Read new_tumbuka_bible 2 Samuele 18 Bible Online

2 Samuele 18 - new_tumbuka_bible bible

2 Samuele 18

¹Davide wakawunganya ŵasilikari awo wakaŵa nawo ndipo mukati mwawo wakimika ŵarongozgi ŵa ŵasilikari vikwi ndiposo ŵanyakhe ŵa ŵasilikari 100.

²Sono Davide wakagaŵa patatu ŵasilikari ŵakhe na kuŵatuma. Wupu unyakhe ukaŵa pasi pa urongozgi wa Yowabu. Unyakhe ukaŵa pasi pa urongozgi wa Abishayi mwana munyakhe na Yowabu ŵana ŵa Zeruya. Unyakhe ukaŵa pasi pa urongozgi wa Itayi muGiti. Ndipo karonga wakati ku ŵasilikari ŵakhe, “Ine nane nditi ndirute namwe pamoza.”

³Ŵasilikari ŵakhe ŵakati, “Imwe mukwenera kuruta chara. Pakuti usange tamkuchichizgika nkhondo kuti ŵamkupwererako na vya ise chara. Manyi hafu wa ise tikafwe, kuti ŵamkupwererako chara. Kweni imwe muli ŵakuzirwa kuruska 10,000 wa ise. Ntheura chingaŵa chiweme kuti imwe mukhare mwenemumo mu msumba na kutitumiranga wovwiri.”

⁴Karonga wakazgora wakati, “Chose icho chikuwoneka chiweme kwa imwe, nditi ndichitenge.” Ntheura karonga wakimilira pa mphepete pa chipata apo ŵasilikari wose ŵakafumanga mu viwuru vya 100 na vya 1,000.

⁵Karonga wakalangula Yowabu, Abishayi na Itayi ŵarongozgi ŵa ŵasilikari ŵara kuti, “Mukamukore makora munyamata uyo Abisalomu chifukwa cha ine.” Ŵasilikari wose ŵakapulika karonga wakulangula ŵarongozgi ŵasilikari ŵatatu ŵara za vya Abisalomu.

⁶Penepapo ŵasilikari ŵa Davide ŵakaruta ku thengere kuya karwa na ŵaIsraele mu nkhorongo ya Efurayimu.

⁷Kwenekura ŵasilikari ŵa ŵaIsraele ŵakathereskeka na ŵasilikari ŵa Davide ndipo awo ŵakakomeka zuŵa lira ŵakaŵa ŵanandi chomene ŵakukwana 20,000.

⁸Nkhondo yikatandazgika posepose mu charu chira, ndipo awo ŵakafwira mu thengere ŵakaŵa ŵanandi chomene kuruska awo ŵakakomeka mu nkhondo.

⁹Kwa mabuchibuchi Abisalomu wakakumana na ŵasilikari ŵa Davide. Iyo wakagara pa mbunda ndipo apo mbunda yikati yenda kusi kwa minthavi yakukorana ya khuni likuru la musoro, mutu wa Abisalomu ukakora ku munthavi ya khuni. Ntheura Abisalomu wakarekeka wakulendera waka kusi ku minthavi ya khuni apo mbunda iyo wakagarapo yikarutilira waka.

¹⁰Musilikari yumoza wa Davide wakachiwona ichi ndipo wakaya kamuphalira Yowabu kuti, “Ndamuwona Abisalomu wakulendera waka mu khuni la musoro.”

¹¹Penepapo Yowabu wakati kwa munthu uyo wakamuphaliranga, “Ukuti vichi? Ukuti wamuwona? Nchifukwa uli wareka kumukomera penepapo? Mphanyi ine ndangukondwa pakukupa ndarama khumi na lamba wa nkhondo.”

¹²Munthu yura wakamuzgora Yowabu wakati, “Nangauli mundipenge ndarama 1,000 napo mphanyi ndangumukoma chara mwana wa karonga. Ise tikapulikanga apo karonga wakamulangulaninge imwe, Abishayi na Itayi kuti, ‘Mukamukore makora Abisalomu chifukwa cha ine.’

¹³Ndiposo, ndirekenge kupulikira karonga na kumukoma, mphanyi ndangumanyikwa pakuti palije na chimoza chakubisika kwa karonga. Ndipo imwe namwe mphanyi mwangwimilira kutali na ine.”

¹⁴Yowabu wakati, “Kuti ndichedwenge na iwe chara.” Ntheura wakatora mikondo yitatu na kugwaza nayo Abisalomu pa mtima, apo wakaŵa wachali wamoyo mu khuni la musoro.

¹⁵Ndipo ŵasilikari khumi ŵa Yowabu awo ŵakayeghanga mahomwa ghakhe ŵakamuzingirizga Abisalomu ndipo nawo ŵakamba kumutimba na kumukoma.

¹⁶Penepapo Yowabu wakalizga mbata yakuti ŵareke nkhondo ndipo ŵasilikari ŵakawerako uko ŵakarondezga ŵaIsraele.

