Read new_tumbuka_bible Mutendeko 29 Bible Online

Mutendeko 29 - new_tumbuka_bible bible

Mutendeko 29

¹Yakhobe wakarutilira ulendo wakhe, ndipo wakafika mu charu cha ŵanthu ŵa ku mafumiro gha dazi.

²Wakati walaŵiska, wakawona miskambo yitatu yagona mu mphepete mwa chisimi. Mberere na mbuzi zira ŵakazimweskanga maji ghakufuma mu chisimi cheneicho. Pachanya pa chisimi pakaŵa libwe likuru.

³Para mskambo wose wa mberere na mbuzi ukawunjikana penepara, ŵaliska ŵakagadabulangapo libwe pa chisimi na kuzimweska maji mberere zira. Para zamwa, wakaŵikangaso libwe lira mu malo ghakhe pachanya pa chisimi.

⁴Yakhobe wakaŵafumba ŵaliska ŵara wakati, “Mwa ŵabali ŵane, kasi kukwinu ndi nkhu?” “Ndise ŵa ku Harani.”

⁵Yakhobe wakafumbaso wakati, “Kasi mukumumanya Labani mwana wa Nahoro?” Iwo ŵakati, “Tikumumanya.”

⁶Wakaŵafumbaso wakati, “Kasi wali makora?” Iwo ŵakati, “Wali makora ndipo wonani Rakelo, mwana wakhe mwanakazi yura wakwiza na mberere na mbuzi.”

⁷Iyo wakati, “Wonani, kuchali muhanya pakati, ndiposo kuti ndi nyengo yakuti muwerere na vyakuŵeta chara. Muzimweske maji mberere na mbuzi ndipo murute nazo kuya kaziliska.”

⁸Kweni iwo ŵakati, “Tingachita chara kwambula kuti mberere na mbuzi zose zawunjikika pamoza, ndiposo kwambula kuti tagadabulapo libwe pachanya pa chisimi. Apo pera ndipo tingazimweska.”

⁹Wachali kuyowoya nawo, Rakelo wakiza na mberere na mbuzi za wiske, pakuti ndiyo wakaziliskanga.

¹⁰Para Yakhobe wakamuwona Rakelo, mwana wa Labani mudumbu wa ŵanyina, wakagadabulapo libwe pachanya pa chisimi, ndipo wakamweska mberere na mbuzi za Labani.

¹¹Yakhobe wakamuvumbatira Rakelo, ndipo wakalira mwakutumphuska mazgu.

¹²Iyo wakamuphalira Rakelo wakati, “Ndine mwana wa Rebeka, mudumbu wa ŵawuso.” Ntheura Rakelo wakachimbira kuya kaŵaphalira ŵawiske.

¹³Para Labani wakapulika uthenga wa Yakhobe mwana wa mudumbu wakhe, wakachimbilira kuya kakumana nayo. Wakamuvumbatira na kumufyofyontha ndipo wakaruta nayo ku nyumba yakhe. Yakhobe wakamwandulira Labani vyose ivi vikachitika.

¹⁴Ndipo Labani wakati kwa iyo, “Nadi, ndiwe wa ndopa yane.” Ntheura Yakhobe wakakhara nayo mwezi umoza.

¹⁵Labani wakati kwa Yakhobe, “Nchakwenerera chara kuti unditeŵetere waka, pa chifukwa chakuti ndiwe wa ndopa yane. Undiphalire, kasi njombe yako yiŵenge vichi?”

¹⁶Labani wakaŵa na ŵana ŵasungwana ŵaŵiri. Murara wakaŵa Leya, ndipo munung'una wakhe wakaŵa Rakelo.

¹⁷Leya wakaŵa na maso[19] ghambula kulaŵiska makora. Kweni Rakelo wakaŵa wakutowa chomene.

¹⁸Yakhobe wakamutemwa Rakelo. Ntheura wakati, “Nditi ndimuteŵeterani virimika vinkhonde na viŵiri kuti nditore Rakelo mwana winu muchoko.”

¹⁹Sono Labani wakati, “Nkhuweme kuti ndimupereke kwa iwe kwakuruska kuti ndimupereke ku munthu munyakhe kharanga nane.”

²⁰Ntheura Yakhobe wakateŵeta virimika vinkhonde na viŵiri kuti watore Rakelo, ndipo vikawoneka kwa iyo nga ndi mazuŵa ghachoko waka chifukwa cha kumutemwa.

²¹Sono Yakhobe wakati kwa Labani, “Mundipe mwana winu kuti nditorane nayo, chifukwa nyengo yane yakwana.”

²²Ntheura Labani wakanozgera chiphikiro, ndipo wakawunjika pamoza ŵanthu wose ŵa pa malo ghara.

²³Kweni na usiku Labani wakatora Leya na kwiza nayo kwa Yakhobe, ndipo Yakhobe wakagona na Leya.

²⁴(Labani wakapereka Zilipa muteŵeti-kazi wakhe kwa Leya kuti waŵe muteŵeti-kazi wakhe.)

²⁵Na machero ghakhe kukati kwacha, Yakhobe wakawona kuti mwanakazi yura ndi Leya. Ntheura wakamufumba Labani wakati, “Kasi nchichi icho mwandichitira? Asi nkhamuteŵeteraninge kuti nditore Rakelo? Kasi mwandipusikirachi?”

²⁶Labani wakati, “Kuti ndimo ghaliri marango ghithu chara, kutengweska munung'una pambere mwana wa uŵere wandatengwe.

²⁷Ulindizge danga yisuke sabata ya chikondwerero cha ukwati yimare, ndipo nditi ndikupe na munyakhe wuwo usange wanditeŵetera virimika vinyakheso vinkhonde na viŵiri.”

²⁸Yakhobe wakachita ntheura. Wakalindizga yikasuka sabata ya chikondwerero cha ukwati yikamara, ndipo Labani wakamupa Rakelo kuti waŵe muwoli wakhe.

²⁹(Labani wakapereka Biliha muteŵeti-kazi wakhe kwa Rakelo kuti waŵe muteŵeti-kazi wakhe.)

³⁰Ntheura Yakhobe wakagona nayo Rakelo nayoso ndipo wakamutemweska kwakuruska Leya. Yakhobe wakamuteŵetera Labani virimika vinyakhe vinkhonde na viŵiri.

³¹Para FUMU yikawona kuti Leya wakamutemwa chara, yikazomera kuti wababenge ŵana, kweni Rakelo wakaŵa chumba.

³²Leya wakaŵa na nthumbo ndipo wakababa mwana mwanarume. Wakamuthya zina lakhe Rubeni[20] chifukwa wakati, “Pakuti FUMU yalaŵiska pa suzgo lane. Nadi sono mufumu wane wati wanditemwenge.”

³³Wakaŵaso na nthumbo na kubabaso mwana mwanarume ndipo wakati, “Chifukwa FUMU yapulika kuti ine nkhutemwaka chara, ndimo yandipiraso mwana munyakhe mwanarume.” Ntheura mwana yura wakamuthya zina lakhe Simiyoni.

³⁴Wakaŵaso na nthumbo na kubabaso mwana mwanarume ndipo wakati, “Sono nyengo iyi mufumu wane wati waskepereranenge nane, chifukwa ndamubabira ŵana ŵanarume ŵatatu.” Ntheura wakamuthya zina lakhe Levi.

³⁵Wakaŵaso na nthumbo na kubabaso mwana mwanarume, ndipo wakati, “Pa nyengo iyi, nditi ndiyirumbe FUMU.” Ntheura wakamuthya zina lakhe Yuda. Ndipo wakareka kubaba.