Read new_tumbuka_bible Mutendeko 31 Bible Online

Mutendeko 31 - new_tumbuka_bible bible

Mutendeko 31

¹Sono Yakhobe wakapulika kuti ŵana ŵa Labani ŵakayowoyanga kuti, “Yakhobe watora vyose ivyo vikaŵa vya ŵadada ndipo wasanga chandulo cha usambazi wose uwu mu ivyo vikaŵa vya ŵadada.”

²Ndipo Yakhobe wakawona kuti Labani wakamulaŵiskanga na chitemwa nga mphakudanga chara.

³Penepapo FUMU yikamuphalira Yakhobe kuti, “Werera ku charu cha ŵasekuru ŵako na ku ŵabali ŵako, ndipo ine ndamukuŵa nawe.”

⁴Ntheura Yakhobe wakatuma munthu kuti ŵakacheme Rakelo na Leya kuti ŵakumane nayo ku thengere uko kukaŵa mskambo.

⁵Iyo wakati kwa iwo, “Nkhuwona kuti wiskemwe kuti wakundilaŵiska na chitemwa nga ndi umo wakachitiranga pakudanga chara. Kweni Chiuta wa ŵadada waŵa nane.

⁶Mukumanya kuti ndamuteŵetera wiskemwe na nkhongono zane zose.

⁷Ndipouli wiskemwe wandipusika ndipo njombe yane wasintha mpaka kakhumi, kweni Chiuta wakamuzomerezga chara kuti wandipweteke.

⁸Usange Labani wakatenge, ‘Za mathotomathoto ndizo ziti ziŵenge njombe yako’, mberere na mbuzi zose zikababanga za mathotomathoto. Ndipo usange wakatenge, ‘Za midyeleredyelere ndizo ziti ziŵenge njombe yako.’ Mberere na mbuzi zose zikababanga za midyeleredyelere.

⁹Ntheura Chiuta wakatora viŵeto vya wiskemwe na kundipa ine.”

¹⁰“Pa nyengo iyo mberere na mbuzi zikumithira, ine nkhalota ndipo nkhawona kuti ŵapepe awo ŵakakweranga pa mberere na mbuzi, ŵakaŵa ŵa midyeleredyelere, ŵa mathotomathoto, na ŵa maŵangamaŵanga.

¹¹Penepapo mungelo wa Chiuta wakayowoya nane mu maloto wakati, ‘Yakhobe’ ndipo ine nkhati, ‘Ndine pano.’

¹²Iyo wakati, ‘Inuska maso ghako ndipo uwone. Ŵapepe awo ŵakukwera pa mskambo ŵa midyeleredyelere, ŵa mathotomathoto na ŵa maŵangamaŵanga. Pakuti ndawona vyose ivyo Labani wakukuchitira iwe.

¹³Ine ndine Chiuta uyo wakakuwonekera ku Betele, uko ukaphakazga mafuta pa mzati kuŵa chikumbusko na kurapa kwa ine. Sono wuka ufumemo mu charu ichi na kuwerera ku charu icho ukababikirako.’ ”

¹⁴Rakelo na Leya ŵakamuzgora wakati, “Kasi tichali na phande panji chiharo kufuma mu nyumba ya ŵadada?

¹⁵Kasi ŵakutizgora ise nga mbalendo chara? Iwo ŵali kutiguliska, ndipo wali kugwiriskira nchito ndarama izo zikaperekeka pa ise.

¹⁶Usambazi wose uwo Chiuta wafumyako ku ŵadada ŵithu, ngwa ise na ŵana ŵithu. Ntheura sono chitani, chose icho Chiuta wamuyowoyerani.”

¹⁷Ntheura Yakhobe wakawuka ndipo wakakwezga ŵana ŵakhe na ŵawoli ŵakhe pa ngamila.

¹⁸Wakakhwema viŵeto vyakhe vyose, na vyose ivyo wakasanga mu Padani Aramu, kuti warutenge kwa wiske Yisake mu charu cha Kanani.

¹⁹Labani wakati waruta kuya kasenga maweya ya mberere na mbuzi zakhe, Rakelo wakiba ŵachiuta ngoza ŵa mu nyumba ya wiske.

²⁰Yakhobe wakamupusika Labani muAramu pakureka kumuphalira kuti wati wamurekenge.