¹⁷Ŵasilikari ŵara ŵakatora thupi la Abisalomu na kuliponya mu chikhururu chikuru icho chikaŵa ku nkhorongo kwenekura ndipo ŵakalundapo mawe ghanandi pachanya pakhe. Ŵasilikari wose ŵa ŵaIsraele ŵakachimbilira ku vikaya vyawo.

¹⁸Apo Abisalomu wakaŵa wachali wamoyo, wakajimikira mzati mu Dambo la karonga kuŵa chikumbusko chakhe pakuti wakaghanaghana kuti, “Ndilije mwana mwanarume wakuti wasunge zina lane mwakuti likumbukikenge.” Ntheura wakathya mzati ura zina la iyomwene ndipo uchali kuchemeka kuti, “Chikumbusko cha Abisalomu” mpaka sono.

¹⁹Penepapo Ahimaazi mwana wa Zadoki wakati, “Rekani sono ndichimbire kuti nkhamuphalire karonga uthenga uwu kuti FUMU yawombola karonga ku ŵarwani ŵakhe.”

²⁰Yowabu wakati kwa iyo, “Muhanya uno kuti ndiwe ukwenera kuya kaphara uthenga uwu chara. Iwe ungizakaphara uthenga uwu zuŵa linyakhe, muhanya uno chara, chifukwa uyo wafwa ndi mwana wa karonga.”

²¹Pamanyuma Yowabu wakati kwa muEtiyopiya, muzga wakhe, “Ruta ukamuphalire karonga ivyo waviwona. Ndipo muEtiyopiya wakasindama panthazi pa Yowabu na kuchimbira.”

²²Ahimaazi mwana wa Zadoki wakayowoyaso kwa Yowabu wakati, “Ndipouli nkhumuŵeyani rekani ndichimbire pamanyuma pa muEtiyopiya.” Kweni Yowabu wakati, “Mwana wane, kasi nchifukwa uli ukukhumba kuruta? Iwe kuti uli na njombe yiliyose pa uthenga uwu chara.”

²³Ahimaazi wakati, “Ndipouli rekani ndichimbire.” Ntheura Yowabu wakati kwa iyo, “Chimbira.” Penepapo Ahimazi wakachimbira pakwendera nthowa ya mu chidika na kumujumpha muEtiyopiya.

²⁴Sono Davide wakakhara pakatikati pa chipata cha kuwaro na cha mukati. Mulinda wakakwera pa mtenje wa chipata cha linga, ndipo wakati walaŵiska, wakawona munthu wakuchimbira wali yekha.

²⁵Ndipo mulinda yura wakachemerezga na kuphara kwa karonga. Penepapo karonga wakati, “Usange wakuchimbira yekha wayegha uthenga uweme.” Munthu yura wakizanga kusenderera kufupi.

²⁶Mulinda wakawonaso munthu munyakhe wakuchimbira ndipo wakachemerezgaso kwa mulinda wa pa chipata kuti, “Laŵiska, munthu munyakhe wakuchimbira nayo wali yekha.” Karonga wakati, “Nayoso wayegha uthenga uweme.”

²⁷Mulinda wakati, “Umo nkhuwonera kachimbiliro ka uyo wali panthazi chomene, kali nga nkha Ahimaazi mwana wa Zadoki.” Karonga wakati, “Ahimaazi ndi munthu muweme ndipo wakwenera kwiza na uthenga uweme.”

²⁸Ahimaazi wakachemerezga kwa karonga wakati, “Nkhuweme.” Wakati wayowoya ntheura, wakasindamira pasi panthazi pa karonga ndipo wakati, “Yitumbikike FUMU, Chiuta winu mweneuyo wapereka awo ŵakawukira karonga sekuru wane.”

²⁹Karonga wakafumba wakati, “Kasi munyamata Abisalomu wali makora?” Ahimaazi wakazgora wakati, “Apo Yowabu wakati watumenge muteŵeti wa karonga pamoza na ine kwiza kwa karonga, nkhawona chivulupi chikuru. Kweni kuti nkhumanya chara icho chikaŵako.”

³⁰Karonga wakati kwa iyo, “Fumapo, yimilira apo pa mphepete.” Ntheura wakafumapo na kuya kamilira pa mphepete.

³¹Penepapo muEtiyopiya wakafika ndipo wakati, “Ndili na uthenga uweme kwa imwe karonga sekuru wane. Muhanya uno FUMU yawezgera nduzga wose awo ŵakamuwukirani.”

³²Karonga wakamufumba muEtiyopiya wakati, “Kasi munyamata Abisalomu wali makora?” MuEtiyopiya yura wakazgora wakati, “Ŵarwani wose ŵa karonga sekuru wane na wose awo ŵakumuwukira kuti ŵamupwetekani, ŵaŵe nga ndi munyamata mweneuyu.”

³³Ndipo karonga wakaŵa na chitima chikuru chomene ndipo wakaruta ku chipinda cha pachanya icho chikaŵa pa chipata na kulira. Apo wakarutanga wakaliranga kuti, “Mwana wane Abisalomu, mwana wane, mwana wane Abisalomu! Mphanyi ndangufwa ndine mu malo mwa iwe, we Abisalomu, mwana wane, mwana wane.”