Read new_tumbuka_bible Mutendeko 3 Bible Online

Mutendeko 3 - new_tumbuka_bible bible

Mutendeko 3

¹Sono njoka yikaŵa yiryarya chomene kuruska vinyama vyose vya mu thengere, ivyo FUMU Chiuta wakalenga. Ndipo njoka yikati kwa mwanakazi, “Kasi Chiuta wakayowoya nadi kuti, ‘Mureke kurya vipambi vya khuni lirilose la mu munda’?”

²Mwanakazi wakati ku njoka, “Tingarya vipambi vya makuni gha mu munda.

³Kweni Chiuta wakati, ‘Mureke kurya vipambi vya khuni ilo liri pakati pa munda nanga nkhuchikhwaska, mzire mufwe.’ ”

⁴Kweni njoka yikati kwa mwanakazi, “Muti mufwenge chara.

⁵Chiuta wakumanya kuti para muryenge vipambi ivi, maso ghinu ghati ghajurikenge, ndipo muti muŵenge nga ndi Chiuta, kumanya uweme na uheni.”

⁶Ntheura para mwanakazi wakawona kuti vipambi vya khuni vikaŵa viweme kurya, na kuti vikaŵa vyakukondweska ku maso, ndiposo vyakukhumbikwa kupa munthu mahara, wakatorako vipambi vinyakhe na kurya. Wakamupako mufumu wakhe uyo wakaŵa nayo, ndipo nayo wakarya.

⁷Ntheura maso gha wose ŵaŵiri wuwo ghakajurika, ndipo ŵakamanya kuti ŵali nkhule. Penepapo ŵakasona mahamba gha chikuyu na kujipangira vyakuvwara.

⁸Na mise kukati kwatima, iwo ŵakapulika kwenda kwa FUMU Chiuta mu munda. Munthu yura na muwoli wakhe ŵakabisama mukatikati mwa makuni kuti FUMU Chiuta wareke kuŵawona.

⁹Kweni FUMU Chiuta wakamuchema munthu wakati, “Kasi uli nkhu?”

¹⁰Adamu wakazgora wakati, “Ndangumupulikani mukwenda mu munda, ndipo ndanguŵa na wofi, pakuti ndanguŵa nkhule. Ntheura ndangubisama.”

¹¹Chiuta wakamufumba wakati, “Kasi ndi njani wangukuphalira kuti uli nkhule.” Kasi warya chipambi cha khuni ilo nkhakulangula kuti ureke kurya?

¹²Munthu yura wakati, “Mwanakazi mweneuyo mukandipa kuti wakharenge nane ndiyo wakandipa vipambi vya khuni, ndipo nkharya.”

¹³Ndipo FUMU Chiuta wakati ku mwanakazi, “Kasi nchichi icho wachita?” Mwanakazi wakati, “Njoka yikandipusika ndipo nkharya.”

¹⁴Ntheura FUMU Chiuta wakati ku njoka, “Pakuti wachita ichi, ndiwe wakutembeka kuruska vyakuŵeta vyose, ndiposo kuruska vikoko vyose vya mu thengere. Uti ukhwaŵenge na nthumbo yako, ndipo uryenge fuvu, mazuŵa ghose gha umoyo wako.

¹⁵Nditi ndiŵike urwani pakati pa iwe na mwanakazi, pakati pa mphapu yako na mphapu yakhe. Iyo wati waphwanyenge mutu wako, ndipo iwe uti urumenge chitende chakhe.”

¹⁶Chiuta wakati ku mwanakazi, “Nditi ndiŵike suzgo yikuru pa iwe pakutora nthumbo, ndipo uti ubabenge ŵana mu vyakuŵinya. Ndipouli, uti ukhumbenge mufumu wako ndipera, ndipo iyo wati wakuwusenge iwe.”

¹⁷Sono Chiuta wakamuphalira Adamu kuti, “Iwe ukapulikira mazgu gha muwoli wako, ndipo waryako chipambi cha khuni ilo nkhakulangula kuti ureke kuryako vipambi vyakhe. Sono charu chatembeka chifukwa cha iwe. Na vyakuŵinya vya kutokatoka kwako ndimo uti usangirenge chakurya mazuŵa ghose gha umoyo wako.

¹⁸Charu chikumezgerenge minga na nthura, ndipo uti uryenge vyakumera vya mu thengere.

¹⁹Na mavuchi pa chisko chako ndimo uti usangirenge chakurya, usuke uwerere ku dongo, pakuti ndiko ukatoreka. Iwe ndiwe fuvu, ndipo uti uwererenge ku fuvu.”

²⁰Sono Adamu wakathya muwoli wakhe zina lakuti Eva,[4] chifukwa iyo ndiyo wakaŵa nyinawo wa ŵamoyo wose.

²¹FUMU Chiuta wakanozgera Adamu na muwoli wakhe vyakuvwara vya vikumba, na kuŵavwarika.

²²Ndipo FUMU Chiuta wakati, “Wonani, munthu waŵa nga ndi yumoza wa ise, kumanya uweme na uheni. Ndipo sono wareke kuzomerezgeka kutoraso chipambi cha khuni la umoyo, na kurya, na kuŵa na umoyo kwa muyirayira.”

²³Ntheura FUMU Chiuta wakaŵafumiska mu munda wa Edeni, kuti ŵalimenge dongo ilo wakatorekamo.

²⁴Wakamuchimbizgira kuwaro munthu yura. Ku mafumiro gha dazi kwa munda wa Edeni wakaŵika ŵakerubi ndiposo na lupanga lwa moto ulo lukazgokeranga kosekose, kujara nthowa yakuya ku khuni la umoyo.