Read new_tumbuka_bible 2 Samuele 14 Bible Online

2 Samuele 14 - new_tumbuka_bible bible

2 Samuele 14

¹Yowabu mwana wa Zeruya wakamanya kuti karonga wakanwekanga kuti wawone Abisalomu.

²Ntheura Yowabu wakatuma munthu kuruta ku Tekowa kuti wakapenjeko mwanakazi wa vinjeru. Wakati wamusanga, wakiza nayo, ndipo Yowabu wakati ku mwanakazi yura, “Upusikizgire, uŵe nga ndi wakutengera nyifwa. Uvware malaya gha pa nyifwa ndipo ureke kujiphaka mafuta, kweni uŵe nga ndi mwanakazi uyo wanguŵa mu kulira nyifwa mazuŵa ghanandi chomene.

³Sono urute kwa karonga ndipo ukayowoye ntheura kwa iyo.” Ndipo Yowabu wakamuphalira mwanakazi yura mazgu agho wakenera kuyowoya.

⁴Mwanakazi wa Tekowa yura wakaruta ndipo wakati wafika kwa karonga, wakawa kavunama na kumulambira ndipo wakati, “Mundovwire, mwe karonga.”

⁵Karonga wakafumba wakati, “Kasi nchivichi icho chikukusuzga.” Mwanakazi yura wakazgora wakati, “Ndine chokoro. Mufumu wane wali kufwa.

⁶Muteŵeti-kazi winu wakaŵa na ŵana ŵanarume ŵaŵiri, ndipo ŵana aŵa ŵakaŵa ku thondo na kwamba kutimbana, kweni pakaŵavye na yumoza wakuŵathaska. Yumoza wakatimba munyakhe mpaka wakafwa.

⁷Ntheura sono mbumba yose yawukira muteŵeti-kazi winu ndipo ŵakuti, ‘Utipe mwana uyo wakoma mwana munyakhe mwakuti ise timukome, kuwezgera nduzga umoyo wa mwana munyakhe uyo wakamukoma. Ntheura titi tikome na muhaliri wuwo.’ Penepapo ŵati wazimyirethu mwana yumoza uyo wakharako kwambula kumurekerapo mufumu wane zina panji mubali kufuma mu mbumba yakhe pano pa charu.”

⁸Penepapo karonga wakati kwa mwanakazi yura, “Rutanga ku nyumba yako ndipo ine nditi ndipereke languro lane pa makani agha.”

⁹Mwanakazi wa ku Tekowa yura wakati kwa karonga, “Mwe karonga sekuru wane, mrandu uwu uŵe pa ine na pa nyumba ya ŵadada, ndipo karonga na chizumbe viŵenge vyambula mrandu.”

¹⁰Ndipo karonga wakati, “Usange munthu yunji wakuyowoya chilichose chiheni kwa iwe, wize nayo kwa ine ndipo kuti wati wakusuzgengeso chara.”

¹¹Mwanakazi wakati, “Nkhumuŵeyani karonga kuti murapire mwa FUMU, Chiuta winu kuti mukanizge munthu uyo wakukhumba kuwezgera nduzga pakuthiska ndopa pa mwana wane mwakuti waŵe na umoyo chifukwa pakuchita ntheura wati waŵe na mrandu ukuru.” Ndipo karonga wakati, “Nkhurapira mwa FUMU Chiuta kuti nanga ndi kasisi kamoza ka ku mutu wa mwana wako, kuti kati katayike pasi chara.”

¹²Penepapo mwanakazi yura wakati, “Nkhumuŵeyani zomerezgani muteŵeti winu kuti wayowoye lizgu limoza pera kwa karonga sekuru wane.” Davide wakati, “Yowoya.”

¹³Ndipo mwanakazi wakati, “Kasi nchifukwa uli mwanozgera kuchita chinthu cha ntheura pa ŵanthu ŵa Chiuta? Pakuti pakuŵa na udumuliro wa ntheura karonga wakujipa mrandu iyo yekha pakureka kuwezgerapo mwana wakhe uyo wali kuchimbizgika.

¹⁴Tose tifwenge, tili nga ndi maji ghakuthikira pasi agho kuti ghangawunjikika chara. Chiuta nayo kuti wakukoma umoyo wa munthu chara, iyo wakunozgera nthowa mwakuti uyo wachimbizgika wareke kutayikirathu, kweni wamuwezge.

¹⁵Sono ine ndiza kuti ndiyowoye ichi kwa karonga sekuru wane chifukwa ŵanthu ŵandofya. Muteŵeti-kazi winu wangughanaghana kuti para wangayowoya kwa karonga wati wachite icho muteŵeti-kazi wakhe wakuromba.

¹⁶Muteŵeti-kazi winu wangughanaghana kuti karonga wati wandipulika na kundithaska kwa uyo wakukhumba kundikoma ine pamoza na mwana wane na kutiwuskapo mu charu icho Chiuta wali kupereka kwa ise.

