Read new_tumbuka_bible 2 Samuele 19 Bible Online

2 Samuele 19 - new_tumbuka_bible bible

2 Samuele 19

¹Yowabu wakaphalirika kuti Karonga Davide wakulira na kutengera nyifwa ya Abisalomu.

²Ntheura chimwemwe chakuthereska kwa zuŵa lira chikazgora chitengero ku ŵasilikari wose chifukwa ŵakapulika kuti karonga wali na chitima chikuru chifukwa cha mwana wakhe.

³Zuŵa lenelira, ŵasilikari ŵakanjira chisisi mu msumba nga ndi umo ŵasilikari ŵakunjirira mu msumba mwa soni para ŵachimbira ku nkhondo.

⁴Karonga wakajidikiska ku maso ndipo wakalira chomene wakati, “Wa mwana wane Abisalomu, we Abisalomu, mwana wane, mwana wane!”

⁵Ntheura Yowabu wakiza ku nyumba ya ufumu ndipo wakati, “Muhanya uno mwaŵakhozga soni ŵasilikari ŵinu wose ŵeneawo ŵaponoska umoyo winu na wa ŵana ŵinu, ŵanarume na ŵanakazi, ŵawoli ŵinu pamoza na ŵawoli ŵinu ŵachoko.

⁶Mwa ntheura mukutemwa ŵarwani ŵinu ndipo mukutinkha awo ŵakumutemwani. Pakuti muhanya uno mwarongora pakweru kuti ŵarongozgi ŵa ŵasilikari na ŵasilikari ŵawo kuti ŵanguŵa kanthu kwa imwe chara. Ndawona muhanya uno kuti usange Abisalomu wakharenge wa moyo, ndipo ise tose tifwenge mphanyi mwangukondwa.

⁷Ntheura sono wukani, rutani ku ŵasilikari ŵinu kuti mukayowoye nawo makora mukaŵapembuzga. Nadi nkhurapa panthazi pa FUMU kuti usange murekenge kuŵapembuzga, palije na musilikari na yumoza uyo wati wakharenge namwe usiku uno. Ndipo ichi chitiŵenge chiheni kwa imwe kwakuruska mauheni ghose agho ghamuwirani kufuma ku wanichi winu mpaka sono.”

⁸Penepapo karonga wakawuka na kuya kakhara pa chizumbe chakhe icho chikaŵa pa chipata. Para ŵasilikari ŵakapulika kuti karonga wakhara pa chizumbe chakhe pa chipata, wose ŵakiza panthazi pakhe. Pa nyengo iyi ŵaIsraele wose ŵakachimbira, waliyose ku chikaya chakhe.

⁹Mu charu chose cha Israele ŵanthu ŵa mafuko ghose ŵakasuskananga yumoza na munyakhe kuti, “Karonga Davide ndiyo wakatithaska ku ŵarwani ŵithu ndipo ndiyoso wakatiponoska ku ŵaFilisiti, kweni sono wachimbiramo mu charu chifukwa cha Abisalomu.

¹⁰Abisalomu mweneuyo tikamuphakazga kuti watiwusenge wafwira ku nkhondo. Sono nchifukwa uli mukureka kuyowoya za kuwezgera Karonga Davide kuno ku muzi?”

¹¹Karonga Davide wakatuma mazgu kwa ŵasofi Zadoki na Abiyatara kuti, “Ŵafumbani ŵarara ŵa Yuda kuti, ‘Kasi nchifukwa uli imwe muŵenge ŵakumalira pakuwezgera karonga ku nyumba yakhe, apo ichi chikuyowoyeka mu ŵaIsraele wose ndipo chamufika karonga uko wakukhara?

¹²Imwe ndimwe ŵabali ŵane, ndipo ŵa thupi limoza na ŵa ndopa zimoza na ine. Ntheura kasi nchifukwa uli imwe muŵenge ŵakumalira pakuwezgera karonga ku nyumba yakhe?’

¹³Ndipo muyowoye ichi kwa Amasa, ‘Asi iwe ndiwe wa thupi limoza na ndopa zimoza na ine? Nadi Chiuta wandilange ndipo kwakuruska usange kufuma sono iwe kuti uŵenge murongozgi wa ŵasilikari ŵane mu malo mwa Yowabu chara.’ ”

¹⁴Pa mazgu agha, Davide wakakopa mitima ya ŵaYuda wose ndipo wakaŵa nga munthu yumoza. Ntheura ŵakatuma mazgu kwa karonga kuti, “Weraniko, imwe pamoza na ŵasilikari ŵinu wose.”

