Read new_tumbuka_bible 2 Samuele 20 Bible Online

2 Samuele 20 - new_tumbuka_bible bible

2 Samuele 20

¹Sono kukaŵako ku Giligala munthu wakusuzga mu makhaliro uyo zina lakhe wakaŵa Sheba, mwana wa Bikiri wa fuko la Benjamini. Iyo wakalizga mbata ndipo wakachemerezga wakati, “Ise tilije phande mwa Davide, tilije chiharo mu mwana wa Yese. Imwe ŵaIsraele, munthu yose warute ku hema lakhe.”

²Ntheura ŵaIsraele wose ŵakawukako kwa Davide na kurondezga Sheba mwana Bikiri. Kweni ŵaYuda wakademera karonga na mtima wose kufuma ku mronga wa Yorodani kuya kafika ku Yerusalemu.

³Para Karonga Davide wakafika ku Yerusalemu, wakaŵatora ŵawoli ŵachoko ŵara awo wakaŵareka kuti ŵapwerererenge nyumba ya ufumu ndipo wakaŵaŵika mu nyumba pasi pa mlinda. Wakaŵapanga vyakurya kweni kuti wakagona nawo chara. Ntheura ŵakakhara ŵakujalirika mu nyumba mpaka pa zuŵa la kufwira kwawo ndipo wakaŵa nga ndi vyokoro.

⁴Penepapo karonga wakati kwa Amasa, “Uŵachemere pamoza ŵaYuda wose mu mazuŵa ghatatu kuti wize kwa ine ndipo iwe nawo uŵepo.”

⁵Ntheura Amasa wakaruta kuti wakaŵacheme ŵaYuda, kweni ŵakachedwerapo pa nyengo iyo karonga wakamupimira.

⁶Ndipo Karonga Davide wakati kwa Abishayi, “Sono Sheba mwana wa Bikiri watichitirenge uheni ukuru kuruska wa Abisalomu. Ntheura tora ŵasilikari ŵa ine sekuru wako na kumurondora mzire wasange misumba ya malinga na kuzgeŵerekera kwa ise.”

⁷Penepapo ŵasilikari ŵa Yowabu na ŵaKereti, ŵaPeleti na vinkhara vyose ŵakaruta kufuma ku Yerusalemu pasi pa urongozgi wa Abishayi kurondezga Sheba mwana wa Bikiri.

⁸Para ŵakaŵa pa jarawe likuru mu msumba wa Gibeyoni, Amasa wakakumana nawo. Yowabu wakavwara malaya gha nkhondo ndipo lupanga lukaŵa mu chibazi chakhe wakoroŵeka mu chiuno chakhe. Ndipo para wakendanga lupanga lura lukasoloroka na kuwa.

⁹Yowabu wakati kwa Amasa, “Kasi uli makora mubali wane?” Ndipo Yowabu wakamukora mwembe Amasa na woko lakhe la maryero na kumufyofyontha.

¹⁰Kweni Amasa kuti wakamanya chara kuti Yowabu wali na lupanga mu woko lakhe. Ntheura Yowabu wakamugwaza Amasa pa nthumbo mwakuti matumbo ghakafulumukira pasi, ndipo Amasa wakafwa penepapo. Yowabu kuti wakamugwaza kaŵiri chara. Penepapo Yowabu na mubali wakhe Abishayi ŵakarutilira kurondezga Sheba mwana wa Bikiri.

¹¹Yumoza wa ŵasilikari ŵa Yowabu wakimilira pafupi na Amasa ndipo wakati, “Yose uyo wakutemwa Yowabu ndipo ngwa Davide warondezge Yowabu.”

¹²Thupi la Amasa ilo likaŵa na ndopa pera likaŵa pakati pa msewu. Wose awo ŵakizangapo pakumuwona ŵakimiliranga. Para musilikari ŵa Yowabu wakawona ŵanthu wose ŵakimilirangapo, wakawuskapo thupi la Amasa mu msewu na kuliŵika ku thondo na kulidikiska chakuvwara.

