Read new_tumbuka_bible Mutendeko 30 Bible Online

Mutendeko 30 - new_tumbuka_bible bible

Mutendeko 30

¹Para Rakelo wakawona kuti walije kumubabira ŵana Yakhobe, wakaŵa na sanje na mukuru wakhe yura, ndipo wakati kwa Yakhobe “Ndipani ŵana, usange chara, ipo ndifwe waka.”

²Ukari wa Yakhobe ukagolera pa Rakelo ndipo wakati, “Kasi ndine Chiuta, mweneuyo wakanizga kuti iwe uŵe na ŵana?”

³Rakelo wakati, “Uyu muteŵeti-kazi wane Biliha njira mwa iyo kuti wandibabire mwana mwakuti ine nane ndiŵe na ŵana kwizira mwa iyo.”

⁴Ntheura Rakelo wakamupa muteŵeti-kazi wakhe Biliha kuti waŵe muwoli wakhe, ndipo iyo wakamumanya.

⁵Biliha wakaŵa na nthumbo ndipo wakamubabira Yakhobe mwana mwanarume.

⁶Ntheura Rakelo wakati, “Chiuta wayeruzga na kupulika lurombo lwane ndipo wandipa mwana mwanarume.” Ntheura wakamuthya zina lakhe Dani.

⁷Biliha muteŵeti-kazi wa Rakelo wakaŵaso na nthumbo ndipo wakamubabira Yakhobe mwana mwanarume wa chiŵiri.

⁸Ntheura Rakelo wakati, “Ndalimbana nayo chomene mukuru wane, ndipo ndaruska.” Ntheura wakamuthya Nafutali.

⁹Para Leya wakati wawona kuti wareka kubaba, wakatora Zilipa muteŵeti-kazi wakhe, ndipo wakamupa Yakhobe kuti waŵenge muwoli wakhe.

¹⁰Ndipo Zilipa muteŵeti-kazi wa Leya wakamubabira Yakhobe mwana mwanarume.

¹¹Leya wakati, “Ndachita mwaŵi!” Ntheura wakamuthya zina lakhe Gadi.

¹²Zilipa muteŵeti-kazi wa Leya wakamubabiraso Yakhobe mwana mwanarume wa chiŵiri.

¹³Ndipo Leya wakati, “Ndili wakukondwa! Ndipo ŵanakazi ŵanyane ŵati ŵatenge ndili wakukondwa.” Ntheura wakamuthya Ashere.

¹⁴Zuŵa limoza pa nyengo ya kuvuna tirigu, Rubeni wakaruta ku minda, ndipo wakaya kasanga vipambi vya khuni la chinthemwa. Wakiza navyo kwa nyina Leya. Ndipo Rakelo wakaromba kwa Leya wakati, “Undipeko vipambi vya mwana wako vya khuni la chinthemwa.”[21]

¹⁵Kweni Leya wakati kwa iyo, “Kasi ndiko kuti undakhutire chara pakupoka mufumu wane? Kasi sono ukukhumba kupokaso na vipambi vya mwana wane vya khuni la chinthemwa?” Rakelo wakati, “Nkhupangana kuti wizamugona na iwe usiku uno, usange wandipa vipambi vya mwana wako vya chinthemwa.”

¹⁶Para Yakhobe wakiza kufuma ku munda na mise, Leya wakaruta kuya kakumana nayo ndipo wakati, “Muhanya uno mwize kanjire mwa ine chifukwa ndamufupani na vipambi vya khuni la chinthemwa la mwana wane.” Ntheura Yakhobe wakagona nayo usiku wenewura.

¹⁷Chiuta wakapulika lurombo lwa Leya ndipo wakaŵa na nthumbo kumubabira Yakhobe mwana mwanarume wa chinkhonde.

¹⁸Leya wakati, “Chiuta wandipa njombe yane, chifukwa nkhapereka muteŵeti-kazi wane ku mufumu wane.” Ntheura wakamuthya Isakara.

¹⁹Leya wakaŵaso na nthumbo, ndipo wakamubabira Yakhobe mwana mwanarume wa chinkhonde na chimoza.

²⁰Ntheura Leya wakati, “Chiuta wandipa chawanangwa chiweme. Sono mufumu wane kuti wandichindike, chifukwa ndamubabira ŵana ŵanarume ŵankhonde na yumoza.” Ntheura wakamuthya zina lakhe Zebuloni.

²¹Pamanyuma Leya wakababa mwana mwanakazi, ndipo wakamuthya Dayina.

²²Penepapo Chiuta wakamukumbuka Rakelo ndipo wakapulika lurombo lwakhe na kuzomera kuti wababenge.

²³Wakaŵa na nthumbo na kubaba mwana mwanarume, ndipo wakati, “Chiuta wawuskako soni zane.”

²⁴Ntheura wakamuthya Yosefe wakati, “FUMU yindisazgirepo mwana mwanarume munyakhe.”

