Read new_tumbuka_bible Mutendeko 47 Bible Online

Mutendeko 47 - new_tumbuka_bible bible

Mutendeko 47

¹Sono Yosefe wakaruta kwa Faro na kumuphalira kuti, “Ŵadada na ŵakuru ŵane, pamoza na mberere na mbuzi zawo, ng'ombe zawo, ndiposo na vinthu vyawo vyose, ŵiza kufumira ku charu cha Kanani, ndipo sono ŵali mu chigaŵa cha Gosheni.”

²Ndipo wakatorapo ŵana ŵanyakhe ŵankhonde na kuya kaŵarongora kwa Faro.

³Penepapo Faro wakaŵafumba wakati, “Kasi mlimo winu nchichi?” Iwo ŵakati, “Taŵateŵeti ŵinu tili ŵanthu ŵakuŵeta, nga ndi umo ŵakachitiranga ŵasekuru ŵithu.”

⁴Wakayowoyaso kwa Faro kuti, “Tiza kuti tipanjwe mu charu ichi, chifukwa ta ŵateŵeti ŵinu tilije luhari lwa mberere na mbuzi zithu pakuti njara njikuru mu charu cha Kanani. Ntheura taŵeya, tizomerezgani ta ŵateŵeti ŵinu, kuti tikhare mu chigaŵa cha Gosheni.”

⁵Sono Faro wakati kwa Yosefe, “Ŵawuso na ŵakuru ŵako ŵiza kwa iwe.

⁶Charu cha Eguputo chili mu mawoko ghako. Uŵarongore ŵawuso na ŵakuru ŵako malo ghakukharapo, agho ngaweme chomene mu charu. Ŵakhare mu chigaŵa cha Gosheni. Usange ukuŵamanya ŵanji mwa iwo awo ndi nkhwantha pa vyakuŵeta, uŵimike kuti ŵaliskenge vyakuŵeta vyane.”

⁷Penepapo Yosefe wakatora ŵawiske na kuruta nawo panthazi pa Faro, ndipo Yakhobe wakamutumbika Faro.

⁸Sono Faro wakamufumba Yakhobe wakati, “Muli na virimika vilinga?”

⁹Yakhobe wakati kwa Faro, “Virimika vya umoyo wane wakuyingayinga vili 130. Ndi virimika vichoko na vya suzgo, ndipo vindafikepo pa virimika vya umoyo wa ŵasekuru ivyo ŵakayingayingira mu charu.”

¹⁰Ndipo Yakhobe wakati wamutumbikaso Faro, wakamulayira na kufumapo.

¹¹Yosefe wakamurongora wiske na ŵana ŵanyakhe malo ghakukharapo. Wakaŵapa malo ghaweme kwakuruska mu charu cha Eguputo, mu chigaŵa cha Ramesesi, nga ndi umo wakalangulira Faro.

¹²Yosefe wakapereka vyakurya ku wiske ŵakhe na ku ŵana ŵanyakhe, ndiposo na ku wose ŵa mu mbumba ya ŵawiske, kwakuyana na umo ŵakakhumbiranga.

¹³Sono kukaŵavye vyakurya mu charu chose chifukwa njara yikaŵa yikuru chomene. Ntheura ŵanthu ŵa mu Eguputo na ŵa ku Kanani ŵakasokwa chomene chifukwa cha njara.

¹⁴Yosefe wakawunjika ndarama zose izo zikasangika ku Eguputo na ku Kanani pakuguliska vyakurya, ndipo wakiza nazo ku nyumba ya Faro.

¹⁵Para ŵanthu ŵa ku Eguputo na ŵa ku Kanani ndarama zose zikaŵamalira, ŵaEguputo wose ŵakiza kwa Yosefe wakati, “Tipani vyakurya. Kasi tifwirengechi imwe mukuwona? Ndarama zithu zamara.”

¹⁶Sono Yosefe wakati, “Para ndarama zinu zamara, perekani vyakuŵeta vyinu, kuti tisinthiskane na vyakurya.”

