Read new_tumbuka_bible Mutendeko 36 Bible Online

Mutendeko 36 - new_tumbuka_bible bible

Mutendeko 36

¹Iyi ndiyo miwiro ya ŵana ŵa Esau, uyo wakachemekangaso kuti Edomu.

²Esau wakatora ŵanakazi aŵa kuŵa ŵawoli ŵakhe kufuma mu ŵaKanani: Ada mwana wa Eloni muHiti, Oholibama mwana wa Ana muzukuru wa Zibeyoni muHivi,

³na Basemati mwana wa Ishimaele, mudumbu wa Nebayoti.

⁴Ada wakamubabira Esau mwana zina lakhe Elifazi, Basemati wakababa Rewele,

⁵Oholibama wakababa Yeushi, Yalamu na Kora. Ŵeneaŵa ndiwo ŵana ŵa Esau ŵakababa mu charu cha Kanani.

⁶Esau wakatora ŵawoli ŵakhe, ŵana ŵakhe ŵanarume, ŵana ŵakhe ŵanakazi, ŵanthu wose ŵa mu nyumba yakhe, ng'ombe zakhe, vyakuŵeta vyakhe vyose, vyuma vyakhe vyose ivyo wakavisanga mu charu cha Kanani, ndipo wakaruta ku charu chinyakhe kutali na munung'una wakhe Yakhobe.

⁷Iyo wakafumako chifukwa vyuma vyawo vikaŵa vinandi chomene kuti ŵakhare pamoza. Charu icho wakapanjwamo nacho kuti chikaŵakwanira chara, chifukwa ŵakaŵa na ng'ombe zinandi chomene.

⁸Ntheura Esau, mweneuyo ndi Edomu, wakakhara mu charu cha mapiri cha Edomu.

⁹Iyi ndiyo miwiro ya ŵana ŵa Esau, wiske wa ŵaEdomu mu charu cha mapiri cha Edomu.

¹⁰Mazina gha ŵana ŵanarume ŵa Esau ndi agha: Elifazi mwana wa muwoli wakhe Ada, na Rewele mwana wa muwoli wakhe Basemati.

¹¹Ŵana ŵa Elifazi ŵakaŵa aŵa: Temani, Omara, Zefi, Gatamu, na Kenazi.

¹²(Elifazi mwana wa Esau wakababa Amaleki mwa Timuna, muwoli wakhe muchoko.) Ŵeneaŵa ndiwo ŵakaŵa ŵa mphapu ya Ada, muwoli wa Esau.

¹³Ŵana ŵa Rewele ŵakaŵa aŵa: Nahati, Zera, Shama na Miza. Ŵeneaŵa ndiwo ŵakaŵa ŵa mphapu ya Basemati, muwoli wa Esau.

¹⁴Ŵana ŵa Oholibama, muwoli wa Esau, uyo wakaŵa mwana mwanakazi wa Ana, muzukuru wa Zibeyoni, ŵakaŵa aŵa: Yeushi, Yalamu na Kora.

¹⁵Mu ŵana ŵa Esau, ŵarongozgi ŵakaŵa aŵa. Mu ŵana ŵa Elifazi mwana wa uŵere wa Esau: Temani, Omara, Zefi, Kenazi,

¹⁶Kora, Gatamu na Amaleki. Ŵeneaŵa ndiwo ŵakaŵa ŵarongozgi kufuma ku Elifazi mu charu cha Edomu. Iwo ŵakaŵa ŵa mphapu ya Ada.

¹⁷Mu ŵa mphapu ya Rewele mwana wa Esau, ŵarongozgi ndi aŵa: Nahati, Zera, Shama na Miza. Ŵeneawo ndiwo ŵakaŵa ŵarongozgi mu ŵana ŵa Rewele mu charu cha Edomu. Ndiwo ŵa mphapu ya Basemati muwoli wa Esau.

¹⁸Mu ŵa mphapu ya Oholibama, muwoli wa Esau, ŵarongozgi ndi aŵa: Yeushi, Yalamu na Kora. Ŵeneaŵa ndiwo ŵakaŵa ŵarongozgi awo ŵakababika mwa Oholibama muwoli wa Esau, mweneuyo wakaŵa wa mu mphapu wa Ana.

