Read new_tumbuka_bible 2 Samuele 17 Bible Online

2 Samuele 17 - new_tumbuka_bible bible

2 Samuele 17

¹Pamanyuma pa ichi, Ahitofele wakati kwa Abisalomu, “Mundizomerezge kuti ndisore ŵanthu 12,000 ndipo usiku weneuwo ndiwuke na kumulonda Davide.

²Ndamkurotokera apo wachali na vyakulema na wa kuwa nkhumbi, ndipo ndamkumofya. Ntheura ŵanthu awo ŵali nayo wamkuchimbira ndipo ine ndamkukoma karonga pera.

³Ŵanthu wose ndamkwiza nawo kwa iwe nga ndi mwali uyo wakwiza kwa mufumu wakhe. Imwe mukukhumba kukoma munthu yumoza pera, ntheura ŵanthu wose ŵati ŵaŵenge mu mutende.”

⁴Urongozgi uwu ukamukondweska Abisalomu na ŵarara wose ŵaIsraele.

⁵Penepapo Abisalomu wakati, “Muchemani Hushayi muAriki mwakuti nayo tipulike icho wangawoya.”

⁶Para Hushayi wakiza, Abisalomu wakati kwa iyo, “Ahitofele watipa urongozgi wakhe uwu. Kasi tichite icho wakuyowoya? Usange chara, utiphalire maghanoghano ghako.”

⁷Hushayi wakati kwa Abisalomu, “Pa nyengo ya sono urongozgi uwo wapereka Ahitofele kuti nguweme chara.”

⁸Hushayi wakarutilira kuyowoya kuti, “Pakuti mukumanya waka ŵawiskemwe na ŵasilikari ŵawo kuti ndi vinkhara vya nkhondo ndipo mbakari nga ndi nkharamira yanakazi iyo yapokeka twana twakhe mu thondo. Pa dera pa ichi, ŵawiskemwe ndi nkhwantha pa nkhondo, ndipo usiku uno kuti ŵagonenge pamoza na ŵasilikari ŵawo chara.

⁹Nanga ndi sono wabisama mu makhururu ghanji panji ku malo ghanyakhe. Ndipo usange ŵasilikari ŵithu ŵanji ŵakukomeka pa nkhondo yakudanga, waliyose uyo wati wapulike za ichi, wati wayowoye kuti ŵasilikari awo ŵakurondezga Abisalomu ŵakomeka.

¹⁰Pa ichi nanga ndi chinkhara icho mtima wakhe uli nga ndi wa nkharamu, uti usongonokenge nadi na wofi, pakuti ŵaIsraele wose ŵakumanya kuti ŵawiskemwe ndi chinkhara cha nkhondo ndiposo wose awo ŵali nayo pamoza ndi vinkhara.

¹¹Ntheura urongozgi wane ngwa kuti: Muwunganye ŵaIsraele wose panthazi pinu kufuma ku Dani mpaka ku Beyeresheba. Unandi wawo uŵe nga ndi muchenga wa mu mphepete mwa mu nyanja ndipo imwe ndimwe murongozge ku nkhondo.

¹²Ntheura ndipo tingamurotokera kulikose uko wamkuŵa ndipo tamkuwira pa iyo nga ndi umo jumi likuwira pa dongo. Pamkuŵavye na yumoza wakukhara wa moyo manyi ndiyo, panji ŵasilikari ŵakhe wose awo ŵali nayo pamoza.

¹³Usange wanjira mu msumba uliwose, ŵaIsraele wose ŵamkwiza na vingwe ku msumba uwo na kuwuguzira pasi ku chidambo mpaka paŵavye na kalibwe kakukharapo.”

¹⁴Ndipo Abisalomu na ŵaIsraele wose ŵakati, “Urongozgi wa Hushayi muAriki nguweme kuruska wa Ahitofele.” Pakuti FUMU ya ghanaghana kuti urongozgi wa Ahitofele utondeke mwakuti yireke kumutorera uheni Abisalomu.

¹⁵Penepapo Hushayi wakati kwa ŵasofi Zadoki na Abiyatara, “Ahitofele wapereka urongozgi wakhe ntheura kwa Abisalomu na ku ŵarara wose ŵaIsraele, kweni ine nane ndapereka urongozgi wa ntheura.

