Read new_tumbuka_bible Mutendeko 33 Bible Online

Mutendeko 33 - new_tumbuka_bible bible

Mutendeko 33

¹Yakhobe wakawona Esau wakwiza na ŵanthu 400. Ntheura ŵana ŵakhe ŵara wakaŵagaŵira Leya, Rakelo, ndiposo na ŵateŵeti-kazi ŵakhe ŵaŵiri ŵara.

²Wakadangizga ŵateŵeti-kazi na ŵana ŵawo, Leya na ŵana ŵakhe pamanyuma pawo, ndipo Rakelo na Yosefe ŵakizanga pa kumanyuma.

³Yakhobe wakadangira ndipo wakasindamira pasi kankhonde na kaŵiri wakasuka wakasenderera pafupi na mukuru wakhe.

⁴Kweni Esau wakachimbira kuya kakumana nayo, wakamuvumbatira, wakamuyagamira na kumufyofyontha. Penepapo wose ŵaŵiri ŵakalira.

⁵Para Esau wakalaŵiska wakawona ŵanakazi na ŵana ndipo wakamufumba wakati, “Kasi ŵanthu aŵa ŵali na iwe mbanjani?” Yakhobe wakati, “Aŵa ndi ŵana ŵeneawo Chiuta mu uchizi wakhe wali kundipa nda muteŵeti winu.”

⁶Ŵateŵeti-kazi na ŵana ŵawo ŵakasenderera pafupi, ndipo ŵakamusindamira.

⁷Leya nayoso na ŵana ŵakhe, ŵakasenderera pafupi na kumusindamira. Pa umaliro Yosefe na Rakelo ŵakasenderera pafupi na kumulambira.

⁸Esau wakafumba wakati, “Kasi mskambo wa vyakuŵeta uwo ndakumana nawo ngwa vichi?” Yakhobe wakazgora wakati, “Ndatenge ndisangirepo uchizi panthazi pinu, sekuru wane.”

⁹Kweni Esau wakati, “Wa munung'una wane, ndili navyo vyakukwanira. Ivyo uli navyo viŵenge vyako.”

¹⁰Yakhobe wakati, “Chara! Nkhumuŵeyani, usange ndasanga uchizi panthazi pinu, pokererani chawanangwa ichi kufuma kwa ine. Para nkhuwona chisko chinu kuli nga ndi para ndawona chisko cha Chiuta, pakuti mwandipokerera mu uchizi wa ntheura uwu.

¹¹Nkhumuŵeyani, pokererani chawanangwa chane icho ndamuyegherani, chifukwa Chiuta waŵa wa uchizi kwa ine ndiposo chifukwa ndili navyo vyakukwanira.” Ntheura wakamukoserezga Esau, ndipo wakachipokera chawanangwa chira.

¹²Penepapo Esau wakati, “Tiye tirutenge ulendo withu. Ine nditi ndidangire panthazi.”

¹³Kweni Yakhobe wakati kwa iyo, “Sekuru wane mukumanya kuti ŵana wavuka, na kutiso nkhwenjerwa na mberere na mbuzi ndiposo na ng'ombe zakonkheska. Usange tikuziyendeska mwaluŵiro mu zuŵa limoza, miskambo yose yiti yifwenge.

¹⁴Sekuru wane dangiraninge panthazi. Ine muteŵeti winu, nditi ndirondezge mumanyuma pachokopachoko, kwakuyana na kendero ka vyakuŵeta, ndiposo kwakuyana na kendero ka ŵana, ndisuke ndifike ku kwinu ku Edomu.”

¹⁵Ntheura Esau wakati, “Reka ndikusidirepo ŵanthu ŵanyakhe aŵa ŵali nane.” Kweni Yakhobe wakati, “Ichi kuti nchakukhumbikwa viŵi chara. Ine nkhukhumba kuti ndisange uchizi panthazi pinu sekuru wane.”

¹⁶Ntheura Esau wakawerera zuŵa lenelira na kuruta ku Edomu.

¹⁷Kweni Yakhobe wakaruta ku Sukoti ndipo wakajizengera nyumba, na kuzengaso visakasa vya ng'ombe zakhe. Ndicho chifukwa malo ghara ghakuchemeka Sukoti.[24]

¹⁸Pamanyuma Yakhobe wakafika makora ku msumba wa Shekemu, uwo uli mu charu cha Kanani, para wakafumira ku Padani Aramu. Wakimika hema lakhe pafupi na msumba ura.

¹⁹Charu icho wakajinthamo hema lakhe wakachigula ku ŵana ŵa Hamoro, wiske wa Shekemu. Wakagula na ndarama 100 za siliva.

²⁰Pa malo gheneghara wakazengaposo jochero, ndipo wakalithya lakuti FUMU, Chiuta wa Israele.