Read new_tumbuka_bible 2 Samuele 13 Bible Online

2 Samuele 13 - new_tumbuka_bible bible

2 Samuele 13

¹Abisalomu, mwana wa Davide wakaŵa na mudumbu wakhe wakutowa chomene zina lakhe Tamara. Ndipo pakati pajumphapo kanyengo, Amunoni uyo nayo wakaŵa mwana wa Davide wakamutemwa chomene Tamara, mudumbu wakhe.

²Amunoni wakasuzgika chomene mu mtima mwakuti wakajirwariska chifukwa cha kumukhumbiska Tamara, mudumbu wakhe. Pakuti wakaŵa mwali wakulangwa, chikamuŵira chinonono chomene Amunoni kuti wachite chilichose kwa Tamara.

³Sono Amunoni wakaŵa na mubwezi wakhe muryarya chomene zina lakhe Yehonadabu, mwana wa Shimeya, mwana munyakhe wa Davide.

⁴Ndipo iyo wakati kwa Amunoni, “Iwe mwana wa karonga, kasi ukuwonekerachi wakughanda mulenje uliwose? Kasi ungandiphalira chara icho chasuzga?” Amunoni wakazgora wakati, “Ine nkhumutemwa Tamara mudumbu wa munung'una wane Abisalomu.”

⁵Yehonadabu wakati kwa iyo, “Ugone pa chitara ndipo uwoneke nga ndi para warwara. Para ŵawuso ŵakwiza kuti wiza kakuwone, uŵaphalire kuti, ‘Nkhumurombani ŵadada, mumuzomerezge mudumbu wane Tamara kuti wize na kundipa chakurya. Ndipo wakwenera kuphikira chakurya kwenekuno ine ndimuwonenge ndipo ndiryenge kufumira mu mawoko ghakhe.’ ”

⁶Ntheura Amunoni wakagona pasi, wakaŵa nga ndi para warwara. Karonga Davide wakaruta kuya kamuwona, ndipo Amunoni wakati kwa iyo, “Nkhumurombani, mumuzomerezge Tamara mudumbu wane kuti wize na kundiphikira vingwa vipapati uku ine nkhumuwona ndipo ine ndirye kufumira mu mawoko ghakhe.”

⁷Penepapo Davide wakatuma mazgu ku nyumba ya ufumu kuya kamuphalira Tamara kuti, “Urute ku nyumba ya mudumbu wako Amunoni kuti ukamuphikire chakurya.”

⁸Ntheura Tamara wakaruta ku nyumba ya Amunoni mudumbu wakhe ndipo wakamusanga kuti wagona pasi. Wakatora ufu na kuwukonkhakonkha ndipo wakawumba vingwa vipapati uku Amunoni wakuwona na kuviphika.

⁹Wakaphura vingwa vipapati vira na kumukhazikira kuti warye. Kweni Amunoni wakakana kuti warye. Ndipo wakalangula kuti munthu waliyose mu nyumba wafume. Ntheura ŵakafumamo.

¹⁰Penepapo Amunoni wakati kwa Tamara, “Zanga navyo kuno ku chipinda chane vingwa vipapati ivyo mwakuti ndirye kufumira mu woko lako.” Ntheura Tamara wakatora vingwa vipapati vira wakaphika na kuruta navyo ku chipinda cha mudumbu wakhe Amunoni.

¹¹Kweni apo wakamutoreranga vingwa vipapati vira kuti warye wakamukora Tamara ndipo wakati, “Wa mudumbu wane, zanga ugone pamoza na ine.”

¹²Kweni Tamara wakazgora Amunoni kuti, “Chara! Mudumbu wane. Ureke kundichichizga, pakuti chinthu cha ntheura chindachitikepo chara mu Israele. Ungachitanga chinthu cha kupusa ichi.

¹³Ndipo ine nane, kasi ndingafyulira nkhu soni zane. Ndipo iwe nawe uti uŵenge yumoza wa vindere ivyo vikujichitira bweka mu Israele. Ntheura sono, nkhukuromba uyowoye ichi kwa karonga pakuti nadi kuti wakanenge chara kuti ine nditengwe kwa iwe.”

¹⁴Kweni kuti wakakhumba kumupulikira chara. Sono iyo pakuŵa wankhongono kuruska mudumbu wakhe, wakamuchichizga ndipo wakamugona.

¹⁵Penepapo Amunoni wakamutinkha Tamara na tinkho likuru chomene. Nadi tinkho lakhe likaŵa likuru chomene kuruska chitemwa icho wakaŵa nacho pa iyo. Ntheura wakati, “Wuka, rutanga.”

¹⁶Ndipo Tamara wakati kwa Amunoni, “Chara! Mudumbu wane, kundichimbizga ine, nkhuheni chomene kuruska uheni unyakhe uwo wachita nane kale.” Kweni Amunoni wakakana kumupulika Tamara.

¹⁷Ndipo wakachema munyamata wakhe uyo wakamuteŵeteranga na kuti kwa iyo, “Mufumyapo mwanakazi uyu panthazi pane, ndipo upiringizge ku muryango para wafumamo.”

¹⁸Ntheura muteŵeti wakhe wakamufumyamo mu nyumba na kupiringizgako ku muryango. Pa nyengo iyi, Tamara wakavwara munjilira utali wa mawoko ghatali wa maŵangamaŵanga pakuti ntheura ndimo ŵakavwaliranga ŵa mwali ŵakulangwa ŵakaronga.

