Read new_tumbuka_bible Mutendeko 50 Bible Online

Mutendeko 50 - new_tumbuka_bible bible

Mutendeko 50

¹Penepapo Yosefe wakawa panthazi pa ŵawiske ndipo wakalira chomene na kumufyofyontha.

²Sono Yosefe wakalangulira ŵateŵeti ŵakhe awo ŵakaŵa zing'anga kuti ŵaphakazge thupi la ŵawiske na minkhwara yakukanizga kuvunda. Ntheura ŵateŵeti ŵakhe ŵakaphakazga thupi la Yakhobe.

³Mlimo uwu ukaŵatorera mazuŵa 40 pakuti ndigho ghakukhumbikwa pakuphakazga thupi na minkhwara yakukanizga kuvunda. ŴaEguputo ŵakamulira Yakhobe mazuŵa 70.

⁴Para mazuŵa ghakutengerera ghakamara, Yosefe wakayowoya ku ŵa mu nyumba ya Faro wakati, “Usange ndasanga uchizi panthazi pinu nkhumuŵeyani mundiyowoyere kwa Faro mwakuti wapulike kuti,

⁵‘Para ŵadada ŵakaŵa pafupi kufwa ŵakandirapizga kuti nkhaŵasunge mu dindi ilo ŵakajinozgera mu charu cha Kanani. Ntheura nkhumuŵeyani mundizomerezge kuti ndirute nkhasunge ŵadada. Para ndakaŵasunga ndamkwizaso.’ ”

⁶Faro wakati, “Ruta, ukasunge ŵawuso nga ndi umo ŵakakurapizgira.”

⁷Ntheura Yosefe wakaruta kuya kasunga ŵawiske. Ŵateŵeti wose ŵa Faro, ŵakuruŵakuru ŵa mu nyumba yakhe pamoza na ŵakuruŵakuru wose ŵa mu charu cha Eguputo ŵakaruta pamoza nayo.

⁸Wakarutaso na mbumba yakhe yose ya Yosefe, na mbumba za ŵabali ŵakhe, ndiposo na ŵa mu nyumba ya wiske. Ku chigaŵa cha Gosheni kukakhara waka ŵana ŵawo pera pamoza na mberere na mbuzi ndiposo na ng'ombe.

⁹Ŵasilikari ŵakukwera pa magareta na pa mahachi nawo ŵakaruta. Ukaŵa wumba ukuru chomene.

¹⁰Ŵakati ŵafika pa luwugha lwa Atadi ulo luri ku sirya linyakhe la mronga wa Yorodani, ŵakawuska chitengero chikuru na cha chitima. Wakamulira wiske mazuŵa ghankhonde na ghaŵiri.

¹¹Sono para ŵenecharu cha Kanani ŵakapulika chitengero pa luwugha lwa Atadi ŵakati, “Ichi nchitengero cha chitima chikuru ku ŵaEguputo.” Pa chifukwa ichi malo ghara ŵakaghachema Abelu Mizirayimu,[32] ghali ku sirya linyakhe la mronga wa Yorodani.

¹²Ntheura ŵana ŵa Yakhobe ŵakachita nga ndi umo wiskewo ŵakaŵalayizgira.

¹³Ŵana ŵakhe ŵakamuyeghera ku Kanani, na kumusunga mu mphanji ya mu munda wa Makipela. Mphanji iyi, Abrahamu wakagulira pamoza na munda kwa Efuroni muHiti, ku mafumiro gha dazi kwa Mamure, kuti ghaŵe chiharo chakhe chakusungapo ŵakufwa.

¹⁴Yosefe wakati wamusunga wiske, wakawerera ku Eguputo, pamoza na ŵana ŵanyakhe na wose awo ŵakaruta nayo kuya kasunga wiske.

¹⁵Para ŵana ŵanyakhe na Yosefe ŵakawona kuti wiskewo wafwa, wakati, “Kasi tizamkuchita uli usange Yosefe watitinkha ndipo usange wakukhumba kutiwezgera uheni uwo ise tikamuchitira?”

¹⁶Ntheura ŵakatuma mazgu kwa Yosefe ghakuti, “Ŵachali ŵandafwe ŵawiskemwe, ŵakayowoya mazgu ghakuti,

¹⁷‘Mukati kwa Yosefe: Nkhuŵeya ugowokere ŵana ŵanyakhe uheni wawo uwo ŵakakuchitira.’ Ndipo sono tikumuŵeyani mugowokere kwananga kwa ta ŵateŵeti ŵa Chiuta wa ŵawiskemwe.” Yosefe wakalira masozi para ŵakapulika mazgu agha.

¹⁸Sono ŵana ŵanyakhe ŵakiza panthazi pakhe na kumulambira wakati, “Tiza panthazi pinu nga mbateŵeti ŵinu.”

¹⁹Kweni Yosefe wakati kwa iwo, “Mungopanga! Kasi ine ndili mu malo gha Chiuta?

²⁰Imwe mukaghanaghana kundichitira uheni, kweni Chiuta wakachizgora kuŵa uweme. Wakachichita mwakuti ŵanandi ŵasungilirike ŵamoyo, nga ndi umo ŵaliri muhanya uno.

²¹Sono mungopanga. Ine nditi ndimuleraninge imwe na ŵana ŵinu.” Ntheura ndimo Yosefe wakaŵapanikizgira na kuŵasanguruskira.

²²Yosefe wakakhara ku Eguputo pamoza na ŵa mu mbumba ya wiske. Apo wakafwiranga wakakhara virimika 110.

²³Wakawona ŵana ŵa Efurayimu ŵa muwiro wa chitatu. Ndiposo para ŵana ŵa Makiri, mwana wa Manase, wakababikiranga Yosefe wakaŵakhazika pa chipata chakhe.

²⁴Sono Yosefe wakati ku ŵana ŵanyakhe, “Ndili pafupi kufwa, kweni Chiuta wizamkumupemphurani na kumufumyani mu charu ichi na kumutorerani ku charu icho wakarapa kupereka kwa Abrahamu, kwa Yisake, na kwa Yakhobe.”

²⁵Pamanyuma Yosefe wakaŵaphalira ŵana ŵanyakhe kuti ŵarape, wakati, “Murape kuti para Chiuta wizamkumupemphurani, ndipo mwizakayeghanga viwangwa vyane kufuma kuno na kuwera navyo.”

²⁶Ntheura Yosefe wakafwa wali na virimika 110. Ŵakaphakazga thupi lakhe na minkhwara yakukanizga kuvunda, ndipo ŵakaliŵika mu bokosi ku Eguputo kwenekura.