²⁵Rakelo wakati wababa Yosefe, Yakhobe wakamuphalira Labani kuti, “Mundizomerezge kuti ndiwerenge, ndirute ku charu cha ku kwithu.

²⁶Mundipe ŵawoli ŵane na ŵana ŵeneawo ndamuteŵeteraninge, ndipo mundizomerezge kuti ndirutenge, pakuti mukumanya mlimo uwo ndamuchitirani.”

²⁷Kweni Labani wakati kwa iyo, “Usange ndasanga uchizi panthazi pako, nkhukuŵeya undipulike. Ine ndamanya kwizira mu vimanyikwiro kuti FUMU yanditumbika ine chifukwa cha iwe.

²⁸Undiphalire njombe yako, ndipo ine nditi ndikupe.”

²⁹Yakhobe wakazgora wakati, “Imwe mwaŵene mukumanya umo ndamuteŵeterani, na umo vyakuŵeta vyinu vyayandanirana pakuŵa na ine.

³⁰Kale mukaŵa navyo vichoko waka pambere ndindafike, kweni lero vyandana chomene. FUMU yamutumbikani pose apo ndateŵeta. Kweni sono ndamufukafukira pauli vinthu vya mu nyumba yane na yane?”

³¹Labani wakati, “Kasi ndikulipire vichi?” Yakhobe wakati, “Ine kuti nkhuti mundilipire kanthu chara. Kweni usange muti mundichitire ichi, nditi ndiliskengeso na kusunga mberere na mbuzi zinu.

³²Muhanya uno ine nditi ndende mukati mu mberere na mbuzi zinu zose. Ndiwuskengemo mberere zose za maŵangamaŵanga na za mathotomathoto, na ŵana-mberere ŵafipa wose, ndiposo na mbuzi za mathotomathoto na za maŵangamaŵanga. Za ntheura ndizo ziŵenge njombe yane.

³³Ntheura kugomezgeka kwane ndiko kwamkuphara pamanyuma para mukwiza kawona njombe yane. Usange mukati mu mbuzi mukuwona yose iyo njambula mathotomathoto panji maŵangamaŵanga, ndiposo mwana-mberere uyo kuti ndi mufipa chara, ivi vyamkupimika kuti nvyakwibika.”

³⁴Labani wakati, “Nchiweme! Kuŵe nga ndi umo wayowoyera.”

³⁵Kweni zuŵa leneilo Labani wakawuskako ŵapepe awo ŵakaŵa ŵa midyeleredyelere na ŵa maŵangamaŵanga, na mbuzi zose zanakazi izo zikaŵa za mathotomathoto na za maŵangamaŵanga, na yose iyo vikaŵa na mabanga ghatuŵa, ndiposo na mwana-mberere yose uyo wakaŵa mufipa, ndipo wakaŵaphalira ŵana ŵakhe ŵanarume kuti ŵavipwererere.

³⁶Labani wakapatukako kwa Yakhobe na kuya kakhara pa mtunda wa ulendo mazuŵa ghatatu. Kweni Yakhobe wakaliskanga mberere na mbuzi zinyakhe za Labani.

³⁷Sono Yakhobe wakatora minthavi gha makuni gha mitundu yitatu. Wakatukomora kuti tuŵe na midyeleredyelere yituŵa. Wakachita kuti utuŵa uwoneke mu tundodo tura.

³⁸Tundodo uto wakatukomora, wakatuŵika mu vyakumweramo umo wakathiliranga maji kuti tuŵe panthazi pa miskambo ya mberere na mbuzi para yikwiza kuti yimwe maji. Miskambo yira yikakwerananga para yikizanga kuti yimwe maji.

³⁹Penepapo miskambo ya mberere na mbuzi yira yikamithiranga panthazi pa tundodo tura. Ndipo yikababa ŵana ŵa midyeleredyelere, ŵa mathotomathoto, na ŵa maŵangamaŵanga.

⁴⁰Yakhobe wakapatula ŵana-mberere kuŵa pa ŵekha, ndipo wakachita kuti visko vya miskambo ya mberere na mbuzi yinyakhe yirazge ku za midyeleredyelere, na ku zifipa izo zikaŵa za Labani. Ntheura wakaŵika miskambo yakhe pa yekha. Kuti wakayiŵika pamoza na miskambo ya Labani chara.

⁴¹Para vyakuŵeta vya nkhongono vikakwerananga, Yakhobe wakagonekanga tundodo panthazi pa mberere na mbuzi mukati mu vyakumweramo maji, mwakuti vimithirenge mukati mwa tundodo tura.

⁴²Kweni para mberere na mbuzi vikaŵa vyambula nkhongono kuti wakatuŵikangamo chara. Ntheura vyakuŵeta ivyo vikaŵa vyambula nkhongono vikaŵa vya Labani, ndipo vya nkhongono vikaŵa vya Yakhobe.

⁴³Ntheura ndimo Yakhobe wakaŵira musambazi chomene. Wakaŵa na mberere na mbuzi zinandi, ŵateŵeti ŵanakazi na ŵanarume, ngamila na mbunda.