Read new_tumbuka_bible 2 Samuele 15 Bible Online

2 Samuele 15 - new_tumbuka_bible bible

2 Samuele 15

¹Pamanyuma pa ivi, Abisalomu wakajinozgera gareta na mahachi ghakuliyendeska ndiposo na ŵanthu 50 kuti ŵachimbirenge panthazi pakhe.

²Abisalomu wakawukanga na mulenjelenje na kwimilira pafupi na msewu wakuya ku chipata cha msumba. Para munthu yunji wakizanga na mrandu wakhe wakuti weruzgike na karonga, Abisalomu wakamuchemanga na kuti kwa iyo, “Kasi ukufuma ku msumba ngu?” Para munthu yura wakuti, “Muteŵeti winu ngwa fuko lakuti muIsraele,”

³Abisalomu wakamuphaliranga kuti, “Laŵiska iwe, mrandu wako nguweme na wakunyoroka, kweni palije munthu uyo wali kwimikika na karonga kuti weruzge mrandu wako.”

⁴Ndipo Abisalomu wakarutiliranga kuyowoya kuti, “Okwe! Ndiŵenge mweruzgi ine mu charu, mphanyi wose awo ŵali na mrandu panji chifukwa, ŵakwiza kwa ine na kuŵayeruzgira mrandu wawo mwakunyoroka.”

⁵Para munthu yunji wakusenderera kufupi kuti wamulambire, wakanyoroskanga woko lakhe kumukora ndiposo na kumufyofyontha.

⁶Ntheura ndimo Abisalomu wakachitiranga na muIsraele waliyose mweneuyo wakarutanga kwa karonga kuti wamweruzgire mrandu wakhe. Mwa ntheura wakakopa mtima wa ŵanthu ŵanandi.

⁷Ndipo pa umaliro wa virimika vinayi, Abisalomu wakati kwa karonga, “Nkhumuŵeyani mundizomerezge kuti ndirute ku msumba wa Heburoni mwakuti nkhafiska chirapo chane icho ndili kurapa kwa FUMU.

⁸Pakuti muteŵeti winu apo wakakharanga ku charu cha Geshuru mu Aramu, wakarapa wakati, ‘Usange FUMU yiti yindiwezgere ku Yerusalemu, ndamkusopera FUMU ku Heburoni.’ ”

⁹Ndipo karonga wakati, “Rutanga mu mutende.” Penepapo wakawukako na kuruta ku Heburoni.

¹⁰Kweni Abisalomu wakatuma ŵanthu mu udesi kuruta mu mafuko ghose gha Israele na mazgu ghakuti, “Para mukupulika kulira kwa mbata, mukachemerezge kuti, ‘Abisalomu ndi karonga mu msumba wa Heburoni.’ ”

¹¹Pakuruta Abisalomu wakatora ŵanthu 200 kufuma mu Yerusalemu. Iwo ŵakaŵa ŵalendo ŵakuchemeka waka, mwakuti ŵakajirutiranga waka kwambula kumanya chilichose.

¹²Para Abisalomu wakaperekanga sembe ku Heburoni, wakachemanga Ahitofele muGilo, movwiri wa Davide kuti wize kufuma ku msumba wakhe wa Gilo uko wakakharanga. Ndipo chiŵembu chakugarukira karonga chikaŵanga cha nkhongono ndipo ŵanthu awo ŵakaŵanga na Abisalomu ŵakakulirangakuliranga mu unandi wawo.

¹³Nthumi yikafika kwa Davide na mazgu ghakuti, “ŴaIsraele ŵanandi sono ŵakupulikira Abisalomu.”

¹⁴Penepapo Davide wakati ku nduna zakhe zose izo zikaŵa nayo mu Yerusalemu kuti, “Wukani! Tiyeni tichimbire mzire na yumoza wa ise wathaskike kwa Abisalomu. Tiyeni tifumemo luŵiroluŵiro mzire watisange tose na kukoma na lupanga waliyose wa ise mu msumba.”

¹⁵Nduna za karonga zikati, “Ŵateŵeti ŵinu ŵali muchanya kale kuchita chilichose icho karonga FUMU yithu yadumula.”

¹⁶Ntheura karonga wakafumamo mu msumba pamoza na wose wa mu nyumba yakhe. Kweni wakasidamo ŵawoli ŵachoko khumi kuti ŵasungilirenge nyumba ya ufumu.

¹⁷Karonga wakafumamo mu msumba, pamoza na ŵanthu wose ŵakumurondezga ndipo ŵakiza kayima pa nyumba ya umaliro.

¹⁸Ŵasilikari ŵakhe wose pamoza na ŵaKereti na ŵaPeleti awo ŵakamuvikiriranga, ŵakajumpha panthazi pa karonga. Pamanyuma ŵakajumpha ŵaGiti ŵakukwana 600 awo ŵakaŵa nayo kufuma ku Gati.

¹⁹Karonga wakati kwa Itayi uyo wakaŵa murongozgi wa ŵaGiti, “Chifukwa uli iwe nawe ukuruta nase? Uwerere, ukakhare na karonga. Iwe ndiwe mulendo, ndiposo wamikori kufuma mu charu cha kwinu.