²¹Iyo wakachimbira na vyose ivyo wakaŵa navyo. Wakawuka na kwambuka mronga wa Yufurate, ndipo wakarazgira ku charu cha mapiri gha Gileyadi.

²²Pa zuŵa la chitatu Labani wakaphalirika kuti Yakhobe wachimbira.

²³Labani wakatora ŵabali ŵakhe pamoza nayo, na kurondezga Yakhobe kwa mazuŵa ghankhonde na ghaŵiri ndipo wakamurondezga pafupiko waka nayo kufika ku charu cha mapiri gha Gileyadi.

²⁴Kweni Chiuta wakiza kwa Labani muAramu mu maloto na usiku, ndipo wakati kwa iyo, “Chenjera, ureke kuya kayowoya kwa Yakhobe nanga ndi lizgu liweme panji liheni.”

²⁵Labani wakaya kamusanga Yakhobe. Sono Yakhobe wakaŵa kuti wajintha hema lakhe mu charu cha mapiri chira. Labani nayo na ŵabali ŵakhe ŵakajintha mahema mu charu cha mapiri cha Gileyadi.

²⁶Labani wakati kwa Yakhobe, “Kasi wachitirachi ntheura pakuti undipusike na kutora ŵana ŵane ŵanakazi nga mbamikori awo ŵayoreka na nkhondo?

²⁷Chifukwa uli ukachimbira waka ku ubende na kundipusika, ndipo ulije na kundiphalira? Undiphalirenge mphanyi nkhakuperekezga mwakukondwa na zisumu, pakulizga kalimba na bango.

²⁸Ndipo ukarekerachi kundizomerezga kuti ndilayirane na ŵazukuru ŵane na ŵana ŵane? Ukachichita chinthu cha kupusa.

²⁹Ndili nazo nkhongono zakukuchitira uheni. Kweni Chiuta wa ŵawuso wanguyowoya mu usiku uwo waruta, wanguti, ‘Chenjera, ureke kuya kayowoya kwa Yakhobe nanga ndi lizgu liweme panji liheni.’

³⁰Nkhumanya kuti ukenera nadi kuwukako chifukwa wakhumbisiska kuwerera kukwinu. Kweni kasi nchifukwa uli ukiba ŵachiuta ŵane ŵa mu nyumba?”

³¹Yakhobe wakamuzgora Labani wakati, “Ine nkhopanga chifukwa nkhaghanaghananga kuti mundipokenge ŵana ŵinu mwa nkhongono.

³²Yose uyo mumusangenge kuti wali na ŵachiuta ŵinu wati wakomeke. Panthazi pa ŵabali ŵithu, murongore icho nchinu cheneicho ndili nacho, ndipo mutore.” Kweni Yakhobe wakamanya chara kuti ndi Rakelo uyo wakiba ŵachiuta ŵara.

³³Ntheura Labani wakanjira mu hema la Yakhobe, na mu hema la Leya, ndiposo na mu hema la ŵateŵeti-kazi ŵaŵiri ŵara, kweni wakaŵasanga ŵachiuta ŵakhe chara. Ndipo wakati wafuma mu hema la Leya, wakanjira mu hema la Rakelo.

³⁴Sono Rakelo pa nyengo iyi wakatora ŵachiuta ŵara na kubisa mukati mu chiskaro chakuŵika pa ngamila, ndipo wakakharapo. Labani wakapenja mu hema lose kweni kuti wakaŵasanga chara.

³⁵Rakelo wakaŵaphalira ŵawiske wakati, “Sekuru wane, mureke kukwiya pakuti ndareka kuwuka panthazi pinu, chifukwa ndili makora chara nga ndi umo kukuŵira na ta ŵanakazi.” Ntheura wakapenjapenja kweni kuti wakaŵasanga chara ŵachiuta ŵara.

³⁶Penepapo Yakhobe wakakaripa, ndipo wakamuchenya Labani wakati, “Kasi ndamunangirani vichi? Kasi kwananga kwane ndi nkhu, apo mwandilonda na kutukutwa kwa ntheura.

³⁷Nangauli mwapenjeseska mu ŵakatundu ŵane wose, kasi mwasangamo icho nchinu? Icho mwachisanga muchiŵike panthazi pa ŵabali ŵane na ŵabali ŵinu, mwakuti ndiwo ŵapumule mrandu pakati pa ise ta ŵaŵiri.

