Read new_tumbuka_bible Mutendeko 43 Bible Online

Mutendeko 43 - new_tumbuka_bible bible

Mutendeko 43

¹Sono njara yikaŵa yikuru chomene mu charu.

²Ŵakati ŵarya vyakurya vyose ivyo ŵakaya katora ku Eguputo, wiskewo wakaŵaphalira ŵana ŵakhe kuti, “Rutaniso, mukatigulireko vyakurya vichoko waka.”

³Kweni Yuda wakamuphalira wiske wakati, “Munthu yura wakatichenjezga chomene kuti wamkutizomerezga chara kuti tiwonane nayo kwambula kuruta nayo munung'una withu.

⁴Usange muzomerenge kuti munung'una withu warute pamoza nase, ise titi tirutenge kuya kamugulirani vyakurya.

⁵Kweni usange muzomerenge chara kuti warute, ise titi tirutengeko chara, chifukwa munthu yura wakatiyowoyera kuti, ‘Mwizamkuwonana nane chara kwambula kuti mwiza nayo munung'una winu.’ ”

⁶Penepapo Yakhobe wakati, “Kasi nchifukwa uli mwandichitira uheni wa ntheura, pakumuphalira munthu yura kuti muli na munung'una winu munyakhe?”

⁷Iwo ŵakazgora ŵakati, “Munthu yura wakatifumbisiska chomene na vya ise ndiposo na vya ubali withu, wakati, ‘Kasi muli na munung'una winu munyakhe?’ Kasi ŵawiskemwe ŵachali ŵamoyo? Ise tikazgoranga kwakuyana na umo iyo wakafumbiranga. Sono ise tikati timanyenge uli kuti iyo wati wayowoyenge kuti tirute nayo munung'una withu?”

⁸Yuda wakamuphalira wiske Yakhobe wakati, “Mutumani msepuka uyu na ine, tiwuke tirutenge. Ntheura tose, imwe ŵana ŵithu pamoza na ise tose tiŵenge ŵamoyo kuti tifwenge na njara chara.

⁹Muŵike maso pa ine ndipo mrandu mwize kandipe ine. Usange ndamkureka kuwera nayo na kumupereka kwa imwe, apo ndipo ndizamkuŵa na mrandu kwa muyirayira.

¹⁰Tirekenge kuziwurika, mphanyi tikaruta na kuwerako mwa kaŵiri kose.”

¹¹Ntheura wiskewo Yakhobe wakaŵaphalira wakati, “Usange ndimo kukwenera kuŵira, ipo muchite. Munthu yura mumuyeghereko vipambi viweme vya mu charu ichi mu mathumba ghinu kuti mukamupe chawanangwa. Mumuyegherekoso munkhwara wakuphaka wa mafuta uchoko waka, tuwuchi tuchoko, ndiposo vyakununkhira na mure, skaŵa, na vipambi vya makuni gha alimondi.

¹²Muyeghe ndarama Zakusazgikirako kaŵiri, mwakuti mukawezgekera mu mathumba ghinu. Panji ŵakachita kunangiska.

¹³Mumutore na munung'una winu, ndipo rutaninge, wereraniso ku munthu yura.

¹⁴Chiuta Mwenenkhongono zose wamuchitirani lusungu pa maso pa munthu yura, kuti wakamuwezgerani mwana munyuni ndiposo na Benjamini. Kwakuyana na ine, usange ndapokera ŵana ŵane, ndapokeka ndipera.”

¹⁵Ntheura ŵakatora chawanangwa chira na ndarama zakukwanira ndiposo na Benjamini. Ŵakati ŵanozgeka ŵakanyamuka ulendo wakuruta ku Eguputo. Kwenekura wakaruta kuya kajirongora kwa Yosefe.

¹⁶Para Yosefe wakamuwona Benjamini pamoza nawo, wakamuphalira muteŵeti wa nyumba yakhe wakati, “Uŵanjizge ŵanthu aŵa mu nyumba. Ndipo ukome nyama na kuphika makora, chifukwa ŵanthu aŵa ŵaryenge nane chakurya cha muhanya.”

¹⁷Muteŵeti yura wakachita nga ndi umo Yosefe wakamuphalirira, ndipo wakaŵanjizga ŵanthu ŵara mu nyumba ya Yosefe.