²⁰Iwe ukiza mayiro, ndipo muhanya uno ndikutore kuti wendakayinga nase apo ine nkhumanyako chara uko nkhuruta? Werera, ndipo utore ŵanthu ŵa kukwinu murutenge pamoza. FUMU yiŵe na chisungusungu na iwe ndipo yirongore kugomezgeka kwakhe kwa iwe.”

²¹Kweni Itayi wakazgora karonga kuti, “Nkhurapira mwa FUMU ndiposo mwa karonga, sekuru wane kuti kose uko karonga sekuru wane wamkuŵa, manyi nkhu nyifwa panji ku umoyo ndiko muteŵeti winu nayo wamkuŵa.”

²²Penepapo Davide wakati kwa Itayi, “Tiye, jumphanga.” Ntheura Itayi muGiti wakajumpha pamoza na ŵasilikari ŵakhe wose na ŵana wose awo ŵakaŵa nawo.

²³Ndipo ŵanthu wose ŵa mu charu wakalira chomene apo karonga na ŵasilikari ŵakhe ŵakafumangamo mu msumba. Karonga wakambuka mronga wa Kidironi ndipo ŵanthu wose ŵakarutilira kurazga ku mapopa.

²⁴Musofi Zadoki nayoso wakaŵapo pamoza na ŵaLevi wose awo ŵakayeghanga Bokosi la Phangano la Chiuta. Ŵakaliŵika pasi Bokosi la Phangano la Chiuta lira ndipo musofi Abiyatara wakapereka sembe kwa Chiuta ŵakasuka ŵanthu wose ŵakamara kufumamo mu msumba.

²⁵Penepapo karonga wakati kwa musofi Zadoki, “Uwerere nalo Bokosi la Phangano la Chiuta kuya ku msumba. Usange ndasanga uchizi panthazi pa FUMU, yamkundiwezga ndipo yizamkundizomerezga kuti ndiliwonenge Bokosi la Phangano lakhe na malo ghakhe ghakukharamo.

²⁶Kweni usange FUMU yikuti, ‘Kuti nkhukondwa na iwe chara,’ mbwenu rekani FUMU yichite chilichose icho chingaŵa chiweme kwa iyo.”

²⁷Karonga wakatiso kwa musofi Zadoki, “Asi iwe uli nchimi.” Wererani mu msumba mu mutende, iwe na Abiyatara pamoza na ŵana ŵinu ŵanarume Ahimaazi mwana wako ndiposo na Yonatani mwana wa Abiyatara.

²⁸Ine nditi ndilindirenge pa majambuko gha mronga mura mu mapopa ndisuke ndipulike mazgu kufumira kwa imwe.

²⁹Penepapo Zadoki na Abiyatara ŵakatora Bokosi la Phangano, ndipo ŵakawerera ku Yerusalemu na kukhara kwenekura.

³⁰Apo Davide wakweranga chikwera cha Phiri la maOlive, wakuliranga uku wakwenda. Ku malundi kuti wakavwara chilichose chara ndipo wakajidikiska ku mutu wakhe. Ŵanthu wose awo ŵakaŵa nayo nawo ŵakajidikiska ku mitu yawo na kulira uku ŵakwenda.

³¹Munthu yunji wakamuphalira Davide kuti, “Ahitofele wali pamoza na awo ŵamugarukirani ndipo na Abisalomu.” Penepapo Davide wakaromba wakati, “Mwe FUMU nkhumuŵeyani zgorani urongozgi wa Ahitofele kuti uŵe wakupusa.”

³²Davide wakati wafika pachanya pa phiri apo ŵanthu ŵakasoperanga Chiuta, Hushayi muAriki wakaŵa kwenekura kuti wakumane na Davide uku munjilira wakhe waparukaparuka ndipo fuvu liri ku mutu wakhe.

³³Davide wakati kwa Hushayi, “Usange uti urutenge na ine, uti uŵenge mphingo kwa ine.

³⁴Kweni usange ungawerera ku msumba na kuyowoya kwa Abisalomu kuti, ‘Mwe karonga, ine nditi ndiŵenge muteŵeti winu. Nga ndi umo ndanguŵira muteŵeti wa wiskemwe mu nyengo izo zajumpha, ntheura sono ndiŵenge muteŵeti winu,’ apo ndipo wamkunditondera urongozgi wa Ahitofele.

³⁵Ŵasofi Zadoki na Abiyatara wamkuŵa na iwe kwenekura, ndipo ukaŵaphalirenge chilichose icho wamkuchipulika kufumira ku nyumba ya ufumu.

³⁶Ŵana ŵawo ŵanarume ŵaŵiri ŵali nawo kwenekura, Ahimaazi mwana wa Zadoki na Yonatani mwana wa Abiyatara. Ŵana ŵeneaŵa ndiwo ukaŵatumenge kwa ine na chilichose icho wamkuchipulika kufuma mu nyumba ya ufumu.”

³⁷Ntheura Hushayi, mubwezi wa Davide wakawerera ku msumba pa nyengo iyo Abisalomu wakafikiranga waka mu Yerusalemu.