³⁸Ndakhara namwe virimika 20. Mberere na mbuzi zinu zanakazi kuti zili kuphorozapo chara, ndiposo ndindaryepo mberere zanarume za mu miskambo yinu.

³⁹Iyo yikaparurika na vikoko kuti nkhiza nayo kwa imwe chara, kweni nkhaharizgirapo ndekha. Mukandipa mrandu para zikibika na muhanya panji na usiku.

⁴⁰Ntheura ndimo nkhaŵira. Na muhanya chithukivu chikandocha, ndipo na usiku nkhasuzgika na chiwuvi. Tulo nato tukawukamo mu maso ghane

⁴¹chifukwa cha ŵana ŵinu ŵanakazi ŵaŵiri aŵa. Nkhateŵeta pakuliska mberere na mbuzi zinu virimika vinkhonde na chimoza. Ndipouli njombe yane mwasintha kakhumi.

⁴²Warekenge kuŵa nane Chiuta wa ŵadada, Chiuta wa Abrahamu, Chiuta mweneuyo Yisake wakamopa, mphayi mukandiwezga waka wambula kanthu. Chiuta wakalaŵiska suzgo yane na milimo ya mawoko ghane, ndipo usiku uwo wajumpha wangumuchenyani.”

⁴³Labani wakamuzgora Yakhobe wakati, “Ŵana ŵanakazi aŵa mbane, ŵana ŵawo nawo mbane, mberere na mbuzi zose nzane, na vyose ivi ukuviwona nvyane. Kweni kasi ndingachitachi muhanya uno ku ŵana aŵa ŵanakazi panji ku ŵana ŵawo awo ŵali kubaba?

⁴⁴Ntheura iwe na ine, zanga tichite phangano, kuti liŵe ukaboni pakati pa ine na iwe.”

⁴⁵Penepapo Yakhobe wakatora libwe na kulimika kuŵa chikumbusko.

⁴⁶Yakhobe wakaŵaphalira ŵabali ŵakhe kuti ŵawunganye mawe. Iwo wakatora mawe na kuwunjika mulu. Ndipo wakaryera chakurya pa mphepete pa mulu wa mawe ghara.

⁴⁷Labani wakawuthya mulu ura Yegara Sahaduta,[22] kweni Yakhobe wakawuthya Galede.

⁴⁸Labani wakati, “Mulu wa mawe agha ndi ukaboni pakati pa ine na iwe muhanya uno. Ndicho chifukwa malo ghara ghakathika Galede.”

⁴⁹Chikumbusko chira chikathyikaso Mizipa, chifukwa Labani wakati, “FUMU ndiyo yiŵe msungiliri pakati pa iwe na ine, para tili kutali yumoza na munyakhe.

⁵⁰Para uti uŵasuzge ŵana ŵane ŵanakazi, panji para uti utoreso ŵawoli ŵanyakhe pa dera pa ŵana aŵa, nanga uli ine kuti ndamkumanya chara, kumbuka kuti, Chiuta ndi kaboni pakati pa ine na iwe.”

⁵¹Sono Labani wakamuphalira Yakhobe kuti, “Wona mulu uwu wa mawe na chikumbusko ichi, ivyo ndimika pakati pa ine na iwe.”

⁵²Mulu wa mawe agha na chikumbusko ichi ndi ukaboni uwo ukuti, “Ndizamkujumphapo chara pa mulu uwu wa mawe pakwiza kwa iwe na nkhondo, ndiposo nawe kuti wizamkujumphapo chara pa mulu wa mawe agha, nanga ndi chikumbusko ichi, pakwiza kwa ine na nkhondo.

⁵³Chiuta wa Abrahamu, Chiuta wa Nahoro, Chiuta wa ŵasekuru, ndiyo weruzge pakati pithu.” Ntheura Yakhobe wakarapira mwa Chiuta uyo wiske Yisake wakamopanga.

⁵⁴Sono Yakhobe wakapereka sembe pa phiri lira, ndipo wakachema ŵabali ŵakhe kuti ŵarye chakurya. Ŵakati ŵarya, ŵakagona penepara pa phiri.

⁵⁵Na machero ghakhe na mulenje, Labani wakawuka, wakavumbatira ŵazukuru ŵakhe na ŵana ŵakhe ŵanakazi pakuŵalayira, ndipo wakaŵatumbika. Ntheura Labani wakawukapo na kuwerera ku kwakhe.