¹³Thupi la Amasa likati lawuskikapo pa msewu, ŵasilikari wose ŵakarutilira pamoza na Yowabu na kumurondora Sheba mwana wa Bikiri.

¹⁴Sheba wakasorota mu charu cha mafuko ghose gha ŵaIsraele ndipo wakiza ku msumba wa Abelu mu chigaŵa cha Beti Maaka, ndipo ŵa mbumba ya Bikiri wose ŵakawungana na kumurondezga mu msumba.

¹⁵Ŵasilikari wose ŵa Yowabu ŵakiza na kumuzinga Sheba mu msumba wa Abelu Beti Maaka. Ŵakazenga chibumira icho chikakwera na kukhwaska linga. Ntheura ŵakamba kutimba linga mwakuti waliwiskire pasi.

¹⁶Penepapo mwanakazi yumoza wa vinjeru wakachemerezga kufuma mu msumba kuti, “Pulikani! Pulikani! Muphalirani Yowabu mwakuti ndiyowoye nayo.”

¹⁷Ndipo para Yowabu wakasenderera kufupi mwanakazi yura wakati kwa iyo, “Kasi ndiwe Yowabu?” Yowabu wakazgora wakati, “Ndine.” Mwanakazi yura wakati, “Utegherezge ivyo muteŵeti-kazi wako wati wayowoyenge.” Yowabu wakazgora wakati, “Nkhutegherezga.”

¹⁸Ntheura mwanakazi yura wakati, “Ŵanthu ŵa kale ŵakayowoyanga kuti, ‘Ruta ku Abelu kuti mukafumbe urongozgi.’ Ndipo nadi ŵanthu ŵakasanga urongozgi ku Abelu.

¹⁹Ise ndise ŵanthu ŵa mutende na ŵakugomezgeka mu charu cha Israele. Iwe ukukhumba kubwangandula msumba uwo ndi nyina wa Israele? Kasi nchifukwa uli ukukhumba kumarizga icho nchiharo cha FUMU?”

²⁰Yowabu wakazgora wakati, “Chara! Ine kuti nkhukhumba kubwangandula panji kumarizga msumba uwu chara.

²¹Vinthu kuti vili ntheura chara, kweni nkhukhumba munthu yunji zina lakhe Sheba mwana wa Bikiri uyo wakufuma ku charu cha Efurayimu. Iyo wawukira Karonga Davide. Mweneuyu yekha ndiyo mumureke kwa ise ndipo titi tiwukengepo pa msumba winu.” Mwanakazi wakati kwa Yowabu, “Titi timuponyerani mutu wakhe pachanya pa linga.”

²²Ntheura mwanakazi yura mu vinjeru vyakhe wakaruta ku ŵanthu wose ndipo wakamudumula mutu wa Sheba na kuwuponya kwa Yowabu. Penepapo Yowabu wakalizga mbata ndipo ŵasilikari ŵakawukapo mu msumba, kuruta waliyose ku chikaya chakhe. Ndipo Yowabu wakawerera ku Yerusalemu kwa karonga.

²³Yowabu wakaŵa murongozgi wa ŵasilikari wose ŵa Israele. Ndipo Benaya, mwana wa Yehoyada wakaŵa murongozgi wa ŵaKereti na ŵaPeleti awo ŵakaŵa ŵavikiriri ŵa Davide.

²⁴Adoramu wakaŵa murongozgi wa vya nchito yakuchichizga ndipo Yehoshafati mwana wa Ahiludi wakaŵa mulembi wa vya mudauko.

²⁵Sheva wakaŵa mulembi, Zadoki na Abiyatara ŵakaŵa ŵasofi.

²⁶Ndipo Ira wa ku msumba wa Yayiri wakaŵa yumoza wa ŵasofi wa Davide.