Read new_tumbuka_bible Mutendeko 46 Bible Online

Mutendeko 46 - new_tumbuka_bible bible

Mutendeko 46

¹Sono Yakhobe wakawuka ulendo na vyose ivyo wakaŵa navyo, wakaruta ku Beyeresheba, ndipo wakapereka sembe kwa Chiuta wa wiske Yisake.

²Na usiku Chiuta wakamuwonekera mu mboniwoni, ndipo wakati, “Yakhobe, Yakhobe!” Iyo wakati, “Ndine pano.”

³Ntheura wakati, “Ine ndine Chiuta, Chiuta wa ŵawuso. Ungopanga kuruta ku Eguputo, chifukwa kwenekura ndamkukuzgora kuŵa fuko likuru.

⁴Nditi ndirute nawe ku Eguputo, ndipo ine ndamwene ndizamkukuwezgeraso kuno. Yosefe wizamkuŵa nawe pa nyengo iyo wizamkufwira.”

⁵Yakhobe wakawuka kufuma ku Beyeresheba. Ŵana ŵakhe ŵakamukwezga wiskewo Yakhobe, pamoza na ŵawoli na ŵana ŵawo, mu magareta agho Faro wakamutumira wiskewo Yakhobe.

⁶Ŵakatora vyakuŵeta vyawo ndiposo na vyuma ivyo ŵakasanga mu charu cha Kanani. Ntheura Yakhobe pamoza na mphapu yakhe yose wakaruta ku Eguputo.

⁷Iyo wakaruta ku Eguputo na ŵana ŵakhe, na ŵazukuru ŵakhe, ŵanarume na ŵanakazi. Ŵa mu mphapu yakhe yose wakiza nawo ku charu cha Eguputo.

⁸Agha ndiwo mazina gha ŵa mphapu ya Israele ŵeneawo ŵakaruta ku Eguputo, ndiko kuti Yakhobe na ŵana ŵakhe. Rubeni mwana wakhe wa uŵere

⁹na ŵana ŵa Rubeni aŵa: Hanoki, Palu, Hezironi, na Karimi.

¹⁰Ŵana ŵa Simiyoni ŵakaŵa aŵa: Yemuyele, Yamini, Ohadi, Yakini, Zohara na Shawulu, mweneuyo nyina wakaŵa muKanani.

¹¹Ŵana ŵa Levi ŵakaŵa aŵa: Gerishoni, Kohati, na Merari.

¹²Ŵana ŵa Yuda ŵakaŵa aŵa; Ere, Onani, Shela, Perezi na Zera (kweni Ere na Onani ŵakafwira mu charu cha Kanani). Ŵana ŵa Perezi ŵakaŵa Hezironi na Hamulu.

¹³Ŵana ŵa Isakara ŵakaŵa aŵa; Tola, Puva, Yobe na Shimuroni.

¹⁴Ŵana ŵa Zebuloni ŵakaŵa aŵa: Seredi, Eloni, na Yaleyele.

¹⁵Ŵana aŵa ndiwo Leya wakamubabira Yakhobe ku Padani Aramu. Wakamubabiraso Dayina mwana wakhe mwanakazi. Ŵana wose, ŵanarume na ŵanakazi ŵakaŵa 33.

¹⁶Ŵana ŵa Gadi ŵakaŵa aŵa: Zifiyoni, Hagi, Shuni, Eziboni, Eri, Arodi, na Areli.

¹⁷Ŵana ŵa Ashere ŵakaŵa aŵa; Imuna, Ishiva, Beriya, na mudumbu wawo Sera. Ŵana ŵa Beriya ŵakaŵa aŵa: Hebere na Malikiyele.

¹⁸Aŵa ŵakaŵa ŵa mphapu ya Yakhobe awo ŵakababika mwa Zilipa, muteŵeti-kazi mweneuyo Labani wakapereka kwa mwana wakhe Leya. Zilipa wakamubabira Yakhobe ŵana khumi pachanya ŵankhonde na yumoza.

¹⁹Ŵana ŵa Rakelo muwoli wa Yakhobe ŵakaŵa Yosefe na Benjamini.

²⁰Mu charu cha Eguputo, Yosefe wakababa Manase na Efurayimu mu muwoli wakhe Asenati, mwana wa musofi Potifera wa ku Oni.

²¹Ŵana ŵa Benjamini ŵakaŵa aŵa; Bela, Bekere, Ashibele, Gera, Naamani, Ehi, Roshi, Mupimu, Hupimu na Aridi.

²²Wose aŵa khumi pachanya ŵanayi ŵakaŵa ŵa mphapu ya Yakhobe mwa muwoli wakhe Rakelo.

²³Dani wakaŵa na mwana yumoza pera zina lakhe Hushimu.

²⁴Ŵana ŵa Nafutali ŵakaŵa aŵa: Yazeyele, Guni, Yezere na Shilemu.

²⁵Wose aŵa ŵankhonde na ŵaŵiri ŵakaŵa ŵa mphapu ya Yakhobe, ŵeneawo ŵakababika mwa Biliha, muteŵeti mweneuyo Labani wakapereka kwa mwana wakhe Rakelo.

²⁶Ŵanthu wose aŵa ŵakiza na Yakhobe ku Eguputo, ŵana pera ŵa mbumba yakhe, kwambula kusazgirapo ŵawoli ŵa ŵana ŵakhe, wose pamoza ŵakaŵa 66.

²⁷Ŵana awo ŵakababa Yosefe ku Eguputo ŵakaŵa ŵaŵiri pera. Ntheura ŵanthu wose ŵa mu mbumba ya Yakhobe awo ŵakiza ku Eguputo, ŵakaŵa 70.

²⁸Yakhobe wakamudangizga Yuda kwa Yosefe, kukamuphalira kuti wakamupokerere mu chigaŵa cha Gosheni Sono ŵakati ŵafika ku charu cha Gosheni,

²⁹Yosefe wakakaka gareta lakhe, ndipo wakaruta kuya kakumana na Yakhobe, ŵawiske, mu chigaŵa cha Gosheni. Wakati wafika pa maso pakhe, wakamuvumbatira, ndipo wakalira kwa kanyengo.

³⁰Yakhobe wakati kwa Yosefe, “Sono ndingamanya kufwa, pakuti ndawona chisko chako na kumanya kuti uchali wamoyo.”

³¹Sono Yosefe wakati ku ŵakuru ŵakhe ŵara pamoza na ku ŵa mu mbumba ya ŵawiske, “Nditi ndirute kuya kamuphalira Faro kuti ŵakuru ŵane na ŵa mu mbumba ya ŵadada, awo ŵakaŵa mu charu cha Kanani, ŵiza kuno kwa ine.

³²Ŵanthu aŵa mbaliska, pakuti ŵakuŵeta mberere na mbuzi. Iwo ŵiza na miskambo ya mberere na mbuzi zawo, ng'ombe zawo, pamoza na vinthu vyawo vyose.

³³Para Faro wamuchemaninge, na kumufumbani kuti, ‘Kasi mlimo winu nchichi?’

³⁴Imwe mwamkuti, ‘Taŵateŵeti ŵinu tili ŵanthu ŵakusunga viŵeto kwamba ku wanichi withu mpaka sono, nga ndi umo ŵasekuru ŵakaŵira.’ Mwa ntheura mwamkuzomerezgeka kuti mukakhare mu chigaŵa cha Gosheni, chifukwa ku ŵaEguputo muliska waliyose ngwa kukazuzgika.”