Read new_tumbuka_bible 2 Samuele 2 Bible Online

2 Samuele 2 - new_tumbuka_bible bible

2 Samuele 2

¹Pamanyuma pa ichi, Davide wakafumba kwa FUMU wakati, “Kasi ndingaruta kuya kakhara ku msumba uliwose mu charu cha Yuda?” FUMU yikamuzgora yikati, “Ungaruta.” Davide wakafumba FUMU kuti, “Kasi ndingaruta ku msumba ngu?” FUMU yikazgora kuti, “Ungaruta ku msumba wa Heburoni.”

²Ntheura Davide wakaruta ku Heburoni pamoza na ŵawoli ŵakhe ŵaŵiri, Ahinowamu uyo wakafuma ku Yezireyele na Abigelu, chokoro cha Nabala mweneuyo wakafuma ku Karimele.

³Davide wakizaso na ŵasilikari awo wakaŵa nawo, waliyose na mbumba yakhe ndipo ŵakaya kakhara mu mizi ya Heburoni.

⁴Penepapo ŵaYuda ŵakiza ku Heburoni ndipo kwenekura ŵakamuphakazga Davide kuti waŵe karonga wakuwusa ŵaYuda. Para Davide wakaphalirika kuti ŵanthu ŵa msumba wa Yabeshi Gileyadi ndiwo ŵakasunga Sauli,

⁵Davide wakatuma ŵanthu kuti ŵarute ku Yabeshi Gileyadi na uthenga uwu, “FUMU yimutumbikani chifukwa mukarongora kugomezgeka kwinu pakumusunga Sauli sekuru winu.

⁶FUMU yiŵe ya chisungusungu na kugomezgeka kwa imwe. Ine nane nditi ndimuchitirani uweme chifukwa muli kuchita chinthu ichi.

⁷Ntheura sono nkhumurombani kuti khwimani mtima ndipo muŵe ŵachikanga, pakuti Sauli sekuru winu wali kufwa. ŴaYuda ŵali kundiphakazga kuti ndiŵe karonga wawo.”

⁸Sono Abinara, mwana wa Neri, murongozgi wa ŵasilikari ŵa Sauli wakatora Ishibosheti mwana wa Sauli na kwiza nayo ku msumba wa Mahanayimu.

⁹Kwenekura Abinara wakamwimika Ishibosheti kuŵa karonga wa charu chose cha Israele mu vigaŵa ivi: Gileyadi, Ashere,[3] Yezireyele, Efurayimu na Benjamini.

¹⁰Ishibosheti wakaŵa na virimika 40 apo wakamba kuwusa charu cha Israele ndipo wakawusa virimika viŵiri pera. Kweni ŵaYuda ŵakaŵa pasi pa Davide.

¹¹Ndipo Davide wakaŵa karonga wa charu cha Yuda mu Heburoni kwa virimika vinkhonde na viŵiri pachanya myezi yinkhonde na umoza.

¹²Abinara mwana wa Neri pamoza na ŵasilikari ŵa Ishibosheti mwana wa Sauli wakafumamo mu Mahanayimu ndipo ŵakaruta ku Gibeyoni.

¹³Yowabu mwana wa Zeruya na ŵasilikari ŵa Davide ŵakaruta ndipo ŵakakumana nawo pa chiziŵa cha Gibeyoni. Ndipo ŵakakhara pasi, wupu wa Abinara sirya linyakhe la chiziŵa ndipo wupu wa Yowabu sirya linyakhe.

¹⁴Abinara wakati kwa Yowabu, “Rekani ŵasilikari ŵinu na ŵasilikari ŵithu ŵawuke kuti watimbane na mawoko pera apo ise tikuŵalaŵirira.” Yowabu wakati, “Nchiweme, rekani ŵawuke.”

¹⁵Ndipo ŵasilikari ŵakawuka na kuŵapenda. Ŵakaŵa 12 ŵa fuko la Benjamini pamoza na la Ishibosheti mwana wa Sauli, ndipo ŵa Davide ŵakaŵaso na ŵasilikari 12.

¹⁶Musilikari waliyose wakakora mutu wa murwani wakhe ndipo wose pamoza ŵakagwazana na malupanga ghawo mu zimbambo zawo. Ntheura wose pamoza 24 ŵakawa pasi na kufwa. Ndipo ŵakathya malo ghara ku Gibeyoni kuti, “Munda wa malupanga.”