¹⁹Tamara wakajithira vyoto ku mutu wakhe na kuparura munjilira wakhe utali ura wakavwara. Ndipo wakaŵika mawoko ghakhe ku mutu na kuruta uku wakulira chomene.

²⁰Para mudumbu wakhe Abisalomu wakamuwona, wakafumba wakati, “Kasi Amunoni mudumbu wako wanguŵa na iwe? Chetama waka, mudumbu wane, iyo ndi mudumbu wako ureke kuchiŵika ku mtima chinthu ichi.” Ntheura Tamara wakakhara wakuzimbwa yekha na yekha mu nyumba ya Abisalomu.

²¹Para Karonga Davide wakapulika icho Amunoni wakachita kwa Tamara, wakakaripa chomene.[8]

²²Abisalomu kuti wakayowoyapo chilichose chiweme panji chiheni chara pakuti wakamutinkha Amunoni chifukwa mwakumuchichizga wakamugona Tamara mudumbu wakhe.

²³Pakati pajumphapo virimika viŵiri Abisalomu wakaŵa na ŵakusenga maweya gha mberere zakhe ku Phiri la Baala Hazoro pafupi waka na charu cha Efurayimu, ndipo Abisalomu wakachema ŵana wose ŵanarume ŵa karonga kuti wize kwenekura.

²⁴Abisalomu wakiza kwa karonga ndipo wakati kwa iyo, “Nda muteŵeti winu ndili na mlimo wakusenga maweya gha mberere. Nkhuromba kuti imwe karonga pamoza na ŵateŵeti winu mwizakaŵepo.”

²⁵Karonga wakazgora wakati, “Chara, mwana wane kuti tose tikwenera kwiza chara mzire tiŵe ŵanandi na kukuvuska.” Nangauli Abisalomu wakamukoserezga, karonga kuti wakakhumba kuruta chara, kweni wakamutumbika waka.

²⁶Ndipo Abisalomu wakati, “Usange imwe mwizengeko chara, nkhumuŵeyani kuti Amunoni, mukuru wane warute pamoza nane.” Karonga wakafumba wakati, “Nchifukwa uli Amunoni wakwenera kuruta pamoza nawe!”

²⁷Kweni Abisalomu wakarutilira kukoserezga karonga mpaka wakazomerezga kuti Amunoni warute pamoza na ŵana ŵanarume wose ŵa karonga.

²⁸Ndipo Abisalomu wakalangula ŵateŵeti ŵakhe wakati, “Mukhazge, para mukuwona Amunoni wakondwa chomene na vinyo ndipo para ine nkhuti, ‘Komani Amunoni,’ mukomani waka. Mungopanga chara. Asi ine ndine ndamulangulani? Ntheura mukhwime mtima na kuŵa na chikanga.”

²⁹Ntheura ŵateŵeti ŵa Abisalomu wakachita kwa Amunoni nga ndi umo wakaŵalangulira. Penepapo ŵana wose ŵa karonga ŵakawuka na kukwera pa mbunda zawo na kuchimbira.

³⁰Apo ŵana ŵara ŵakaŵa ŵachali mu nthowa uthenga ukafika kwa Davide kuti, “Abisalomu wakoma ŵana wose ŵa karonga, ndipo palije na yumoza uyo wakharapo.”

³¹Karonga wakawuka na kuparura vyakuvwara vyakhe na kugona pasi pa dongo. Ŵateŵeti ŵakhe wose awo ŵakimilira pafupi nayo, nawoso ŵakaparura vyakuvwara vyawo.

³²Kweni Yehonadabu mwana wa Shimeya mwana munyakhe wa Davide wakati, “FUMU yane mureke kughanaghana kuti ŵana wose wa karonga wakomeka chara. Amunoni pera ndiyo wakomeka. Ichi chikaŵa chakurata cha Abisalomu kufuma pa nyengo iyo Amunoni wakachichizgira Tamara mudumbu wakhe kuti wagone nayo.

³³Ntheura karonga sekuru wane wareke kughanaghana na vya uthenga uwu wakuti ŵana wose ŵa karonga ŵafwa. Amunoni pera ndiyo wafwa.”

³⁴Pa nyengo iyo Abisalomu wakaŵa wachimbira. Ndipo musilikari uyo wakalindanga msumba wakinuska maso ghakhe ndipo wakawona ŵanthu ŵanandi ŵakizanga kufumira ku msewu wakuya ku msumba wa Horonayimu. Musilikari yura wakaruta kuya kamuphalira karonga kuti, “Nkhuwona ŵanthu ŵanandi ŵakwiza kufumira ku msewu wa kuya ku msumba wa Horonayimu mphepete mwa phiri.”

³⁵Yehonadabu wakati kwa karonga, “Wonani ŵana ŵinu ŵakuwerera ku kaya. Chaŵa nga ndi umo ine nkhayowoyera kuti ŵizenge.”

³⁶Apo wakamaranga kuyowoya, ŵana ŵakafika uku ŵakulira chomene. Karonga pamoza na ŵateŵeti ŵakhe wose nawo ŵakalira chomene.

³⁷Kweni Abisalomu wakachimbilira kwa Talimayi, mwana wa Amihudi karonga wa charu cha Geshuru. Davide wakamutengerera mwana wakhe Amunoni zuŵa na zuŵa.

³⁸Abisalomu wakati wachimbilira ku charu cha Geshuru, wakakhara kwenekura virimika vitatu.

³⁹Karonga Davide wakati wasanguruskika na nyifwa ya Amunoni, wakanweka chomene kuti warute kuya kamuwona Abisalomu.