Read new_tumbuka_bible 2 Samuele 10 Bible Online

2 Samuele 10 - new_tumbuka_bible bible

2 Samuele 10

¹Pamanyuma pa ichi, yikati yarutapo nyengo karonga wa ŵaAmoni wakafwa ndipo Hanuni mwana wakhe ndiyo wakamba kuwusa.

²Ndipo Davide wakati, “Nditi ndiŵe wakugomezgeka kwa Hanuni mwana wa Nahashi nga ndi umo wiske wakaŵira wakugomezgeka.” Ntheura Davide wakatuma ŵateŵeti ŵakhe kuti ŵakamukhuze Hanani chifukwa cha nyifwa ya ŵawiske. Para nduna za Davide zikafika mu charu cha ŵaAmoni,

³nduna za ŵaAmoni zikati kwa Hanuni, sekuru ŵawo, “Kasi mukughanaghana kuti Davide wakuchindika ŵawiskemwe pakutuma ŵanthu kwiza kamukhuzani? Asi Davide watuma kuti ŵizakawone msumba, ŵawuskore ndipo pamanyuma ŵawupankhure!”

⁴Pa chifukwa ichi Hanuni wakakora nduna za Davide zira na kuzimeta myembe yawo kurwande, na kudumula pakati malaya ghawo mpaka mu chiuno ndipo wakaziwezga.

⁵Para Davide wakaphalirika vya ichi wakatuma ŵanthu kuti wa ŵacheme mwakuti wakumane nawo pakuti ŵateŵeti ŵara ŵakaŵa na soni chomene. Penepapo karonga wakati, “Kharani mu msumba wa Yeriko yisuke myembe yinu yikureso, sono ndipo mwizenge kwa ine.”

⁶Para ŵaAmoni ŵakati ŵamanya kuti ŵamukalipiska chomene Davide, ŵakatuma ŵanthu kuti ŵakalembe ŵasilikari ŵa ganyu kufuma ku Siriya Beti Rehobu na Siriya Zoba, ŵakukwana 20,000 ŵakwenda pasi. Wakalembaso Karonga Maaka na ŵasilikari ŵakhe ŵakukwana 1,000 ndiposo na ŵasilikari 12,000 ŵakufuma ku Tobu.

⁷Para Davide wakapulika ichi, wakatuma Yowabu na ŵasilikari wose pamoza na vinkhara vya nkhondo.

⁸Ndipo ŵaAmoni ŵakafuma na kundandika ŵasilikari ŵawo pa muryango wa chipata cha ku msumba. Kweni ŵasilikari ŵa ganyu ŵa ku Siriya Zoba na Rehobu, ndiposo na awo ŵakafuma ku chigaŵa cha Tobu na kwa Karonga Maaka ŵakaŵa pa ŵekha ku thondo.

⁹Para Yowabu wakawona kuti ŵarwani ŵakhe ŵali kunthazi zakhe na kumanyuma kwakhe, wakasorapo vinkhara vya kumanya nkhondo kufuma mu ŵaIsraele kuti ŵarwe na ŵaSiriya.

¹⁰Ŵasilikari ŵakhe ŵanyakhe wakaŵaŵika pasi pa urongozgi wa Abishayi munung'una wakhe kuti ŵarwe na ŵaAmoni.

¹¹Yowabu wakati kwa Abishayi, “Usange ŵaSiriya ŵaŵenge ŵankhongono kuruska ine, wize kuti wizakandovwire. Kweni usange ŵaAmoni ŵaŵenge ŵankhongono kuruska iwe, nditi ndizenge kuti ndizakakovwira.

¹²Tikhwime mtima, ndipo tiye tirwe nkhondo mwa nkhongono chifukwa cha ŵanthu ŵithu na misumba ya Chiuta. FUMU yekha ndiyo yiti yichite icho nchiweme kwa iyo.”

¹³Ntheura Yowabu na ŵasilikari awo wakaŵa nawo ŵakasenderera kufupi kuti ŵarwe nkhondo na ŵaSiriya ndipo ŵaSiriya ŵakachimbira panthazi pawo.

¹⁴Para ŵaAmoni ŵakawona kuti ŵaSiriya ŵakuchimbira, nawoso ŵakachimbira panthazi pa Abishayi na kukwerera mu msumba. Penepapo Yowabu wakawerako uko wakarwanga na ŵaAmoni ndipo wakawerera ku Yerusalemu.

¹⁵Para ŵaSiriya ŵakawona kuti ŵathereskeka na ŵaIsraele, ŵakawunganya ŵasilikari ŵawo wose.

¹⁶Ndipo Karonga Hadadezere ŵakatuma ŵanthu kuti ŵakaŵatore ŵaSiriya awo ŵakaŵa ku sirya linyakhe la mronga wa Yufurate. Ndipo ŵakaya kafika ku msumba wa Helamu pamoza na Shobaki, murongozgi wa ŵasilikari ŵa Karonga Hadadezere, uyo wakaŵadangirira.

¹⁷Para Davide wakapulika za ichi, wakaŵawunganya pamoza ŵasilikari ŵakhe wose, na kwambuka mronga wa Yorodani ndipo wakafika ku msumba wa Helamu. Ndipo ŵaSiriya wakandandika ŵasilikari ŵawo kuti ŵarwe nkhondo na Davide. Ntheura nkhondo yikambika.

¹⁸Kweni ŵaSiriya, ŵakaŵachimbira ŵaIsraele. Penepapo Davide wakakomapo ŵasilikari ŵakwendeska magareta ŵakukwana 700 na ŵakukwera mahachi ŵakukwana 40,000. Shobaki murongozgi wa ŵasilikari ŵa Hadadezere ŵakamupweteka chomene ndipo wakafwira penepara.

¹⁹Para ŵakaronga wose awo ŵakateŵeteranga Karonga Hadadezere ŵakawona kuti ŵathereskeka na ŵaIsraele, ŵakapangana vya mutende na ŵaIsraele ndipo ŵakazgoka ŵazga ŵawo. Ntheura ŵaSiriya nawo ŵakopa kuŵavwiraso ŵaAmoni.