¹⁵Ntheura karonga wakawera ndipo wakaya kafika ku mronga wa Yorodani. Sono ŵanthu ŵa ku Yuda ŵakiza ku Giligala kuti ŵakumane na karonga ndipo ŵakamwambuska mronga wa Yorodani.

¹⁶Pa nyengo yeneiyi, Shimeyi muBenjamini mwana wa Gera wa ku Bahurimu, wakiza pamoza na ŵaYuda kuti wakumane na Karonga Davide.

¹⁷Iyo wakaŵa na ŵanthu 1,000 ŵa fuko la Benjamini na Ziba, muteŵeti wa mu mbumba ya Sauli pamoza na ŵana ŵakhe 15 na ŵateŵeti ŵakhe 20. Wose ŵakiza luŵiro ku mronga wa Yorodani kuti wakumane na karonga.

¹⁸Ntheura ŵakambuka pa jambuko kuti ŵaŵambuske ŵa mu nyumba ya ufumu kuya ku sirya ndipo ŵakachita chose icho karonga wakakhumbanga. Apo karonga wakaŵa pafupi kwambuka mronga wa Yorodani, Shimeyi mwana wa Gera wakajiponya pasi panthazi pa karonga.

¹⁹Ndipo wakati kwa karonga, “Sekuru wane, mundigowokere kwananga kwane, mureke kukumbukaso uheni wa nda muteŵeti winu uwo nkhachita zuŵa ilo karonga sekuru wane mukafumiranga mu Yerusalemu. Karonga, mureke kuŵika mu mtima kwananga uku.

²⁰Pakuti ine nda muteŵeti winu nkhumanya kuti ndili kwananga. Wonani ndiza muhanya uno, ndine wakudanga mu mbumba yose ya Yosefe kwiza kakumana na karonga sekuru wane.”

²¹Abishayi mwana wa Zeruya wakazgora wakati, “Asi Shimeyi wakwenera kukomeka chifukwa wakatemba wakuphakazgika wa FUMU?”

²²Davide wakazgora wakati, “Kasi pali vichi pakati pa ine na imwe ŵana ŵa Zeruya? Muhanya uno mwawo ŵa chimphindikwa kwa ine. Kasi muhanya uwo munthu waliyose wangakomeka muIsraele? Asi ndamanya sono kuti muhanya uno ndine karonga muIsraele?”

²³Ndipo karonga wakati kwa Shimeyi, “Uti ukomekenge chara.” Penepapo karonga wakarapa panthazi pa Shimeyi chara.

²⁴Sono Mefibosheti, muzukuru wa Sauli wakiza kuti wakumane na karonga. Iyo kuti wakavwara skapato ku malundi ghakhe chara, nesi kumeta mwembe wakhe panji kuchapa vyakuvwara vyakhe kufuma apo karonga wakafumiramo mu Yerusalemu mpaka pa zuŵa ilo wakawerera mu mutende.

²⁵Para Mefibosheti wakafika kufuma ku Yerusalemu kuti wakumane na karonga, karonga wakati, “Kasi ukarekerangachi kuruta nane, iwe Mefibosheti?”

²⁶Mefibosheti wakazgora wakati, “Mwe karonga, sekuru wane, pakuti ine nda muteŵeti winu ndine wakupendera, nkhamuphalira Ziba muteŵeti wane kuti, ‘Undinozgere chiskaro pa mbunda kuti ndikwerepo, ndirute na karonga,’ kweni iyo wakandikanira.

²⁷Iyo wakandipusikizgira nda muteŵeti winu kwa karonga sekuru wane. Kweni karonga sekuru wane wali nga ndi mungelo. Ntheura chitani icho mukuwona kuti nchiweme.

²⁸Pakuti wose ŵa mbumba ya ŵasekuru ŵakaŵa nga ndi ŵanthu ŵakufwa panthazi pa karonga sekuru wane. Kweni mukandiŵika ine muteŵeti mukati mwa awo ŵakurya pamoza namwe. Ntheura ine ndingaŵaso na mazaza uli ghakuti ndidandaulirenge kwa karonga.”

²⁹Penepapo karonga wakazgora wakati, “Kasi ukuyowoyerachi vinandi? Ine sono nkhulangula kuti mugaŵane munda pakati pa iwe na Ziba.”

