Read new_tumbuka_bible Mutendeko 8 Bible Online

Mutendeko 8 - new_tumbuka_bible bible

Mutendeko 8

¹Kweni Chiuta wakamukumbuka Nowa na vikoko vyose na vyakuŵeta vyose ivyo vikaŵa nayo mu ngaraŵa. Chiuta wakawuska mphepo kuti yipute pa charu, ndipo maji ghakaphwa.

²Mbwiwi za mu ndimba na vidangazi vya mu mtambo vikajarika. Vura ya kuchanya yikarekeskeka.

³Maji ghakamba kuphwa pachokopachoko pa charu. Ghakati ghajumphapo mazuŵa 150 maji ghara ghakaphwa nadi.

⁴Mu mwezi wa chinkhonde na chiŵiri, pa zuŵa la 17 la mwezi, ngaraŵa yikiza kakhara pachanya pa mapiri gha Ararati.

⁵Maji ghakarutilira kukhira mpaka pa mwezi wa khumi. Sono pa zuŵa lakudanga la mwezi wa khumi ura pachanya pa mapiri pakawoneka.

⁶Ndipo pa umaliro wa mazuŵa 40, Nowa wakajula chidangazi icho wakapanga mu ngaraŵa.

⁷Iyo wakatuma chihoŵe mweneuyo wakendendeka uku na uku ghakasuka maji ghakakamuka pa charu.

⁸Pamanyuma wakatumaso nkhunda kuya kawona usange maji ghaphwa pa charu.

⁹Kweni nkhunda kuti yikasanga apo yikadeka chara ndipo yikawerera kwa iyo mu ngaraŵa pakuti maji ghakaŵa ghachali waka pa charu chose. Ntheura wakafumya woko lakhe, na kuyitora ndipo wakayinjizga mu ngaraŵa.

¹⁰Wakalindizga mazuŵa ghanyakhe ghankhonde na ghaŵiri, ndipo wakatumaso nkhunda kufumira mu ngaraŵa.

¹¹Nkhunda yikiza kwa iyo na mise ndipo mu mlomo wakhe mukaŵa hamba liteta la olive ilo yikapothora. Ntheura Nowa wakamanya kuti maji ghaphwa pa charu.

¹²Wakalindizgaso mazuŵa ghanyakhe ghankhonde na ghaŵiri, ndipo wakatumaso nkhunda. Ndipo kuti yikawereraso kwa iyo chara.

¹³Apo Nowa wakaŵa na virimika 601, mu mwezi wakudanga, zuŵa lakudanga maji ghakakamuka pa charu. Nowa wakawuskapo mtenje pa ngaraŵa, wakalaŵiska, ndipo wakawona kuti pachanya pa charu mphakomira.

¹⁴Mu mwezi wa chiŵiri, pa zuŵa la mwezi, charu chikaŵa chakomira.

¹⁵Penepapo Chiuta wakati kwa Nowa,

¹⁶“Fuma mu ngaraŵa, iwe pamoza na muwoli wako, ŵana ŵako na ŵakamwana ŵako.

¹⁷Ufumiske vyamoyo vyose ivyo vili na iwe, chamoyo cha mtundu uliwose, viyuni, vinyama na vyakukhwaŵa vyose kuti viswane, vibabane na kwandana pa charu.”

¹⁸Ntheura Nowa wakafuma pamoza na ŵana ŵakhe ŵanarume, muwoli wakhe, ndiposo na ŵakamwana ŵakhe.

¹⁹Vinyama vyose, vyakukhwaŵa vyose na viyuni vyose, vyose ivyo vikwenda pa charu, mtundu na mtundu vikafuma mu ngaraŵa.

²⁰Nowa wakazengera FUMU jochero. Wakatorapo pa vinyama na viyuni vyose vyakuryeka ndipo wakapereka sembe zakocha pa jochero.

²¹Ndipo para FUMU yikati yapulika sungu liweme, yikati mu mtima wakhe, “Kuti ndizamkutembaso charu chara chifukwa cha munthu nangauli maghanoghano gha mtima wa munthu ngaheni kufuma ku wanichi wakhe na kutiso ndizamkuvimaraso vyamoyo vyose chara nga ndi umo ndachitira.

²²Umo charu chichali kukhalirira, nyengo zakupandira na za kuvunira, za kuzizima na za kuthukira, za vura na za mphepo, ndiposo na za muhanya na usiku, kuti ziti zimarenge chara.”