¹⁶Sono tumani mazgu luŵiro kwa Davide ndipo mukamuphalire kuti, ‘Usiku uno mureke kugona pa majambuko gha Yorodani mu mapopa. Mwambuke luŵiro mzire karonga na ŵanthu wose awo wali nawo ŵakoreke na kukomeka.’ ”

¹⁷Yonatani na Ahimaazi wakalindiriranga ku chisimi cha Eni Rogele pafupi na msumba wa Yerusalemu, pakuti ŵakakhumbanga kuti wawoneke na ŵanthu pakunjira mu msumba chara. Msungwana wa nchito wakatumikanga na kuŵaphalira umo vinthu viliri ndipo iwo ŵakarutanga kuya kamuphalira Karonga Davide.

¹⁸Kweni zuŵa linyakhe, msepuka wakaŵawona ndipo wakaya kamuphalira Abisalomu. Ntheura wose ŵaŵiri ŵakawukapo luŵiro na kuruta ku nyumba ya munthu yunji ku msumba wa Bahurimu mweneuyo wakaŵa na chisimi pa luwugha lwakhe, ndipo ŵakanjira mwenemumo kuti wabisame.

¹⁹Mwanakazi wa munthu yura wakatora chibenekerero cha pa muryango wa chisimi chira na kwanikapo tirigu wakuti waphwanthe pachanya pakhe. Ntheura pakaŵavye na munthu uyo wakamanya kuti pali chisimi.

²⁰Para ŵasilikari ŵa Abisalomu ŵakafika ku nyumba ya mwanakazi yura ŵakafumba ŵakati, “Kasi Ahimaazi na Yonatani wali nkhu?” Mwanakazi yura wakazgora wakati, “Ŵanthu aŵa ŵambuka kamronga.” Ndipo ŵakati ŵapenjapenja kuti ŵakaŵasanga chara. Ntheura ŵakawerera ku Yerusalemu.

²¹Ŵasilikari ŵara ŵakati ŵaruta, Ahimazi na Yonatani wakafuma mu chisimi chira na kuruta kuti wakamuphalire Karonga Davide. Iwo ŵakati kwa iyo, “Wukani ndipo mwambuke mronga uwu luŵiro. Pakuti Ahitofele wapereka urongozgi wakuti ŵanthu ŵakhe wize na nkhondo kwa imwe.”

²²Ntheura Davide pamoza na ŵanthu wose awo ŵakaŵa nayo ŵakawuka na kwambuka mronga wa Yorodani. Para kukachanga, pakaŵavye na yumoza uyo wakaŵa wachali wandambuke mronga.

²³Para Ahitofele wakawona kuti urongozgi wakhe kuti wazomerezgeka chara, wakakwera pa mbunda yakhe na kuruta ku nyumba yakhe ku msumba wakwakhe. Wakati waŵika makora vinthu vyose vya mu nyumba yakhe, wakajikaka na kufwa ndipo wakasungika mu dindi uko wakasunga ŵawiske.

²⁴Apo Davide wakafikanga ku msumba wa Mahanayimu, ndipo Abisalomu wakambuka mronga wa Yorodani pamoza na ŵasilikari wose ŵaIsraele.

²⁵Abisalomu wakimika Amasa kuŵa murongozgi wa ŵasilikari mu malo mwa Yowabu. Amasa wakaŵa mwana wa munthu yunji zina lakhe Yetere, muIshimaele,[9] mweneuyo wakatora Abigelu mwana mwanakazi wa Nahashi mudumbu wa Zeruya, nyina wa Yowabu.

²⁶Ntheura ŵaIsraele na Abisalomu wakazenga misasa mu charu cha Gileyadi.

²⁷Davide wakati wafika ku msumba wa Mahanayimu, Shobi mwana wa Nahashi wa ku msumba wa Raba uwo ngwa ŵaAmoni, na Makiri mwana wa Amiyele wa ku Lodebara, ndipo na Barizilayi muGileyadi wa ku Rogelimu,

²⁸ŵakiza na mphasa zakugonapo, mbale, viŵiya vya dongo, tirigu, nyauti, ufu, na tirigu wakukazinga, nchunga, nkhunde,

²⁹uchi, chambiko, mberere, mbuzi, mafuta ghakukhoma gha mkaka wa ng'ombe na kupereka kwa Davide pamoza ŵanthu awo wakaŵa nawo kuti ŵaryenge. Pakuti iwo ŵakati, “Ŵanthu ŵali na njara, vyalema ndipo wali na nyota mu mapopa.”