Read new_tumbuka_bible Mutendeko 28 Bible Online

Mutendeko 28 - new_tumbuka_bible bible

Mutendeko 28

¹Ntheura Yisake wakamuchema Yakhobe, wakamutumbika ndipo wakamulangula wakati, “Ungatoranga mwanakazi wakufuma mu ŵaKanani.

²Wuka, ruta ku Padani Aramu ku mbumba ya Betuwele, wiske wa ŵanyoko. Ukatore mwanakazi kwenekura, yumoza wa ŵana ŵa Labani mudumbu wa ŵanyoko.

³Chiuta Mwenenkhongono zose wakutumbike, wachite kuti ubabane na kukwandaniska mwakuti uŵe mzinda wa ŵanthu ŵanandi.

⁴Wakutumbike iwe na mphapu yako, nga ndi umo wakatumbikira Abrahamu, mwakuti uhare charu icho Chiuta wakapereka kwa Abrahamu mwenemumo ukukharamo sono nga ndi wakupanjwa.”

⁵Ntheura Yisake wakamutumizga Yakhobe ku Padani Aramu, kwa Labani mwana wa Betuwele muAramu, mudumbu wa Rebeka, ŵanyina ŵa Yakhobe na Esau.

⁶Sono Esau wakawona kuti Yisake wamutumbika Yakhobe, ndiposo wamutuma ku Padani Aramu, kuya katora muwoli kwenekura. Wakawonaso kuti wamutumbika na kumulangula kuti wareke kutora muwoli mu ŵaKanani.

⁷Ndiposo wakawonaso kuti Yakhobe wapulikira ŵawiske na ŵanyina na kuruta ku Padani Aramu.

⁸Penepapo Esau wakawona kuti ŵanakazi ŵa ku Kanani kuti ŵakamukondweska Yisake chara.

⁹Ntheura Esau wakaruta kwa Ishimaele, mwana wa Abrahamu, ndipo kusazgirapo pa ŵawoli ŵakhe wakatoraso Mahalati mwana wa Ishimaele mudumbu wa Nebayoti.

¹⁰Yakhobe wakawukako ku Beyeresheba, ndipo wakaruta ku Harani.

¹¹Wakafika pa malo ghanji ndipo wakakhara penepara usiku ura chifukwa dazi likanjira. Wakatorapo limoza la mawe gha pa malo gheneghara kuŵa musamiro ndipo wakagona tulo pa malo gheneghara.

¹²Wakalota kuti makwerero ghafuma pasi pa charu kuya kafika kuchanya ndipo wakawona ŵangelo ŵa Chiuta ŵakukwera na kukhira mu gheneagho.

¹³FUMU yikimilira pachanya pa makwerero ghara, yikati, “Ine ndine FUMU, Chiuta wa ŵawuso, Abrahamu na wa Yisake. Nditi ndikupenge iwe na mphapu yako charu icho wagonapo.

¹⁴Mphapu yako yizamkwandana nga ndi fuvu la charu. Ŵamkutandazgika kosekose, ku manjiliro gha dazi, ku mafumiro gha dazi, ku mpoto na ku mwera. Mafuko ghose gha mu charu ghamkutumbikikiramo mwa iwe na mphapu yako.

¹⁵Ine ndili nawe, nditi ndikusungilirenge kose uko ukuruta, ndipo ndizamkukuwezgeraso mu charu ichi. Ndizamkukusida chara ndisuke ndichite icho ndakuyowoyera.”

¹⁶Yakhobe wakawuka mu tulo ndipo wakati, “Nadi FUMU yili mu malo ghano. Ine kuti ndangumanya chara.”

¹⁷Sono iyo wakofiwa wakati, “Nako nkhofya kwa malo ghano! Iyi nadi ndi Nyumba ya Chiuta, ndiposo ndi chipata cha kuchanya.”

¹⁸Yakhobe wakawuka na macherochero chomene, wakatora libwe ilo likawa musamiro na kulijintha kuŵa chikumbusko ndipo wakathirapo mafuta.

¹⁹Wakaghathya malo ghara zina la Betele. Kweni pakudanga zina la msumba likaŵa Luzi.

²⁰Yakhobe wakarapa wakati, “Usange Chiuta waŵenge nane na kundisunga mu ulendo wane uwu, ndipo usange wandipenge chakurya na vyakuvwara,

²¹mwakuti ndiwerereso ku nyumba ya ŵadada mu chimango, apo ndipo FUMU yiti yiŵe Chiuta wane.

²²Libwe ili, leneili ndalijintha nga nchikumbusko lamkuŵa Nyumba ya Chiuta, ndipo mu vyose ivyo mukundipa nditi ndipereke kwa imwe chigaŵa cha khumi.”