Read new_tumbuka_bible 2 Samuele 1 Bible Online

2 Samuele 1 - new_tumbuka_bible bible

2 Samuele 1

¹Sauli wakati wafwa, Davide wakawerako uko wakaya kathereska ŵaAmaleki ndipo wakiza kakhara ku Zikilagi mazuŵa ghaŵiri.

²Pa zuŵa la chitatu, munthu yunji wakiza kwa Davide kufuma ku msasa wa Sauli apo malaya ghakhe ghaparuka ndipo fuvu liri ku mutu wakhe kurongora chitima. Wakati wafika kwa Davide, wakawa pasi na kumuchindika.

³Davide wakamufumba wakati, “Kasi wafuma nkhu?” Iyo wakazgora wakati, “Ndachimbira kufuma ku msasa wa ŵaIsraele.”

⁴Davide wakati kwa iyo, “Kasi kwachitika vichi? Undiphalire.” Munthu yura wakazgora wakati, “Ŵasilikari ŵachimbira ku nkhondo ndipo ŵanandi ŵa iwo ŵakomeka. Sauli na Yonatani mwana wakhe nawo ŵakomeka.”

⁵Davide wakamufumba muwukirano yura kuti, “Kasi iwe wamanya uli kuti Sauli na mwana wakhe Yonatani ŵafwa?”

⁶Iyo wakamuzgora Davide wakati, “Apo nkhajiyenderanga pa Phiri la Gilibowa, nkhawona Sauli wakweghamira pa mukondo wakhe. Magareta gha ŵarwani ŵakhe na awo ŵakaŵa pa mahachi ŵakasendereranga kufupi nayo.”

⁷Wakati wazgoka na kulaŵiska kunyuma zakhe wakandiwona, ndipo wakandichema. Ine nkhamuzgora nkhati, “Ndine pano.”

⁸Sauli wakandifumba kuti, “Kasi iwe ndiwe njani?” Ndipo nkhamuzgora kuti, “Ine ndine muAmaleki.”

⁹Penepapo wakati kwa ine, “Senderera kufupi na ine, undimarizge, chifukwa ndili mu urwirwi ukuru, ndipo ndili pafupi kufwa.”

¹⁰Ntheura nkhasenderera kufupi na iyo na kumukoma pakuti nkhachipima kuti wafwenge pamanyuma pakuwa pasi. Nkhatora mphumphu iyo wakavwara ku mutu wakhe na khoza ilo wakavwara pa woko lakhe ndipo ndiza navyo kwa imwe, sekuru wane.

¹¹Penepapo Davide wakaparura vyakuvwara vyakhe. Ndipo ŵasilikari awo wakaŵa nawo, ŵakachita ntheura pera.

¹²Ŵakatengera na kulira chomene ndipo ŵakaziŵizga vyakurya mpaka na mise, chifukwa cha Sauli na mwana wakhe Yonatani, na ŵaIsraele, ŵanthu ŵa FUMU, pakuti ŵakafwira ku nkhondo.

¹³Davide wakamufumba muwukirano uyo wakiza na uthenga kuti, “Kasi iwe ndiwe wa nkhu?” Iyo wakazgora kuti, “Ine ndine muAmaleki, mwana wa wakupanjwa mu charu chinu.”

¹⁴Davide wakamufumba wakati, “Kasi nchifukwa uli iwe ukareka kuŵa na wofi pakuwuska woko lako na kukoma wakuphakazgika wa FUMU?”

¹⁵Penepapo Davide wakachema yumoza wa ŵasilikari ŵakhe ndipo wakati kwa iyo, “Zanga kuno, umukome uyu!” Ntheura wakamutimba mpaka wakafwa.

¹⁶Penepapo Davide wakati, “Mrandu wakuthiska ndopa uŵe pa iwe wamwene chifukwa na mlomo wako wajipanikizgira kuti ndiwe uli kukoma wakuphakazgika wa FUMU.”

¹⁷Davide wakimba sumu iyi ya chitengero pakulira Sauli na Yonatani mwana wakhe,

¹⁸ndipo wakalangula kuti ŵaYuda, ŵasambizgike sumu iyi.[1] Ndipo sumu iyi yili kulembeka mu Buku la Yashara.[2] Ndipo Davide wakati:

¹⁹“Uchindami winu, Mwe Israele, wagona thambalala mu mapiri ghinu. Okwe! Kasi vinkhara vikufwa ntheura?

²⁰Mureke kuchiyowoya mu Gati, nesi kuchipharazga mu misewu ya Ashikeloni, mzire ŵanakazi ŵa ŵaFilisiti ŵasekerere, ŵanakazi ŵa ŵanthu ŵambula kukotoreka ŵajikuzge.”

²¹“Imwe mapiri gha Gilibowa, pa imwe pareke kuwa jumi panji vura, pa imwe pareke kusangika minda yakupambika vipambi. Pakuti penepara ŵarwani ŵakakazuzga nguru za vinkhara, nguru ya Sauli kuti yikapuputikaso na mafuta chara.

²²Kufuma mu ndopa za ŵakukomeka, kufuma ku mafuta gha vinkhara, uta wa Yonatani kuti wawerako chara, lupanga lwa Sauli kuti lwawerako lwambula kukoma chara.”

²³Sauli na Yonatani, ŵakaŵa ŵakutemweka na ŵaweme. Mu umoyo na mu nyifwa, kuti ŵakapatukana chara. Ŵakaŵa ŵa luŵiro kuruska nombo. Ŵakaŵa ŵankhongono kuruska nkharamu.

²⁴Imwe ŵaIsraele, mutengererani Sauli, uyo wakamuvwarikani viswesi na vya mtengo wapatali, mweneuyo wakatoweska malaya ghinu na vitoweskero vya golide.

²⁵Okwe! Kasi vinkhara vikufwa ntheura mukati mu nkhondo? Yonatani wali thambalala, wakomeka mu mapiri ghinu.

²⁶Yonatani wa munyane, ndili na chitima na iwe, wanguŵa munyane chomene iwe. Kutemwa kwako kwa ine kukaŵa kwakuzukumiska, kuruska kutemwa kwa ŵanakazi.

²⁷Okwe! Kasi vinkhara vikufwa ntheura, mahomwa gha nkhondo ghaparanyika?