¹⁹Ŵeneaŵa ndiwo ŵa mphapu ya Esau (ndiko kuti Edomu), ndipo ndiwo ŵarongozgi ŵawo.

²⁰Ŵana ŵanarume ŵa Seyiri muHoro, ŵeneawo ŵakakharanga mu charu chira, ŵakaŵa aŵa: Lotani, Shobala, Zibeyoni, Ana,

²¹Dishoni, Ezere na Dishani. Ŵeneaŵa ndiwo ŵakaŵa ŵarongozgi mu ŵaHoro, ŵana ŵa Seyiri mu charu cha Edomu.

²²Ŵana ŵa Lotani ŵakaŵa Hori na Hemani. Mudumbu wakhe wa Lotani wakaŵa Timuna.

²³Ŵana ŵa Shobala ŵakaŵa aŵa: Alivani, Manahati, Ebala, Shefo na Onamu.

²⁴Ŵana ŵa Zibeyoni ŵakaŵa aŵa: Aya na Ana. Ana uyu ndi mweneuyo wakasanga mbwiwi za maji ghakocha mu mapopa, apo wakaliskanga mbunda za wiske Zibeyoni.

²⁵Ŵana ŵa Ana ŵakaŵa aŵa: Dishoni, mwana wakhe mwanarume, na Oholibama, mwana wakhe mwanakazi.

²⁶Ŵana ŵa Dishoni ŵakaŵa aŵa: Hemudani, Eshibani, Itirani na Kerani.

²⁷Ŵana ŵa Ezere ŵakaŵa aŵa: Bilihani, Zavani na Akani.

²⁸Ŵana ŵa Dishani ŵakaŵa aŵa: Uzi na Arani.

²⁹Ŵarongozgi mu ŵaHoro ndi aŵa: Lotani, Shobala, Zibeyoni, Ana,

³⁰Dishoni, Ezere na Dishani. Ŵeneawo ndiwo ŵarongozgi mu ŵaHoro, umo ŵakawira mu mafuko ghawo mu charu cha Edomu.

³¹Aŵa ndiwo ŵakaronga awo ŵakawusanga mu charu cha Edomu pambere kundaŵeko karonga wakuwusa ŵaIsraele:

³²Bela mwana wa Beyoro wakawusa mu charu cha Edomu, ndipo msumba wakhe ukachemeka Dinihaba.

³³Bela wakati wafwa, Yobabu mwana wa Zera wa ku Bozira ndiyo wakawusa mu malo ghakhe.

³⁴Yobabu wakati wafwa, Hushamu wa mu charu cha ŵaTemani ndiyo wakawusa mu malo ghakhe.

³⁵Hushamu wakati wafwa, Hadadi mwana wa Bedadi, mweneuyo wakathereska ŵaMidiyani mu charu cha Mowabu, ndiyo wakawusa mu malo ghakhe, ndipo msumba wakhe ukachemeka Aviti.

³⁶Hadadi wakati wafwa, Samula wa ku Masireka ndiyo wakawusa mu malo ghakhe.

³⁷Samula wakati wafwa, Shawulu wa ku Rehoboti, msumba wa pa mronga wa Yufurate, ndiyo wakawusa mu malo ghakhe.

³⁸Shawulu wakati wafwa, Baala Hanani mwana wa Akibori ndiyo wakawusa mu malo ghakhe.

³⁹Baala Hanani mwana wa Akibori wakati wafwa, Hadari ndiyo wakawusa mu malo ghakhe, ndipo msumba wakhe ukachemeka Pawu. Muwoli wakhe wakaŵa Mehetabele, mwana wa Matiredi, mwana wa Mezahabu.

⁴⁰Agha ndigho mazina gha ŵarongozgi ŵa mphapu ya Esau, kwakuyana na mbumba zawo, ndiposo na malo ghawo: Timuna, Aliva, Yeteti,

⁴¹Oholibama, Ela, Pinoni,

⁴²Kenazi, Temani, Mibizara,

⁴³Magadiyele ndiposo na Iramu. Ŵeneaŵa ndiwo ŵarongozgi ŵa ku Edomu (Esau ndiyo wakaŵa wiskewokuru), kwakuyana na malo agho ŵakakharanga mu charu chawo.