ŵanakazi ŵa chiHiti aŵa. Usange Yakhobe wangatora muwoli mu ŵanakazi ŵa chiHiti mu charu ichi, umoyo wane kuti wandurenge kanthu kwa ine chara?”