¹⁷Ntheura ŵakiza na mberere na mbuzi zawo kwa Yosefe, ndipo Yosefe wakaŵapa vyakurya pakusinthiskana na mahachi, mberere na mbuzi, ng'ombe, ndiposo na mbunda. Chirimika chira wakaŵapa vyakurya pakusinthiskana na vyakuŵeta vyawo vyose.

¹⁸Para chikamara chirimika chira, ŵanthu ŵara ŵakizaso kwa iyo ŵakati, “Tikwenera kumubisani chara sekuru withu kuti ndarama zithu pamoza na vyakuŵeta vyithu wuwo, vyamara. Nga ndi umo mukuwonera waka, kulije kukharaso kanthu kuti timupani, kweni mathupi ghithu na minda yithu ndipera.

¹⁹Kasi ise tifwirengechi imwe mukuwona, ise pamoza na minda yithu. Mutigule ise pamoza na minda yithu kuti tisange chakurya. Ise tiŵenge ŵazga ŵa Faro ndipo iyo wati watore minda yithu kuŵa yakhe. Mutipe mbuto kuti tikhare ŵamoyo, tireke kufwa, na kuti minda yireke kuŵa mapopa.”

²⁰Ntheura Yosefe wakamugulira Faro charu chose cha Eguputo. ŴaEguputo wose ŵakaguliska minda yawo pakuti njara yira yikaŵa yikuru kwa iwo. Ntheura charu chose chikazgoka kuŵa cha Faro.

²¹Yosefe wakaŵazgora ŵanthu ŵara kuŵa ŵazga mu charu chose cha Eguputo.

²²Charu cha ŵasofi pera ndicho wakachigula chara, chifukwa Faro wakaŵapanga chigaŵa chakupimika cha vyakurya, ivyo ŵakapokeranga kuti ŵaryenge. Ntheura kuti ŵakaguliska charu chawo chara.

²³Sono Yosefe wakati ku ŵanthu, “Muhanya umo ndamugulani imwe na charu chinu, kugulira Faro, sono pokerani mbuto izi, kuti mupande mu minda yinu.

²⁴Pa nyengo ya kuvuna mwizamkumupa Faro chigaŵa chimoza mu vigaŵa vinkhonde pa vyakuvuna vyinu, ndipo vinyakhe vyose vyakukharako ndi vyinu. Vinyakhe mwize kasungeko mbuto ndipo vinyakhe ndi chakurya cha imwe mwaŵene, ŵa mu nyumba zinu ndiposo na ŵana ŵinu.”

²⁵Ndipo iwo ŵakati, “Mwaponoska umoyo withu. Ise tasanga uchizi panthazi pa sekuru withu, ndipo titi tiŵenge ŵazga ŵa Faro.”

²⁶Ntheura Yosefe wakachikhozga kuŵa dango mu charu chose cha Eguputo kuti Faro wapokerenge chigaŵa chimoza mu vigaŵa vinkhonde. Dango ili liripo mpaka sono. Kweni charu cha ŵasofi pera kuti chikaŵa cha Faro chara.

²⁷Ntheura ŵaIsraele wakakhara mu charu cha Eguputo, mu chigaŵa cha Gosheni. Ŵakasambazga chomene, ndipo ŵakababana na kwandana chomene.

²⁸Yakhobe wakakhara mu charu cha Eguputo virimika 17. Ntheura Yakhobe wakakhara 147.

²⁹Sono para wakaŵa pafupi kufwa, wakachema mwana wakhe Yosefe, ndipo wakati kwa iyo, “Usange sono ndasanga uchizi panthazi pako, ŵika woko lako mu nthangalaro zane na kurapa kuti wamkundichitira mwakugomezgeka na mu unenesko. Para ndafwa ureke kwiza kandisunga mu Eguputo.

³⁰Nkhukhumba kuti ukandisunge pamoza na ŵasekuru. Uzakandiyeghe kufuma kuno ku Eguputo, ndipo ukandisunge mu mararo ghawo.” Yosefe wakati, “Ndizamkuchita nga ndi umo mwayowoyera.”

³¹Penepapo Yakhobe wakati, “Rapa kwa ine.” Yosefe wakarapa panthazi pakhe, ndipo Yakhobe wakawonga pakusindamira ku mutu wa chitara chakhe.