Read new_tumbuka_bible 2 Samuele 11 Bible Online

2 Samuele 11 - new_tumbuka_bible bible

2 Samuele 11

¹Chirimika chinyakhe mu nyengo ya nyambwani, apo ŵakaronga ŵakarutiranga kuya karwa nkhondo, Davide wakatuma Yowabu pamoza na nduna zakhe na ŵasilikari wose ŵaIsraele kuya karwa na ŵaAmoni. Iwo ŵakaŵakoma ŵaAmoni na kuwuzingirizga msumba wa Raba. Kweni Davide wakakhara mu Yerusalemu.

²Zuŵa limoza, nyengo ya ku na mise, Davide wakawuka kufuma pa chitengo apo wakapumulanga ndipo wakamba kwenda pachanya pa mtenje wa nyumba ya ufumu. Kufuma pa mtenje para, wakawona mwanakazi wakutowa chomene wakugeza.

³Ntheura Davide wakatuma munthu kuti wakafumbe vya mwanakazi yura. Munthu yura wakati, “Asi uyu ndi Batisheba mwana mwanakazi wa Eliyamu ndipo muwoli wa Uriya muHiti?”

⁴Penepapo Davide wakatuma nthumi ndipo zikaya kamutora. Ndipo mwanakazi yura wakati wiza, karonga wakagona nayo. (Mwanakazi uyu wakaŵa kuti wajitozga waka ku mwezi wakhe.) Pamanyuma mwanakazi yura wakawerera ku nyumba yakhe.

⁵Mwanakazi uyu wakatora nthumbo ndipo wakatuma mazgu kwa Karonga Davide ghakuti, “Ndili na nthumbo.”

⁶Penepapo Davide wakatuma mazgu kwa Yowabu wakati, “Unditumire Uriya muHiti kuti wize kuno ku Yerusalemu ku nyumba ya ufumu. Ndipo Yowabu wakamutuma Uriya kwa Davide.”

⁷Para Uriya wakiza, Davide wakamufumba za umoyo wa Yowabu na ŵasilikari wose ndipo na umo nkhondo yikenderanga.

⁸Penepapo Davide wakati kwa Uriya, “Rutanga ku nyumba yako kuti ukageze malundi ghako.” Ntheura Uriya wakafumako ku nyumba ya ufumu, ndipo pamanyuma karonga wakumutumira chawanangwa.

⁹Kweni Uriya kuti wakarutako ku nyumba yakhe chara, kweni wakagona pa muryango wa nyumba ya ufumu pamoza na ŵateŵeti wose ŵa sekuru wakhe.

¹⁰Ndipo ŵakati ŵamuphalira Davide kuti Uriya wakarutako ku nyumba yakhe chara, Davide wakati kwa Uriya, “Asi iwe wafuma ku ulendo utali, sono kasi nchifukwa uli undarute ku nyumba yako?”

¹¹Uriya wakamuzgora Davide wakati, “Bokosi la Phangano, ŵaIsraele na ŵaYuda ŵali mu misasa. Sekuru wane Yowabu na ŵanthu ŵa FUMU yane ŵali ku thengere. Kasi ine ndingaruta uli ku nyumba yane kuti nkharye na kumwa na kugona na muwoli wane? Nadi nkhurapa, ine kuti ndingachita chinthu cha ntheura chara!”

¹²Penepapo Davide wakati kwa Uriya, “Utandareso papano muhanya uno ndipo na machero nditi ndikuzomerezge kuti urutenge ku nkhondo.” Ntheura Uriya wakatandara mu Yerusalemu zuŵa lenelira na linyakheso nga ndi umo wakayowoyera karonga.

¹³Ndipo Davide wakamuchema Uriya kuti wakarye na kumwa panthazi pa iyo ndipo wakamumweska vinyo linandi chomene mwakuti wakaloŵera nadi. Na usiku, Uriya wakaruta kuya kagona pa chitara chakhe pamoza na ŵateŵeti ŵa sekuru wakhe, kweni kuti wakarutako ku nyumba yakhe chara.

¹⁴Na machero ghakhe Davide wakalemba karata kuya kwa Yowabu ndipo Uriya ndiyo wakayegha.

¹⁵Mu karata yura wakalemba kuti, “Umuŵike Uriya panthazi pa nkhondo yakofya, ndipo iwe na ŵasilikari ŵanyakhe muwerere nyuma mwakuti walasike na kufwa.”

¹⁶Ntheura para Yowabu wakazingirizga msumba wa Raba wakamuŵika Uriya pa malo apo wakamanya kuti pali vinkhara virwani vyakofya.

¹⁷Ŵasilikari ŵaAmoni ŵakafuma mu msumba kuti ŵarwe na Yowabu, ndipo ŵasilikari ŵanji ŵa Davide ŵakakomeka. Uriya muHiti nayoso wakakomeka.

¹⁸Penepapo Yowabu wakatuma uthenga kwa Davide kumuphalira vyose umo nkhondo yikaŵira.

¹⁹Wakaphalira thenga lira kuti, “Para wamara kumuphalirani karonga makani ghose gha nkhondo,

²⁰karonga wangakakwiya ndipo wangakafumba kuti, ‘Kasi nchifukwa uli mukasenderera kufupi chomene na msumba kuti murwe nkhondo? Kasi mukamanya chara kuti ŵangamulasani na mikondo kufumira mu linga?

²¹Kasi ndi njani wakakoma Abimeleki mwana wa Gidiyoni? Asi ndi mwanakazi uyo wakamukoma pakumuponyera lwara kufumira mu linga mwakuti wakafwira ku msumba wa Thebezi. Kasi mukasendererachi kufupi na linga?’ Ntheura iwe ukazgore kuti, ‘Muteŵeti winu Uriya muHiti nayo wali kufwa.’ ”

²²Ntheura thenga lira likaruta ndipo likati lafika likamuphalira Davide vyose ivyo Yowabu wakalituma kuti likaphare.

²³Thenga likati kwa Davide, “Ŵarwani ŵithu ŵakatiruskanga, ndipo ŵakafuma kwiza karwa nase mu thengere, kweni tikaŵawezgera nyuma mpaka tikaya kaŵafikiska pa muryango wa chipata cha msumba.

²⁴Penepara ŵamauta ŵakaponya mivwi yawo kwa ise kufumira mu linga ndipo ŵasilikari ŵanji ŵa karonga ŵakakomeka. Ndiposo muteŵeti winu Uriya muHiti nayo wali kufwa.”

²⁵Davide wakati kwa thenga lira, “Ukamuphalire Yowabu kuti makani agha ghareke kumusuzga pakuti nkhondo ndimo yiliri. Nyengo yinyakhe mpaka ŵasilikari ŵafwe mu nkhondo. Kweni iwe khozga nkhondo yako pakulimbana na msumba mpaka uwupoke. Ntheura ndimo ukwenera kumukhwimiskira Yowabu.”

²⁶Para Batisheba muwoli wa Uriya wakapulika kuti mufumu wakhe wali kufwa, wakamulira chomene.

²⁷Yikati yamara nyengo ya kutengerera nyifwa yira, Davide wakatuma ŵanthu kuti ŵakamutore Batisheba kwiza nayo ku nyumba ya ufumu. Davide wakamutora kuŵa muwoli wakhe. Iyo wakamubabira Davide mwana mwanarume. Kweni chinthu icho wakachita Davide kuti chikakondweska FUMU chara.