Read new_tumbuka_bible 2 Samuele 21 Bible Online

2 Samuele 21 - new_tumbuka_bible bible

2 Samuele 21

¹Mu nyengo ya kuwusa kwa Davide, mukaŵa njara yikuru pa virimika vitatu vyakurondezgana waka. Ntheura Davide wakafumba kwa FUMU ndipo FUMU yikati, “Njara iyi yiliko chifukwa Sauli na mbumba yakhe wali na mrandu wakuthiska ndopa chifukwa chakukoma ŵa mbumba ya Gibeyoni.”

²Penepapo karonga wakaŵachema ŵaGibeyoni. Sono ŵa mbumba ya Gibeyoni kuti ŵakaŵa ŵaIsraele chara, kweni ndi awo ŵakakharako ku fuko la ŵaAmori. Nangauli ŵaIsraele ŵakarapa kuŵasungilira ŵamoyo ŵaAmori, Sauli wakakhumba chomene kuŵakoma kuti ŵarongore phamphu lakhe pa ŵaIsraele na ŵaYuda.

³Davide wakaŵafumba ŵa mbumba ya Gibeyoni wakati, “Kasi ndingamuchitirani chinthu uli? Kasi ndingamuphepiskani uli kuti mutumbike ŵanthu ŵa FUMU?”

⁴Ŵa mbumba ya Gibeyoni ŵakazgora ŵakati, “Mrandu uwo uli pakati pa ise na Sauli na mbumba yakhe kuti ungalipirika na siliva panji golide chara. Ndipo kuti nkhwa ise kuti tikome waliyose mu ŵaIsraele chara.” Davide wakafumba wakati, “Kasi mukukhumba kuti ndimuchitirani vichi?”

⁵Ŵa mbumba ya Gibeyoni ŵakazgora karonga ŵakati, “Munthu uyo wakatimara petu ndiposo wakanozgeraso kutikoma mwakuti tireke kuŵa na malo ghakukharapo mu charu cha Israele,

⁶mweneuyo mutipe ŵana ŵakhe ŵanarume ŵankhonde na ŵaŵiri kuti tiŵapayike pa khuni panthazi pa FUMU ku Gibeya, msumba wa Sauli, karonga wakusankhika na FUMU.” Ndipo karonga wakati, “Nditi ndiŵaperekenge kwa imwe.”

⁷Kweni karonga wakamureka wamoyo Mefibosheti mwana wa Yonatani, muzukuru wa Sauli chifukwa cha chirapo icho Karonga Davide na Yonatani mwana wa Sauli wakachita panthazi pa FUMU.

⁸Karonga wakatora Arimoni na Mefibosheti ŵana ŵanarume ŵaŵiri ŵaRizipa mwana mwanakazi wa Aya, ŵeneawo Sauli wakababamo. Wakatoraso ŵana ŵanarume ŵankhonde ŵa Merabu mwana mwanakazi wa Sauli ŵeneawo Adiriyele mwana wa Barizilayi wakababamo mwa Mehola.

⁹Wakaŵapereka ku ŵa mbumba ya Gibeyoni awo ŵakaŵakoma na kuŵapayika pa khuni ku phiri panthazi pa FUMU. Wose ŵankhonde na ŵaŵiri ŵakafwira pamoza. Ŵakakomeka mu mazuŵa ghakudanga gha vuna apo ŵakambanga waka kuvuna nyauti.

¹⁰Sono Rizipa mwana mwanakazi wa Aya wakatora chigudulu na kujizengera msasa pa jarawe apo pakaŵa vitanda vinkhonde na viŵiri vira ndipo wakakharapo kufuma pa nyengo ya kuvunira nyauti mpaka pa nyengo ya kurokwera vura. Pa nyengo ya muhanya wakaŵinganga viyuni vya mudera ndipo na usiku wakalindanga vikoko kuti vireke kwiza karya vitanda vira.

¹¹Para Davide wakapulika icho wakachita Rizipa mwana wa Aya, muwoli muchoko wa Sauli,

¹²wakaruta kuya katora viwangwa vya Sauli na vya mwana wakhe Yonatani kufuma ku ŵanthu ŵa ku Yabeshi Gileyadi. Iwo ŵakiba viwangwa ivi kufuma pa baraza la chisanisani ku Beti Shani uko ŵaFilisiti ŵakapayikira mathupi ghawo pa khuni, pa zuŵa ilo ŵakakomera Sauli ku Gilibowa.

¹³Wakiza navyo viwangwa vya Sauli na Yonatani mwana wakhe kufuma kwenekura ndipo wakatoraso viwangwa vya ŵankhonde na ŵaŵiri awo ŵakapayika na kuviwunjika pamoza.

¹⁴Ŵakavisunga mu dindi viwangwa vya Sauli na Yonatani mu charu cha Benjamini mu msumba wa Zela, uko wakasungika Kishi wiske wa Sauli. Ndipo ŵakachita vyose ivyo karonga wakalangula. Pamanyuma pa ichi, Chiuta wakapulika kuŵeyerera kwa ŵanthu kurombera charu.

¹⁵ŴaFilisiti ŵakarwaso nkhondo na ŵaIsraele, ndipo Davide ŵasilikari ŵakhe ŵakaruta kuya karwa na ŵaFilisiti. Pamanyuma Davide wakavuka chomene.

¹⁶Ishibi Benobu, yumoza wa mphapu ya Rafa, viŵanthu vikuruvikuru, mweneuyo wakaŵa na mukondo wa mkuŵa uzitu wakhe wakukwana makilogiramu ghatatu na hafu, wakakhumba kukoma Davide. Iyo wakavwara lupanga luphya mu chiuno chakhe.

¹⁷Kweni Abishayi, mwana wa Zeruya wakamuthaska Davide pakumurotokera muFilisiti yura na kumukoma. Penepapo ŵasilikari ŵa Davide ŵakarapira Davide kuti, “Imwe karonga kuti mwizamkurutaso nase ku nkhondo chara mzire imwe mufwe chifukwa imwe ndimwe nyali ya Israele.”

¹⁸Pamanyuma pa ichi, pakawukaso nkhondo yinyakhe na ŵaFilisiti iyo yikachitikira ku Gobu. Pa nkhondo iyi Sibekayi wa mbumba ya Husha wakakoma Safu yumoza wa mphapu ya Rafa, viŵanthu vikuruvikuru.

¹⁹Yikaŵaso nkhondo yinyakhe na ŵaFilisiti ku Gobu ndipo pa nkhondo iyi Elihanani mwana wa Yaare Oregimu wa ku Betelehemu wakakoma mubali wa Goliyati wa mbumba ya Giti mweneuyo kuti mukondo wakhe ukaŵa nga ndi muchiko wa chakurukira salu.

²⁰Yikaŵaso nkhondo yinyakhe ku Gati, kweneuko kukaŵa munthu wa musinkhu ukuru uyo wakaŵa na minwe yinkhonde na umoza ku woko lirilose ndiposo vigunwe vinkhonde na chimoza ku lundi lirilose, vyose pamoza vikaŵa 24. Nayo wakaŵa wa mphapu ya viŵanthu vitali na vyankhongono.

²¹Chinkhara ichi, chikati chayuyura ŵaIsraele, Yonatani mwana wa Shimeya, mwana munyakhe wa Davide wakachikoma.

²²Wose ŵanayi aŵa ŵakaŵa ŵanthu ŵakuruŵakuru ŵa ku msumba wa Gati ndipo ŵakakomeka na Davide na ŵasilikari ŵakhe.