¹⁷Ntheura muteŵeti-kazi winu wakuti, ‘Mazgu gha karonga sekuru wane ghati ghandipumuzge pakuti karonga, sekuru wane, wali nga ndi mungelo wa Chiuta kumanya uweme na uheni. FUMU, Chiuta winu waŵe namwe.’ ”

¹⁸Penepapo karonga wakazgora mwanakazi yura wakati, “Ungandibisanga chilichose pa icho nditi ndikufumbe.” Mwanakazi yura wakati, “Yowoyani karonga, sekuru wane.”

¹⁹Karonga wakafumba mwanakazi yura wakati, “Kasi Yowabu wali pamoza na iwe pa makani agha?” Mwanakazi wakazgora wakati, “Nkhurapa nadi, karonga sekuru wane. Ine kuti ndingakana chara pa icho karonga sekuru wane wayowoya. Nadi ndi muteŵeti winu Yowabu uyo wakandilangula kuti ndichite ichi ndipo iyo wakandiphalira mazgu ghose agha kuti ndiyowoye kwa imwe.

²⁰Muteŵeti winu Yowabu ndiyo wakachita ichi kuti vinthu visinthike ntheura. Kweni sekuru wane ngwa vinjeru nga ndi vya mungelo wa Chiuta kumanya vinthu vyose ivyo vili mu charu.”

²¹Penepapo karonga wakati kwa Yowabu, “Nchiweme ndazomerezga. Ruta ukamutore munyamata Abisalomu na kwiza nayo kuno.”

²²Yowabu wakawa kavunama na kumulambira ndipo wakamutumbika karonga. Yowabu wakati, “Muhanya uno, muteŵeti winu wamanya kuti wasanga uchizi panthazi pinu, imwe karonga sekuru wane, chifukwa karonga wazomerezga pempho la muteŵeti wakhe.”

²³Ntheura Yowabu wakuwuka kuruta ku charu cha Geshuru kuya katora Abisalomu na kwiza nayo ku Yerusalemu.

²⁴Ndipo karonga wakati, “Mureke wakhare pa yekha mu nyumba yakhe na yakhe, wareke kwiza panthazi pane.” Ntheura Abisalomu wakakhara mu nyumba yakhe na yakhe, ndipo kuti wakizapo panthazi pa karonga chara.

²⁵Sono mu charu chose cha Israele mukaŵavye munthu na yumoza wakurumbika mukutowa kwakhe nga ndi Abisalomu. Iyo wakaŵa wakutowa kufuma kusi ku malundi ghakhe mpaka pachanya pa mutu wakhe pakaŵavye nanga nkhachilema kalikose.

²⁶Para wati wamete sisi la ku mutu wakhe pa umaliro wa chirimika chilichose, pakuti wakazgoŵera kumeta para wakawona kuti lamuŵira lizitu ndipo wakalipimanga pa chakupimira cha ufumu na kusanga kuti liri na uzitu wakukwana mweso wa makilogiramu ghaŵiri.

²⁷Abisalomu wakaŵababa ŵana ŵanarume ŵatatu na mwanakazi yumoza uyo wakamuthya kuti Tamara ndipo wakaŵa wakutowa chomene.

²⁸Sono Abisalomu wakakhara virimika viŵiri mu Yerusalemu kwambula kuwonana na karonga.

²⁹Ntheura Abisalomu wakamuchema Yowabu kuti wize kuti wanozge umo iyo wangawonerana na karonga. Kweni Yowabu kuti wakhumba chara kwiza kwa iyo. Wakamuchemaso kachiŵiri, kweni Yowabu kuti wakhumba chara kwiza.

³⁰Ndipo Abisalomu wakati ku ŵateŵeti ŵakhe, “Wonani munda wa Yowabu uli pafupi na munda wane, ndipo muli mbuto ya nyauti. Ntheura rutani na kuwubuska moto.” Penepapo ŵateŵeti ŵa Abisalomu ŵakabuska moto mu munda wa Yowabu.

³¹Ndipo Yowabu wakawuka na kuruta ku nyumba ya Abisalomu ndipo wakati kwa iyo, “Kasi nchifukwa uli ŵateŵeti ŵako ŵabuska moto mu munda wane?”

³²Abisalomu wakamuzgora wakati, “Nkhatuma mazgu kwa iwe kuti wize kuti ndikutume kwa karonga kuya kandifumbira kuti, ‘Kasi ndili kwizirachi ine kufuma ku charu cha Geshuru? Kwanguŵa kuweme kwa ine kuti mphanyi ndili kwenekura. Ine nkhukhumba kuti ndiwonane na karonga, ndipo usange ndili na mrandu, ipo wandikome waka.’ ”

³³Ntheura Yowabu wakaruta kwa karonga na kumuphalira makani agha. Ndipo karonga wakamuchema Abisalomu mweneuyo wakati wafika kwa karonga wakasindamira pasi panthazi pa karonga. Penepapo karonga wakamufyofyontha Abisalomu.