³⁰Mefibosheti wakazgora wakati, “Chara, karonga sekuru wane, murekani watore munda wose, pakuti karonga sekuru wane wafika pa kaya mu mutende.”

³¹Sono Barizilayi wa ku Gileyadi nayoso wakiza kufumira ku Rogelimu. Iyo wakamuperekezga karonga pakumwambuska mronga wa Yorodani mpaka ku sirya.

³²Barizilayi wakaŵa muchekuru chomene wa virimika 80, ndipo ndimweneuyo wakaperekanga vyakurya kwa karonga para wakakharanga ku msumba wa Mahanayimu, pakuti wakaŵa musambazi chomene.

³³Karonga wakati kwa Barizilayi, “Yambuka nane pamoza kuti tikakhare tose ku Yerusalemu ndipo kwenekura ndamkukupwerereranga.”

³⁴Kweni Barizilayi wakati kwa karonga, “Kasi ine ndichali na virimika vinandi vyakuŵira wa moyo kuti mpaka ndirute na karonga ku Yerusalemu?

³⁵Ine sono ndili na virimika 80. Kasi ine ndingamanya kupambaniska icho nchiweme na icho nchiheni? Kasi muteŵeti winu wangamanya kucheta icho wakurya panji icho wakumwa? Kasi ndingapambaniska kimbiro ka mazgu gha mwanarume panji ŵanakazi? Kasi chingaŵa chifukwa uli kuti ine nda muteŵeti winu ndiŵe mphingo yakusazgirako kwa karonga sekuru wane?

³⁶Muteŵeti winu wati wambuke mronga wa Yorodani pamoza na karonga na kumuperekezga pa ka mtunda kachoko waka. Kweni kasi nchifukwa uli karonga wakukhumba kupereka njombe ya ntheura kwa ine?

³⁷Nkhumuŵeyani, zomerezgani kuti muteŵeti winu wawerere mwakuti wakafwire ku msumba wa kwakhe na kusungika mu dindi pamoza na ŵawiske na ŵanyina. Kweni uyu muzga wa muteŵeti winu Kimuhamu mweneuyo wati wambuka pamoza na karonga sekuru wane. Ndipo karonga wakamuchitire chilichose icho wamkuwona kuti nchiweme.”

³⁸Karonga wakazgora wakati, “Kimuhamu wati warute pamoza nane ndipo ndamkuchita chilichose icho nchiweme kwa iwe. Ndipo chilichose chinyakhe icho ukukhumba kwa ine, nditi ndikuchitire.”

³⁹Penepapo ŵasilikari wose ŵakambuka mronga wa Yorodani. Ndipo para Karonga Davide nayo wakambuka wakamufyofyontha Barizilayi na kumutumbika. Ndipo Barizilayi wakawerera ku kaya kwakhe.

⁴⁰Ntheura karonga wakarutilira ulendo wakhe ku Giligala ndipo Kimuhamu wakaruta pamoza nayo. Ŵasilikari wose ŵa charu cha Yuda na hafu ŵa mu charu cha Israele ndiwo ŵakamuperekezga karonga.

⁴¹ŴaIsraele wose ŵakiza kwa karonga ndipo ŵakamufumba ŵakati, “Kasi nchifukwa uli ŵanyithu ŵaYuda ŵamwibani waka pakumwambuskani mronga wa Yorodani na kwiza namwe pamoza na mbumba yinu yose, ndiposo na ŵasilikari ŵinu wose?”

⁴²ŴaYuda ŵakazgora ŵaIsraele ŵakati, “Tamutora karonga chifukwa chakuti ise tili ndopa yimoza na karonga. Sono kasi icho chamukwiyiskani nchivichi? Kasi ise tarya vichi icho ncha karonga panji kasi watipa chawanangwa uli?”

⁴³Penepapo ŵaIsraele ŵakazgora ŵaYuda ŵakati, “Ise tili na vigaŵa khumi mu ufumu uwu, ndiposo ise tili na ŵanandi mu ufumu wa Davide kuruska imwe. Sono nchifukwa uli mukutiyuyura ntheura? Asi ise ndise tikaŵa ŵakwamba kuyowoya kuti karonga wawerere ku kaya?” Kweni ŵaYuda ŵakayowoya mwakukaripa chomene kuruska ŵaIsraele.