¹⁷Sono pakaŵa nkhondo yikuru zuŵa lenelira, ndipo Abinara na ŵasilikari ŵakhe ŵakathereskeka na ŵasilikari ŵa Davide.

¹⁸Ŵana ŵatatu ŵa Zeruya nawo ŵakaŵa kwenekura, ndiwo Yowabu, Abishayi, na Asahele. Sono Asahele wakachimbiranga chomene nga ndi mbaŵara.

¹⁹Penepapo Asahele wakamuchimbilira Abinara kwambula kulaŵiska uku na uku, kweni pa Abinara pera.

²⁰Abinara wakalaŵiska kunyuma ndipo wakati wamuwona wakafumba wakati, “Kasi ndiwe Asahele?” Asahele wakazgora wakati, “Ndine nadi.”

²¹Abinara wakati kwa Asahele, “Patukira ku maryero panji ku mazere ndipo ukorepo yumoza wa ŵasilikari na kumupoka ivyo waskogha.” Kweni Asahele wakakhumba chara kureka kumurondezga Abinara.

²²Kachiŵiriso Abinara wakamuchenjezga Asahele, wakati, “Reka kundichimbilira ine. Kasi ndikukomerengechi? Ndipo para ndakukoma kasi mwana munyako Yowabu ndingawonana nayo uli?”

²³Kweni Asahele kuti wakakhumba kureka kumuchimbilira chara. Ntheura Abinara wakamulasa Asahele pa nthumbo na mukondo wakhe mpaka ukabamukira ku muwongo. Penepapo Asahele wakawa pasi na kufwira penepapo. Ŵanthu wose awo ŵakafikanga apo pakafwira Asahele, wakimiliranga.

²⁴Kweni Yowabu na Abishayi wakamuchimbilira ndipera Abinara ndipo apo dazi likanjiranga, ŵakafika pa Phiri la Ama leneilo likaŵa pafupi na Giya pa nthowa yakuya ku mapopa gha Gibeyoni.

²⁵Penepapo ŵa fuko la Benjamini ŵakawungana pamoza kuti ŵarwe nkhondo pamoza na Abinara. Ŵakapanga wupu umoza wa ŵasilikari na kwimilira pachanya pa phiri.

²⁶Penepapo Abinara wakachemerezga kwa Yowabu wakati, “Kasi tirutilirenge kukomana na yumoza na munyakhe muyirayira? Kasi ukumanya chara kuti umaliro uti uŵenge uheni chomene? Tili ŵabali ŵinu. Kasi mpaka pauli apo wamkulangula ŵasilikari ŵako kuti ŵareke kutichimbizga ise?”

²⁷Yowabu wakazgora wakati, “Nkhurapa nadi mwa Chiuta wa moyo. Urekenge kuyowoya, mphanji ŵasilikari ŵarutiliranga kuchimbilira ŵabali wawo mpaka na machero ku mulenje.”

²⁸Penepapo Yowabu wakalizga mbata ndipo ŵasilikari ŵakhe wose ŵakimilira. Kuti ŵakarutilira kuŵachimbilira ŵaIsraele chara nanga nkhurwa nawo nkhondo.

²⁹Ndipo Abinara na ŵasilikari ŵakhe wose ŵakenda usiku wose ura na kuporota dambo la Araba. Ŵakambuka mronga wa Yorodani na kwenda mulenje wose ura mpaka ŵakafika ku Mahanayimu.

³⁰Pamanyuma Yowabu wati wawerako kukuchimbizga Abinara, wakawunganya pamoza ŵasilikari ŵakhe ndipo wakasanga kuti ŵasilikari ŵa Davide 19 ŵasoŵapo pamoza na Asahele.

³¹Kweni ŵasilikari ŵa Davide wakakomapo ŵasilikari 360 ŵa Abinara kufuma mu fuko la Benjamini.

³²Ntheura ŵakatora thupi la Asahele na kulisunga mu dindi ku Betelehemu ku malo uko ŵawiske wakasungika. Yowabu na ŵasilikari ŵakhe ŵakenda usiku wose ndipo wakafika ku Heburoni ku matandakucha.