Read new_tumbuka_bible Mutendeko 37 Bible Online

Mutendeko 37 - new_tumbuka_bible bible

Mutendeko 37

¹Yakhobe wakakharanga mu charu cha Kanani cheneicho wiske wakapanjwangamo.

²Uwu ndiwo mudauko kwa mbumba ya Yakhobe. Apo Yosefe wakaŵa wa virimika 17, wakaliskanga mberere pamoza na ŵakuru ŵakhe. Wakaŵa musepuka wakuyana waka na ŵana ŵa Biliha na Zilipa, ŵawoli ŵa wiske. Yosefe wakapharanga ku ŵawiske uheni uwo iwo ŵakachitanga.

³Yakhobe wakamutemwa Yosefe kwakuruska ŵana ŵakhe ŵanyakhe wose, chifukwa wakaŵa mwana wa mu uchekuru wakhe. Wakamusonera munjilira wa mawoko ghatali.

⁴Kweni para ŵakuru ŵakhe ŵakawona kuti wiskewo wakamutemwa kuruska iwo wose, ŵakamutinkha, ndipo kuti ŵakayowoyanga nayo makora chara.

⁵Zuŵa limoza Yosefe wakalota maloto. Iyo wakati waŵaphalira ŵakuru ŵakhe, iwo ŵakamutinkha kwakuruska.

⁶Yosefe wakaŵaphalira wakati, “Pulikani maloto agho ndalota.

⁷Tose tanguŵa mu munda ndipo takakanga mphundwe za tirigu. Mphundwe yane yanguwuka na kwimilira pholi. Mphundwe zinu zanguyizingirizga mphundwe yane na kuyilambira.”

⁸Ŵakuru ŵakhe ŵakamufumba ŵakati, “Kasi iwe ukughanaghana kuti wizamkutiwusa ise? Panyakhe, kasi nadi iwe wizamkuŵa na mazaza pa ise?” Ntheura ŵakamutinkha kwakuruskirako chifukwa cha maloto ghakhe na mazgu ghakhe.

⁹Yosefe wakalotaso maloto ghanyakhe, ndipo wakaŵaphalira ŵakuru ŵakhe ŵara wakati, “Ndangulotaso, ndipo ndanguwona dazi, mwezi na nyenyezi 11 vyandilambiranga.”

¹⁰Kweni para wakaŵaphalira ŵawiske na ŵakuru ŵakhe, wiske wakamuchenya wakati, “Kasi maloto agho walota nga mtundu uli? Kasi ine na ŵanyoko pamoza na ŵakuru ŵako tizamkwiza na kukulambira nadi?”

¹¹Sono ŵakuru ŵakhe ŵara ŵakachita nayo sanje. Kweni wiske wakasunga mazgu agha mu mtima.

¹²Zuŵa limoza ŵakuru ŵa Yosefe ŵakaruta ku Shekemu kuya kaliska mberere na mbuzi za wiskewo.

¹³Yakhobe wakamuphalira Yosefe wakati, “Ŵakuru ŵako ŵakuliska mberere ku Shekemu. Zanga ndikutume kwa iwo.” Yosefe wakazgora wakati, “Inya ŵadada.”

¹⁴Ntheura wiske wakamuphalira wakati, “Ruta ukaŵawone ŵakuru ŵako usange ŵali makora, ndiposo usange mberere na mbuzi nazo zili makora. Ukawereko na kwiza kandiphalira.” Ntheura wiske wakamutuma Yosefe kufumira ku dambo la Heburoni. Yosefe wakati wafika ku Shekemu,

¹⁵munthu munyakhe wakamusanga wakwendendeka waka mu malo ghara ndipo wakamufumba wakati, “Kasi ukupenjachi?”

¹⁶Yosefe wakazgora wakati, “Nkhupenja ŵakuru ŵane. Ndaŵeya, mundiphalire uko ŵakuliska mberere.”

¹⁷Munthu yura wakati, “Ŵawukapo pano, pakuti ndanguŵapulika ŵakuyowoya kuti ŵakuruta ku Dotani.” Ntheura Yosefe wakaŵarondezga ŵakuru ŵakhe, ndipo wakaŵasanga ku Dotani.

