Read new_tumbuka_bible Mutendeko 49 Bible Online

Mutendeko 49 - new_tumbuka_bible bible

Mutendeko 49

¹Yakhobe wakachema ŵana ŵakhe ndipo wakati, “Wunganani pamoza, kuti ndimuphalirani ivyo vizamkumuwirani mu mazuŵa agho ghakwiza.

²Imwe ŵana ŵa Yakhobe, wunganani ndipo mupulike, tegherezgani kwa wiskemwe Israele.

³“Rubeni, ndiwe mwana wane wa uŵere, ndiwe nkhongono zane. Ndiwe chipambi chakudanga cha nkhongono zane. Pa wose ndiwe ukuruska mukujikuzga na mu nkhongono zane.

⁴Ndiwe wa mutafu nga ndi mronga wakutura, wizamkuŵa wakuruska pa ŵanyako chara, chifukwa ukagona na muwoli wa chiŵiri wa ŵawuso. Pa ichi ukakazuzga chitara cha ŵawuso.

⁵“Simiyoni na Levi mpha ukuru na unung'una, ŵakugwiriska nchito mahomwa gha nkhondo pakuchita chiwawa.

⁶Ureke kunjirapo pa wupu wawo, we mtima wane, nanga nkhwiza pa ungano wawo, we mzimu wane. Pakuti mu ukari wawo ŵakukoma ŵanthu, mu ulankhasi wawo nkhaŵi ŵakuzidumula misipa.

⁷Ukari wawo utembeke chifukwa ngwakofya chomene, kukwiya kwawo kutembeke chifukwa nkhwa nkhaza. Nditi ndiŵaparanye mu charu cha Yakhobe, na kuŵambininiska mukati mu ŵaIsraele.

⁸“Iwe Yuda ŵana ŵanyako ŵati ŵakurumbe. Ŵarwani ŵako wamkuŵatonda pakuŵaphora singo, ndipo ŵana ŵanyako ŵamkukulambira iwe.

⁹Yuda wali nga ndi mwana wa nkharamu. Iwe mwana wane para wakoma nyama, ukuwereraso uko wangubisama. Iyo wakusindamira pasi na kuwanchama nga ndi nkharamu, ndiposo nga ndi nkharamu yanakazi. Ndi njani wangaŵa na chikanga kuti wamuwuske?

¹⁰Nthonga ya ufumu yiwukengemo mwa Yuda chara, nanga ndi ndodo ya mazaza yamkuwukako ku mphapu yakhe chara, wasuke wize mwenecho, mweneuyo ŵanthu wose ŵamkumupulikira.

¹¹Wakakakirira mbunda yakhe ku mpheska, ndiyo kamwana ka mbunda, wakukakilira ku mpheska iyo njiweme chomene. Malaya ghakhe wakughasuka mu vinyo, munjilira wakhe wakuwusuka mu ndopa za mpheska.

¹²Maso ghakhe ghizamkuchesama na vinyo, mino ghakhe ghizamkutuŵa na mkaka.

¹³“Zebuloni wati wakharenge mu mphepete mwa nyanja. Madowoko ghakhe ghati ghaŵe na malo gha ngaraŵa, mphaka yakhe yamkufika mpaka ku Sidoni.

¹⁴“Isakara ndi mbunda ya nkhongono, iyo yikuwanchama mukati mu ŵakatundu ŵaŵiri.

¹⁵Iyo wakawona kuti malo gha kupumulirapo ngaweme, na kuti charu chikaŵa chakukondweska. Iyo wakakotamiska chiŵegha chakhe kuti wayeghe mphingo, ndipo wakazgoka muzga wakuchita mlimo wakuchichizga.

¹⁶“Dani wati weruzgenge ŵanthu ŵakhe, awo ŵakulingana waka na mafuko ghanyakhe gha Israele.

¹⁷Dani wizamkuŵa nga ndi njoka mu msewu, nga ndi chipiri mu mphepete mwa nthowa, yeneiyo yikuruma vitende vya hachi, mwakuti uyo wagarapo wawe chagada.

¹⁸“Mwe FUMU, ine nkhulindirira chiponosko chinu.

¹⁹“Ŵaskoghi ŵati ŵamuskoghe Gadi, kweni iyo wati waŵazgokere na kuŵachimbizga.

²⁰“Charu cha Ashere chizamkuŵa na vyakurya vya manuni, chizamkuŵa na vyakurya vyakwenera ŵakaronga.

²¹“Nafutali ndi mphoyo yanakazi iyo yafwatulika, yeneiyo yikubaba twana tuweme twakutowa.

²²“Yosefe ndi mpheska yakupambika vipambi, mpheska yakupambika vipambi pafupi na mbwiwi. Minthavi yakhe yikuthazira pa chimati.

²³Ŵarwani ŵakhe ŵakamurotokera na chofyo chikuru, ŵakumuchimbizga uku ŵakumuponyera mivwi.

²⁴Ndipouli uta wakhe ukima nga nga nga, mawoko ghakhe ghakakhwima. Ghakakhwima na mawoko gha Chikurukuru Yura wa Yakhobe, na zina la Mliska, mweneuyo ndi Jarawe la Israele.

²⁵Ndi Chiuta wa ŵawuso, uyo wizamkukovwira, Chiuta Mwenenkhongono zose ndiyo wizamkukutumbika. Wizamkukutumbika na vitumbiko vya kuchanya, vitumbiko vya mu ndimba ivyo vili kusi, vitumbiko vya vyakuŵeta na ŵana.

²⁶Vitumbiko vya ŵawuso nvya nkhongono kuruska vitumbiko vya mapiri gha muyirayira, kuruska viweme vyakufumira mu tumapiri twandanda. Vitumbiko ivi viŵenge pa mutu wa Yosefe, pa chisko cha mweneuyo ŵakapatuliskika pakati pa ŵana ŵanyakhe.

²⁷“Benjamini ndi mphumphi yikari, na mulenje wakurya nyama iyo wakakora, na mise wakugaŵa ivyo wakora.”

²⁸Wose aŵa ndi mafuko 12 ya Israele. Vyeneivi ndivyo wiskewo wakaŵayowoyera pakuŵatumbika, waliyose chitumbiko icho chikumwenerera.

²⁹Sono Yakhobe wakaŵalayizga ŵana ŵakhe wakati, “Ine ndili pafupi kuŵa pamoza na ŵasekuru ŵane ŵakufwa. Mukandisunge pamoza nawo mu mphanji iyo yili mu munda wa Efuroni muHiti.

³⁰Mphanji iyi yili mu munda wa Makipela ku mafumiro gha dazi kwa Mamure, mu charu cha Kanani. Mphanji iyo wakagula ndi Abrahamu kwa Efuroni muHiti pamoza na munda, kuŵa malo ghakusungirako ŵakufwa.

³¹Kwenekura ndiko ŵakasunga Abrahamu pamoza na Sara muwoli wakhe. Yisake pamoza na Rebeka muwoli wakhe nawoso ŵakaŵasunga kwenekura. Kwenekura ndiko nkhaya kasungako na Leya wuwo.

³²Munda na mphanji iyo yili mumo vikagulika ku ŵaHiti.”

³³Para Yakhobe wakamara kulayizga ŵana ŵakhe, wakawezgera malundi ghakhe pa chitara, wakafwa ndipo wakalonda ŵasekuru ŵakhe.