Read new_tumbuka_bible Mutendeko 32 Bible Online

Mutendeko 32 - new_tumbuka_bible bible

Mutendeko 32

¹Yakhobe wakarutilira ulendo wakhe ndipo ŵangelo ŵa Chiuta ŵakakumana nayo.

²Para Yakhobe wakaŵawona wakati, “Uwu ndi msasa wa Chiuta.” Ntheura malo gheneghara wakaghathya Mahanayimu.[23]

³Sono Yakhobe wakatuma mathenga, pambere iyo wandarute, kwa Esau mukuru wakhe mu charu cha Edomu.

⁴Wakaŵaphalira wakati, “Mukamuphalire Esau, sekuru wane mwa ntheura: Muteŵeti winu Yakhobe wakuti, ‘Ine nkhakharanga na Labani, ndipo ndakhara nayo mpaka sono.

⁵Ndili na ng'ombe, mbunda, mberere na mbuzi, ŵateŵeti ŵanarume na ŵanakazi. Ndatuma mathenga kwiza kamuphalirani imwe sekuru wane, usange ndingasanga uchizi pa maso pinu.’ ”

⁶Para mathenga ghara ghakawerera kwa Yakhobe, ghakati, “Tikafika kwa mukuru winu Esau, ndipo nayo wakwiza kuti wakumane namwe. Wali na ŵanthu 400 pamoza.”

⁷Ntheura Yakhobe wakofiwa na kukweŵeka chomene. Wakapatula ŵanthu awo ŵakaŵa nayo, mberere na mbuzi, ng'ombe na ngamila kuŵa mipingo yiŵiri.

⁸Wakaghanaghana kuti, “Usange Esau wafika ku mpingo umoza na kuwumara petu, mpingo unyakhe uwo wakharako uti uphokwe.”

⁹Ntheura Yakhobe wakati, “Mwe Chiuta, wa ŵasekuru Abrahamu, na Chiuta wa ŵasekuru Yisake, Mwe FUMU, imwe mukati kwa ine, ‘Werera ku charu chako na ku ŵabali ŵako ndipo ine ndamkukuchitira uweme.’

¹⁰Ine nkhwenera chara kupokera nanga nkhachoko waka ka chisungusungu chinu chose na kugomezgeka kwinu kose, vyeneivyo mwarongora kwa nda muteŵeti winu. Nkhambuka mronga uwu wa Yorodani kwambula chilichose kweni ndodo yane pera. Kweni sono ndili na mipingo yiŵiri.

¹¹Nkhuromba kwa imwe nkhuti, ‘Mundithaske kwa mukuru wane Esau pakuti nkhumopa, mzire wize katikome tose, ŵanakazi pamoza na ŵana.’

¹²Kweni imwe mukayowoya kuti, ‘Ndamkukuchitira uweme, na kwandaniska mphapu yako nga ndi muchenga wa mu mphepete mwa nyanja, weneuwo unandi wakhe kuti ungapendeka chara.’ ”

¹³Yakhobe wakagona penepapo usiku ura, ndipo wakatoraso mwa ivyo wakaŵa navyo kuŵa chawanangwa kwa Esau mukuru wakhe.

¹⁴Wakapereka mbuzi zanakazi 200, ŵapepe 20, mberere zanakazi 200, mberere zanarume 20,

¹⁵ngamila zakonkheska 30 pamoza na ŵana ŵawo, ng'ombe zanakazi 40 na nkhambako khumi, mbunda zanakazi 20 ndipo zanarume khumi.

¹⁶Viŵeto ivi ŵakaviŵika mu mawoko gha ŵateŵeti ŵakhe, mskambo uwu na uwu, ndipo wakaŵaphalira wakati, “Mudangirenge panthazi pane, ndipo muside kamtunda pakati pa mpingo uwu na uwu.”

¹⁷Wakamuphalira muteŵeti uyo wakaŵa panthazi chomene wakati, “Esau mukuru wane wakukumana nawe para na kukufumba kuti, ‘Kasi ndiwe muteŵeti wa njani? Ndipo ukuyankhu? Ivyo vili panthazi pako nvya njani?’

¹⁸Penepapo iwe wamkuti, ‘Ivi nvya Yakhobe muteŵeti winu. Ndi vyawanangwa ivyo wamutumirani imwe Esau sekuru wane. Iyo nayo wali pamanyuma pithu.’ ”

¹⁹Mazgu agha wakaphaliraso wa chiŵiri, na wa chitatu ndiposo na wose awo ŵakayirondezga miskambo. Wakaŵaphalira kuti, “Ivi ndivyo mukayowoyenge kwa Esau para mukukumana nayo.

²⁰Mukayowoyeso kuti, ‘Nanga ndiyo muteŵeti winu Yakhobe nayo wali pamanyuma pithu.’ ” Yakhobe wakaghanaghana kuti, “Usange ndingamuzikiska na vyawanangwa ivyo vyadangira munthazi mwane, ndipo pamanyuma ndikumane nayo, panji wamkundipokerera.”

²¹Ntheura vyawanangwa vya Yakhobe vikatumika kudangira panthazi pakhe, kweni usiku ura, iyomwene wakagona mu msasa kwenekura.

²²Usiku wenewura Yakhobe wakawuka, wakatora ŵawoli ŵakhe ŵaŵiri, ŵateŵeti-kazi ŵakhe ŵaŵiri, na ŵana ŵakhe 11, na kwambuka mronga wa Yaboko pa jambuko lakhe.

²³Wakati waŵambuska wose ŵara, wakambuskaso na vyose ivyo wakaŵa navyo.

²⁴Yakhobe wakakhara yekha. Penepapo munthu wakachuchuruskana nayo mpaka ku matandakucha.

²⁵Para munthu yura wakawona kuti wakutondeka kumuruska Yakhobe, wakamukhwaska nyonga ya chigha chakhe. Ntheura nyonga yira yikagweduka pakuchuchuruskana nayo.

²⁶Penepapo munthu yura wakati, “Reka ndirutenge pakuti kukucha.” Kweni Yakhobe wakati, “Nditi ndikurekezgenge chara kwambula kuti wanditumbika.”

²⁷Munthu yura wakamufumba wakati, “Zina lako ndiwe njani?” Iyo wakati, “Ndine Yakhobe.”

²⁸Penepapo munthu yura wakati, “Uti uchemekengeso Yakhobe chara, kweni Israele chifukwa walimbana na Chiuta, ndiposo na ŵanthu, ndipo waruska.”

²⁹Yakhobe wakamufumba wakati, “Nkhukuŵeya, undiphalire zina lako.” Kweni munthu yura wakati, “Ukufumbirachi zina lane?” Ndipo munthu yura wakamutumbika Yakhobe penepara.

³⁰Ntheura Yakhobe wakaghathya malo ghara Peniyele, wakati, “Chifukwa ndawonana na Chiuta maso na maso, ndipouli umoyo wane wathaskika.”

³¹Dazi likamufumira para wakafumangapo pa Peniyele, uku wakugontha chifukwa cha chigha chakhe.

³²Ndicho chifukwa mpaka sono ŵaIsraele kuti ŵakurya nyama ya pa nyonga chara chifukwa ndi pa msempha weneuwo uli pa nyonga ya chigha, chifukwa Yakhobe wakakhwaskika nyonga ya chigha cha Yakhobe pa msempha wa mu chiuno.