Read new_tumbuka_bible 2 Samuele 16 Bible Online

2 Samuele 16 - new_tumbuka_bible bible

2 Samuele 16

¹Para Davide wakajumphapo pachoko waka pachanya pa phiri lira, Ziba muteŵeti na Mefibosheti wakakumana nayo. Ziba wakaŵa na mbunda ziŵiri izo zikaŵa na viskaro ndipo zikayegha vingwa 200, makunje gha mpheska zakomira 100, vipambi vya chikuyu vya mu chihanya 100 ndiposo mathumba ya vikumba yakuzura na vinyo.

²Karonga wakamufumba Ziba wakati, “Kasi nchifukwa uli wiza na vyeneivi?” Ziba wakazgora wakati, “Mbunda ndi za mu nyumba ya ufumu kuti ŵakwerengepo. Vingwa na vipambi vya mu chihanya ndi vya ŵanyamata kuti ŵaryenge, ndipo vinyo ndi vya awo vyalema mu mapopa kuti ŵamwenge.”

³Karonga wakamufumba wakati, “Kasi Mefibosheti, muzukuru wa sekuru wako wali nkhu?” Ziba wakazgora wakati, “Iyo wali mu Yerusalemu, pakuti iyo wakughanaghana kuti, ‘Muhanya uno ŵaIsraele wati wawezgere ufumu wa sekuru wakhe kwa iyo.’ ”

⁴Penepapo karonga wakati kwa Ziba, “Vinthu vyose ivyo vikaŵa vya Mefibosheti, sono ndi vyako.” Ziba wakati, “Ndawa pasi, rekani ndisange uchizi panthazi pinu, mwe karonga sekuru wane.”

⁵Para Davide wakafika ku Bahurimu, munthu yunji wa fuko mbumba ya Sauli wakiza kuti wakumane nayo zina lakhe wakaŵa Shimeyi mwana wa Gera. Ndipo apo wakafumanga wakatembanga uku wakwenda.

⁶Shimeyi wakamba kuponya mawe kwa Davide na kwa nduna zakhe zose nangauli Davide wakazingilizgika na awo ŵakamuvikiriranga na ŵasilikari ŵakhe.

⁷Apo Shimeyi wakatembanga na kuchemerezga kuti, “Fumapo! Fumapo! Iwe munthu wakukoma ŵanthu! Munthu muheni iwe!

⁸FUMU yawezgera nduzga pa ndopa zose izo ukathiska pa mbumba ya Sauli mweneuyo mu malo mwakhe ukuwusa. FUMU yapereka ufumu kwa mwana wako Abisalomu. Wona sono wapasuka pakuti ndiwe munthu wakukoma ŵanthu!”

⁹Penepapo Abishayi mwana wa Zeruya wakati kwa karonga, “Kasi nchifukwa uli ncheŵe yakufwa iyi yikutemba karonga sekuru wane? Rekani ndirute kuti nkhamudumure mutu.”

¹⁰Kweni karonga wakati kwa Abishayi na kwa mwana munyakhe Yowabu, “Kasi pali vichi pakati pa ine na imwe ŵana ŵa Zeruya? Usange wakunditemba chifukwa chakuti FUMU ndiyo yamutuma kuti, ‘Umutembe Davide’ Kasi ndi njani uyo wangafumba kuti, ‘Iwe, kasi wachitirachi ntheura?’ ”

¹¹Ntheura Davide wakati kwa Abishayi na ku nduna zakhe zose, “Mwana wane na wane wakukhumba kundikoma. Kasi sono muBenjamini uyu wangareka uli? Murekani yekha. Murekani watembenge pakuti FUMU ndiyo yamutuma.

¹²Panyakhe FUMU yiti yilaŵiske visuzgo vyane na kundiwezgera uweme chifukwa chakutembeka kwane muhanya uno.”

¹³Ntheura Davide na ŵanthu ŵakhe ŵakarutilira mu nthowa pera, apo Shimeyi wakendanga mu mphepete mwa kaphiri kuthyana nayo uku wakutemba, kuponya mawe na kumung'ondolera chuvu.

¹⁴Ndipo karonga pamoza na ŵanthu awo ŵakaŵa nayo ŵakaya kafika ku Yorodani ŵavuka chomene. Ntheura ŵakapumulapo kuti ŵawezgerepo nkhongono zawo.

¹⁵Sono Abisalomu na ŵaIsraele awo ŵakaŵa nayo, ŵakafika mu Yerusalemu ndipo Ahitofele wakaŵa pamoza nawo.

¹⁶Penepapo Hushayi muAriki, mubwezi wa Davide wakiza kwa Abisalomu ndipo wakachemerezga wakati, “Karonga, muŵe na umoyo utali! Karonga muŵe na umoyo utali!”

¹⁷Abisalomu wakamufumba Hushayi wakati, “Kasi kweneuku ndiko kurongora kugomezgeka kwako kwa mubwezi wako? Kasi warekerachi kuruta na mubwezi wako?”

¹⁸Hushayi wakati kwa Abisalomu, “Chara! Kweni mweneuyo FUMU yili kumusora, uyo ŵanthu ŵaIsraele ŵali kumusora, mweneuyo ndiyo ine nditi ndiŵenge wakhe ndipo nditi ndikharenge nayo.

¹⁹Ndiposo, ndi njani uyo nkhwenera kumuteŵetera? Asi wakwenera kuŵa mwana wakhe? Nga ndi umo nkhateŵeteranga ŵawiskemwe, ndimo nditi nditeŵeterenge na imwe wuwo.”

²⁰Abisalomu wakati kwa Ahitofele, “Tiphalira urongozgi wako, kasi sono tichitechi?”

²¹Ahitofele wakamuzgora Abisalomu wakati, “Imwe mugonane na ŵawoli ŵachoko ŵa ŵawiskemwe ŵeneawo ŵali kuŵareka kuti ŵasungilirenge nyumba ya ufumu. Penepapo ŵaIsraele wose ŵati ŵapulike kuti imwe mwajitorera chimphindikwa kwa ŵawiskemwe. Ndipo wose awo ŵali namwe pamoza ŵati ŵakhwimiskike.”

²²Ntheura ŵakamujinthira hema Abisalomu pachanya pa mtenje wa nyumba ya ufumu, ndipo Abisalomu wakagona na ŵawoli ŵachoko ŵa ŵawiske uku ŵaIsraele wose ŵakuwona.

²³Sono mu mazuŵa gheneghara, urongozgi uwo Ahitofele wakaperekanga ukaŵa nga ndi para wafuma kwa Chiuta. Ntheura ndimo Davide na Abisalomu ŵakawupimiranga urongozgi wose wa Ahitofele.