Read new_tumbuka_bible Mutendeko 7 Bible Online

Mutendeko 7 - new_tumbuka_bible bible

Mutendeko 7

¹FUMU yikati kwa Nowa, “Njira mu ngaraŵa, iwe na mbumba yako yose, chifukwa ndawona kuti, mu muwiro uwu, iwe wekha ndiwe uli murunji panthazi pane.

²Utorepo vinyama vinkhonde na viŵiri vyakuphotoka vya mtundu uliwose ivyo nviŵiriviŵiri, chanarume na chanakazi chakhe, ndipo utoreso pa mtundu uliwose wa vinyama vyambula kuphotoka viŵiriviŵiri, chanarume na chanakazi chakhe.

³Viyuni vya mudera navyo utorepo vinkhonde na viŵiri ivyo nviŵiriviŵiri chanarume na chanakazi kusunga mtundu wawo pa charu chose.

⁴Pakuti mu mazuŵa ghankhonde na ghaŵiri, nditi ndirokweske vura pa charu cha pasi mazuŵa 40, muhanya na usiku. Ndipo vyamoyo vyose ivyo nkhavilenga nditi ndivimare pa charu cha pasi.”

⁵Ndipo Nowa wakachita vyose umo FUMU yikalangulira iyo.

⁶Sono Nowa wakaŵa na virimika 600 apo chigumura cha maji chikiza pa charu.

⁷Nowa na ŵana ŵakhe ŵanarume, ndiposo muwoli wakhe na ŵakamwana ŵakhe, ŵakanjira mu ngaraŵa kuchimbira maji gha chigumura.

⁸Mu vinyama vyakuphotoka na vyambula kuphotoka, mu viyuni, na mu vyakukhwaŵa vyose,

⁹viŵiriviŵiri, chanarume na chanakazi, vikanjira mu ngaraŵa pamoza na Nowa, nga ndi umo Chiuta wakamulangulira Nowa.

¹⁰Ghakati ghajumphapo mazuŵa ghankhonde na ghaŵiri maji gha chigumura ghakiza pa charu.

¹¹Apo Nowa wakaŵa na virimika 600, mu mwezi wa chiŵiri, zuŵa la 17 la mwezi, zuŵa leneilo mbwiwi zose za mu ndimba zikuru zikaphumuka, ndipo vidangazi vya mu mtambo vikajurika.

¹²Vura yikarokwa pa charu mazuŵa 40, muhanya na usiku.

¹³Pa zuŵa leneilo vura yikambira, Nowa na ŵana ŵakhe aŵa, Shemu, Hamu, na Yafeti, ndiposo na muwoli wakhe pamoza na ŵakamwana ŵakhe ŵatatu, ŵakanjira mu ngaraŵa.

¹⁴Iwo ŵakanjira na vinyama vyose kwakuyana na mitundu yakhe na nyakhe, vyakuŵeta vyose kwakuyana na mitundu yakhe na yakhe, vyakukhwaŵa vyose kwakuyana na mitundu yakhe na yakhe, na viyuni vyose kwakuyana na mitundu yakhe na yakhe.

¹⁵Vyamoyo vyose ivyo vikaŵa na umoyo vikanjira viŵiriviŵiri mu ngaraŵa pamoza na Nowa.

¹⁶Vinyama ivyo vikanjira, vikaŵa chanarume na chanakazi cha vyamoyo vyose, ndipo vikanjira nga ndi umo Chiuta wakamulangulira. Pamanyuma FUMU yikamujalira mukati.

¹⁷Chigumura chikarutilira kuŵa pa charu mazuŵa 40 ndipo maji ghakazulirangazuliranga na kunyamura ngaraŵa pachanya. Ngaraŵa yikakwera mpaka pachanya pa charu.

¹⁸Maji ghakatura ghakati waka nyete pa charu, ndipo ngaraŵa yikasewanga pachanya pa maji.

¹⁹Maji ghakatura chomene pa charu mwakuti mapiri ghose ghatali ghakabizgika.

²⁰Maji ghakatura pachanya pa mapiri na kughabenekerera na mamita 7.

²¹Vyamoyo vyose ivyo vikendanga pa charu vikafwa: viyuni, vyakuŵeta, vikoko, vilengiwa vyose ivyo vikukhwaŵa pa charu, na ŵanthu wose.

²²Vyose ivyo vikaŵa pa mtunda, vyeneivyo vikaŵa na umoyo, vikafwa.

²³Chiuta wakavimara petu vyamoyo vyose ivyo vikaŵa pa charu: ŵanthu, vinyama, vyakukhwaŵa, ndiposo na viyuni vya mudera. Kweni Nowa pera pamoza na wose awo ŵakaŵa nayo mu ngaraŵa ndiwo ŵakakharako.

²⁴Maji ghakakhara pa charu mazuŵa 150.