Read new_tumbuka_bible Mutendeko 35 Bible Online

Mutendeko 35 - new_tumbuka_bible bible

Mutendeko 35

¹Chiuta wakati kwa Yakhobe, “Wuka, kwerera ku Betele ndipo ukakhare kwenekura. Ukandizengere jochero ndamwene ine nkhakuwonekera para ukachimbiranga kwa mukuru wako Esau.”

²Ntheura Yakhobe wakaŵaphalira ŵa mu nyumba yakhe na wose awo ŵakaŵa nayo, wakati, “Wuskanimo ŵachiuta ŵachilendo ŵeneawo muli nawo, ndipo mujitozge na kusintha vyakuvwara vyinu.

³Tiyeni tiwuke na kukwerera ku Betele, mwakuti nkhamuzengere jochero Chiuta mweneuyo wakandovwira para nkhaŵa mu visuzgo, ndipo wanguŵa nane kose uko ndendanga.”

⁴Ntheura ŵakapereka kwa Yakhobe ŵachiuta wose ŵachilendo awo ŵakaŵa nawo, na ndewerewe zose izo zikaŵa mu makutu ghawo. Yakhobe wakaviwundira musi mu khuni la musoro ilo likaŵa pafupi na Shekemu.

⁵Apo Yakhobe na ŵana ŵakhe ŵakawukanga ulendo wawo, ŵanthu ŵa mu misumba yakuŵazingirizga ŵakopa, ntheura kuti ŵakaŵarondora chara.

⁶Yakhobe na ŵanthu ŵakhe ŵakafika ku Luzi, (ndiko kuti Betele), mu charu cha Kanani.

⁷Wakazengapo jochero penepara, ndipo malo ghara wakaghathya Eli Betele, chifukwa penepara ndipo Chiuta wakajivumbula kwa iyo apo wakachimbiranga mukuru wakhe.

⁸Debora mulezi wa Rebeka, wakafwa, ndipo wakasungika musi mu khuni la musoro kusika kwa Betele. Ntheura malo ghara ghakathyika Aloni Bakuti.[25]

⁹Yakhobe wakati wawerako ku Padani Aramu Chiuta wakamuwonekeraso ndipo wakamutumbika.

¹⁰Chiuta wakamuphalira wakati, “Zina lako ndiwe Yakhobe. Kweni uti uchemekerengeso Yakhobe chara, kweni Israele ndilo liŵenge zina lako.” Ntheura iyo wakathyika Israele.

¹¹Chiuta wakamuphalira wakati, “Ine ndine Chiuta Mwenenkhongono zose. Ubabe ŵana ndiposo wandane. Fuko la ŵanthu ndiposo na mpingo wa mafuko gha ŵanthu, viti vifume mwa iwe. Ŵakaronga nawo ŵati ŵafumirenge mwa iwe.

¹²Charu icho nkhapereka kwa Abrahamu na Yisake, nditi ndiperekenge kwa iwe, na ku mphapu yako pamanyuma zako.”

¹³Sono Chiuta wakamureka Yakhobe pa malo gheneghara wakayowoyangapo nayo na kuruta.

¹⁴Ndipo Yakhobe wakimika chikumbusko cha libwe, pa malo gheneghara Chiuta wakayowoyerangapo nayo. Wakathirapo sembe ya vyakumwa na kupungulirapo mafuta.

¹⁵Ntheura Yakhobe wakaghathya malo ghara Chiuta wakayowoyerangapo nayo Betele.

¹⁶Wose wakawuka ulendo kufuma ku Betele. Para kukakhara kamtunda kachoko waka kufika ku Efurata, Rakelo nthumbo yikawuka, ndipo wakasuzgika chomene.

¹⁷Para wakaŵa mu unonono wa kubaba, muzamba wakamuphalira wakati, “Reka kopa, pakuti sono uŵenge na mwana mwanarume munyakhe.”

¹⁸Ndipo apo Rakelo wakamarizgikanga (pakuti wakafwanga), wakamuthya mwana yura zina lakuti Beni Oni.[26] Kweni wiske wakamuthya zina la Benjamini.[27]

¹⁹Rakelo wakati wafwa, wakasungika pa nthowa yakuya ku Efurata (ndiko kuti Betelehemu).

²⁰Yakhobe wakimikapo libwe la chikumbusko pa dindi lakhe. Chikumbusko ichi cha dindi la Rakelo chili penepara na kuno lero.

²¹Yakhobe wakarutilira ulendo wakhe, ndipo wakajintha hema lakhe kunthazi kujumpha chigongwe cha Edere.

²²Apo Yakhobe wakakharanga mu charu chira, Rubeni wakagonana na Biliha, muwoli muchoko wa wiske. Yakhobe wakapulika ichi. Ŵana ŵa Yakhobe ŵakaŵa 12.

²³Ŵana ŵa Leya ŵakaŵa aŵa: Rubeni, (mwana wa uŵere wa Yakhobe), Simiyoni, Levi, Yuda, Isakara na Zebuloni.

²⁴Ŵana ŵa Rakelo ŵakaŵa aŵa: Yosefe na Benjamini.

²⁵Ŵana ŵa Biliha, muteŵeti-kazi wa Rakelo, ŵakaŵa aŵa: Dani na Nafutali.

²⁶Ŵana ŵa Zilipa, muteŵeti-kazi wa Leya, ŵakaŵa aŵa: Gadi na Ashere. Ŵeneaŵa ndiwo ŵakaŵa ŵana ŵa Yakhobe awo ŵakababikira mu Padani Aramu.

²⁷Yakhobe wakiza kwa wiske Yisake ku Mamure, uko kukachemekangaso kuti Kiriyati Ariba (ndiko kuti Heburoni), kweneuko Abrahamu na Yisake ŵakapanjwanga kale.

²⁸Yisake wakakhara virimika 180.

²⁹Iyo wakafwa ndipo wakalonda ŵasekuru ŵakhe. Yisake wakafwa ndipo ndi muchekuru chomene. Ŵana ŵakhe aŵa Esau na Yakhobe ndiwo ŵakamusunga mu dindi.