Read new_tumbuka_bible Mutendeko 38 Bible Online

Mutendeko 38 - new_tumbuka_bible bible

Mutendeko 38

¹Pa nyengo yeneyira Yuda wakaŵareka ŵana ŵanyakhe, ndipo wakaya kakhara kwa mu Adulamu yunji zina lakhe Hira.

²Kwenekura Yuda wakawona mwana mwanakazi wa munthu yunji muKanani, uyo zina lakhe likaŵa Shuwa, ndipo wakamutora kuŵa muwoli wakhe.

³Mwanakazi yura wakaŵa na nthumbo na kubaba mwana mwanarume, ndipo Yuda wakamuthya zina lakhe Ere.

⁴Wakaŵaso na nthumbo, na kubabaso mwana mwanarume, ndipo wakamuthya zina lakhe Onani.

⁵Wakababaso mwana mwanarume, ndipo wakamuthya zina lakhe Shela. Yuda wakaŵa ku Kezibi apo Shela wakababikanga.

⁶Yuda wakamusangira muwoli Ere mwana wakhe wa uŵere, zina lakhe Tamara.

⁷Kweni Ere, mwana wa uŵere yura wa Yuda, kuti wakakondweska FUMU chara mu machitiro ghakhe. Ntheura FUMU yikamukoma.

⁸Penepapo Yuda wakati kwa Onani, “Muhare muwoli wa mukuru wako, ndipo ufiske mlimo nga ndi mulamu wako na kumuwuskira mphapu mukuru wako.”

⁹Kweni Onani wakamanya kuti mphapu yira kuti yamkuŵa yakhe chara. Ntheura nyengo zose para wakagonananga na muwoli wa mukuru wakhe, wakathiranga pasi wanarume wakhe, kuti wareke kumubabira ŵana mukuru wakhe.

¹⁰Sono ivyo wakachitanga kuti wakakondweska FUMU chara. Ntheura FUMU yikamukoma

¹¹Ntheura Yuda wakamuphalira mukamwana wakhe Tamara kuti, “Werera ku nyumba ya ŵawuso, ukakhare chokoro kwenekuko wasuke wakule Shela mwana wane mwanarume.” Wakayowoya ntheura chifukwa wakopanga kuti Shela nayo wamkufwa nga mbakuru ŵakhe. Ntheura Tamara wakaruta kuya kakhara ku nyumba ya wiske.

¹²Pakati pajumphapo nyengo muwoli wa Yuda, mwana wa Shuwa, wakafwa. Wakati wamara kulira nyifwa yira, Yuda na mubwezi wakhe Hira muAdulamu ŵakaruta ku Timuna kweneuko ŵanthu ŵakasenganga maweya ya mberere na mbuzi zawo.

¹³Munthu munyakhe wakamuphalira Tamara wakati, “Ŵawusovyara ŵakuruta ku Timuna kuya kasenga maweya mberere na mbuzi zawo.”

¹⁴Tamara wakavura vyakuvwara vyakhe vya uchokoro, wakabisa chisko chakhe na chidiko, na kujivungilizga na salu ndipo wakakhara pa chipata cha msumba wa Enayimu, pa msewu wakuya ku Timuna. Tamara wakawona kuti Shela sono wakura, kweni kuti ŵakamupereka kwa iyo chara kuŵa muwoli wakhe.

¹⁵Para Yuda wakamuwona Tamara wakaghanaghana kuti ndi hule, pakuti wakajibenekerera ku maso.

¹⁶Wakapatukira kwa iyo mu mphepete mwa msewu, ndipo wakati, “Undizomerezge kuti ndinjiremo mwa iwe.” Yuda wakamanya chara kuti ndi mukamwana wakhe. Iyo wakati, “Kasi muti mundipengechi, kuti mugonane nane?”

¹⁷Yuda wakamuzgora wakati, “Ndamkukutumira kana ka mbuzi kufuma mu mskambo wane.” Ntheura mwanakazi yura wakati, “Ipo mundipe chikhole, musuke mukatume kana ka mbuzi.”

¹⁸Yuda wakamufumba wakati, “Kasi ndikupe chikhole cha mtundu uli?” Mwanakazi wakamuzgora wakati, “Mundipe mphete yinu, chingwe chinu, ndiposo na ndodo yinu iyo yili mu woko linu.” Yuda wakapereka vyose ivi kwa Tamara. Penepapo Yuda wakanjiramo mwa iyo ndipo mwanakazi yura wakaŵa na nthumbo.

¹⁹Tamara wakawuka na kuruta. Wakawuskako chidiko chakhe ndipo wakavwaraso vyakuvwara vya uchokoro.

²⁰Yuda wakatuma mubwezi wakhe muAdulamu, kuya kapereka kana ka mbuzi kara, mwakuti wakapoke chikhole chira kwa mwanakazi yura. Kweni kuti wakamusanga chara.

²¹Wakafumba ŵanthu ŵa kwenekura wakati, “Kasi walinkhu mwanakazi muzaghali yura uyo wakakhara mu mphepete mwa msewu wakuruta ku Enayimu?” Ŵanthu ŵara ŵakazgora ŵakati, “Pandakharepo mwanakazi muzaghali pa malo ghano.”

²²Ntheura iyo wakawerera kwa Yuda, wakati, “Mwanakazi yura kuti ndamusanga chara ndipo ŵanthu ŵa kwenekura ŵangundiphalira kuti, ‘Pandakharepo mwanakazi muzaghali pa malo ghara.’ ”

²³Yuda wakati, “Mureke wavitore waka viŵe vyakhe, mzire ŵanthu ŵatiseke. Nangauli iwe kuti wangumusanga chara, ndipouli ine ndangutumizga ndipera kana ka mbuzi aka.”

²⁴Yikati yajumphapo panji myezi yitatu Yuda ŵakamuphalira kuti, “Tamara, mukamwana wako wali kuleŵa ndipo wali na nthumbo ya mu uleŵe.” Yuda wakati, “Mufumyirani kuwaro ndipo mukamoche.”

²⁵Para ŵakafumanga nayo, Tamara wakatuma mazgu kwa wiskevyara, wakati “Ndili na nthumbo ya mwanarume mweneuyo ndi mwenecho wa vinthu ivi.” Ndipo wakatiso, “Nkhumuŵeyani, muviwone makora vinthu ivi manyi nvya njani: mphete iyi na chingwe ichi, ndiposo na ndodo iyi.”

²⁶Yuda wakavipanikizga vinthu vira, ndipo wakati, “Asi mwanakazi uyu ndi murunji kuruska ine, chifukwa nkhareka kumupereka kwa Shela mwana wane.” Ntheura Yuda kuti wakanjiramoso mwa iyo chara.

²⁷Yikati yakwana nyengo yakuti Tamara wababire, kukasangika kuti wali na ŵana ŵamuleza mu nthumbo yakhe.

²⁸Apo wakababanga, yumoza wa ŵana ŵara wakafumiska woko lakhe. Muzamba wakakora woko lakhe na kukakapo uzi uswesi wakati, “Uyu ndiyo wadanga kubabika.”

²⁹Kweni mwana yura wakawezga woko lakhe, mwakuti munung'una wakhe ndiyo wakadanga kubabika. Muzamba yura wakati, “Ntheura ndimo wajidolorera wekha!” Kwa chifukwa ichi mwana yura wakathyika Perezi.[28]

³⁰Sono pamanyuma ndipo mukuru wakhe, uyo wakaŵa na uzi uswesi pa woko lakhe, nayo wakababika. Iyo wakathyika Zera.[29]