¹⁸Ŵanthu ŵara ŵakofiwa chifukwa chakutorekera ku nyumba ya Yosefe. Iwo ŵakaghanaghana kuti, “Tatorekera kuno chifukwa cha ndarama izo zikawezgekera mu mathumba ghithu pakudanga para. Iyo wakukhumba kuti watisange na chifukwa kuti watiwukire na kutizgora ise kuŵa ŵazga ŵakhe na kutipoka mbunda zithu.”

¹⁹Ntheura wakaruta kwa muteŵeti wa nyumba ya Yosefe, ndipo ŵakayowoyeskana nayo pa muryango wa nyumba.

²⁰Ŵateŵeti ŵakati, “Ŵasekuru, ise tikiza kuno pakudanga kwiza kagula vyakurya.

²¹Tikati kafika pa chiwono tikajula mathumba ghithu, ndipo tikasanga kuti ndarama za munthu waliyose zili pa mlomo wa thumba lakhe, ndarama zithu zose umo zikaŵira. Ntheura ndarama tizaso nazo.

²²Tizaso na ndarama zinyakhe zakugulira vyakurya vinyakhe. Ise tikumanya chara uyo wakaŵikamo ndarama zithu mu mathumba ghithu.”

²³Iyo wakaŵazgora wakati, “Zikani waka mtima, mungopanga. Chiuta winu, Chiuta wa wiskemwe, wakwenera kuti ndiyo wakamuŵikiranimo ndarama mu mathumba. Pakuti ine nkhapokera ndarama zinu.” Penepapo wakamufumya Simiyoni na kwiza nayo kwa iwo.

²⁴Ntheura muteŵeti yura wakaŵanjizga ŵanthu ŵara mu nyumba ya Yosefe. Wakaŵapa maji kuti ŵageze mu malundi, ndipo wakazipa vyakurya mbunda zawo.

²⁵Ŵanthu ŵara ŵakanozgera nkhanira vyawanangwa vyawo, Yosefe wachali wandafike na muhanya, pakuti ŵakapulika kuti ŵati ŵarye chakurya kwenekura.

²⁶Para Yosefe wakafika ku nyumba, ŵakamupa vyawanangwa ivyo wakamuyeghera, ndipo ŵakajikama na kumulambira.

²⁷Yosefe wakaŵafumba na umo ŵakaŵira wakati, “Kasi wiskemwe wali makora, muchekuru mweneuyo mukayowoyanga? Kasi wachali wamoyo?”

²⁸Iwo ŵakazgora ŵakati, “Muteŵeti winu, ŵadada wachali wamoyo, ndipo wali makora.” Ndipo ŵakasindama na kumulambira.

²⁹Para Yosefe wakawona Benjamini, munung'una wakhe mwenemwene, mwana wa ŵanyina ndipo wakati, “Kasi uyu ndiyo muchoko wa imwe mose, mweneuyo mukandiphaliranga? Chiuta wakupe uchizi, mwana wane!”

³⁰Yosefe wakati wayowoya, wakafumapo luŵiroluŵiro pakuti mtima wakhe ukanwekeranga pa munung'una wakhe ndipo wakaŵa pafupi na kulira. Wakaya kanjira mu chipinda chakhe na kulira mwenemumo.

³¹Yosefe wakati wageza ku maso, wakafumamo. Wakajikhwimiska, ndipo wakati, “Ŵikanipo vyakurya.”

³²Yosefe ŵakamupira chakurya pa yekha, ndipo ŵanthu ŵara nawo pa ŵekha. ŴaEguputo awo ŵakaryanga nayo nawoso ŵakaŵapira pa ŵekha. ŴaEguputo kuti ŵakaryeranga pamoza na ŵaHebere chara, pakuti ichi ncha ukazuzi ku ŵaEguputo.

³³Ŵana ŵanyakhe na Yosefe wakakhara pa thebulu panthazi pa Yosefe, ndipo ŵakaŵikika kwakuyana na umo ŵakababiwira, kufumira pa wa uŵere mpaka pa muchoko chomene. Ŵanthu ŵara ŵakalaŵiskana na kuzizwa.

³⁴Vyakurya vikagaŵika kufuma pa thebulu la Yosefe, kweni chigaŵa cha vyakurya vya Benjamini chikaŵa chikuru kankhonde kuruska vyakurya vya ŵana ŵanyakhe. Ntheura ŵakarya na kumwa pamoza na Yosefe ndipo ŵakakondwera pamoza nayo.