¹⁸Ŵana ŵanyakhe ŵara ŵakamuwonera patali, ndipo wachali wandafike kwa iwo, ŵakamuchitira iyo chiŵembu kuti ŵamukome.

¹⁹Ŵakayowoyeskana wakati, “Wonani, wa maloto yura wakwiza.

²⁰Tiyeni sono timukome na kumuponya mu chibuwu chimoza cha ivi vili apa. Titi tiyowoye kuti chikoko chamurya, ndipo tizakawone icho chizamkuŵako kufuma mu maloto ghakhe.”

²¹Kweni Rubeni wakati wapulika ivyo ŵana ŵanyakhe wakayowoyanga, wakayezga kumuthaska kwa iwo. Iyo wakati, “Tireke kumukoma.”

²²Rubeni wakarutilira kuyowoya wakati, “Rekani kuthiska ndopa. Mumuponye waka mu chibuwu ichi muno mu mapopa. Mungamupwetekanga chara.” Wakakhumbanga kwiza kamuthaska kwa iwo, na kumuwezgera ku ŵawiske.

²³Para Yosefe wakafika uko kukaŵa ŵakuru ŵakhe, iwo ŵakamuvura munjilira wakhe ura wa mawoko ghatali weneuwo wakavwara.

²⁴Ŵakamutora na kumuponya mu chibuwu icho chikaŵa chambula kanthu, chikaŵavye maji.

²⁵Sono ŵakakhara pasi kuti ŵarye chakurya. Para ŵakinuska maso ghawo ŵakawona mpingo wa ŵaIshimaele ŵali pa ulendo kufumira ku Gileyadi na ngamila zawo izo zikayegha vyakununkhira, munkhwara wakuphaka wa mafuta, na mure, ivyo ŵakarutanga navyo ku Eguputo.

²⁶Penepapo Yuda wakati ku ŵana ŵanyakhe, “Kasi pali chandulo uli usange tamukoma munung'una withu na kubisa kuti tamukoma?

²⁷Tiyeni, timuguliske waka ku ŵaIshimaele. Tireke kumukoma chifukwa ndi munung'una withu, ngwa ndopa zimoza na ise.” Ŵana ŵanyakhe ŵakazomerezgana nayo.

²⁸Para ŵa malonda ŵanji kufuma Midiyani awo ŵakaŵa ŵaIshimaele ŵakajumphanga pafupi, ŵakuru ŵakhe ŵakamufumiska Yosefe mu chibuwu chira. Ŵakamuguliska Yosefe kwa iwo pa mtengo wa magiramu gha siliva 20, ndipo iwo ŵakaruta nayo ku Eguputo.

²⁹Rubeni wakati wawerera ku chibuwu chira wakawona kuti Yosefe mulije. Ntheura wakaparura vyakuvwara vyakhe.

³⁰Para Rubeni wakati wawerera ku ŵana ŵanyakhe wakati, “Musepuka yura mulije. Sono ine kasi ndichitechi?”

³¹Penepapo iwo wakakoma mbuzi, ŵakatora munjilira wa Yosefe na kuwuzuŵika mu ndopa zakhe.

³²Ŵakatumizga munjilira wa mawoko ghatali ura kwa wiskewo ŵakati, “Tikasanga munjilira uwu. Uwoneni usange ndi munjilira wa mwana winu panji chara.”

³³Yakhobe wakawumanya, ndipo wakati, “Ndi munjilira wa mwana wane! Chikoko chamurya! Kwambula kukayika Yosefe waliwa nadi!”

³⁴Yakhobe wakaparura vyakuvwara vyakhe, na kuvwara chigudulu mu chiuno chakhe, ndipo wakamutengerera mwana wakhe mazuŵa ghanandi.

³⁵Ŵana ŵakhe wose ŵanarume na ŵanakazi ŵakaruta kuya kamusanguruska. Kweni iyo wakakana wakati, “Nditi nditengerere mwana wane mpaka ku malo gha ŵakufwa uko iyo wali.” Ntheura ndimo wiske wakatengerera Yosefe.

³⁶Pa nyengo iyi ŵa malonda kufuma ku Midiyani ŵara ŵakaŵa kuti ŵamuguliska kale Yosefe ku kwa Potifara ku Eguputo. Potifara wakaŵa yumoza wa nduna za Faro, ndipo wakaŵa murara wa chivikiriro.