Read new_tumbuka_bible 2 Samuele 22 Bible Online

2 Samuele 22 - new_tumbuka_bible bible

2 Samuele 22

¹Davide wakimba sumu yakurumba FUMU, para yikati yamuthaska ku ŵarwani wose na kwa Sauli.

²Iyo wakimba sumu wakati, “FUMU ndiyo jarawe lane, ndiyo linga lane na muthaski wane.

³Chiuta wane ndiyo jarawe lane, mwa mweneuyo nkhubisamamo. Chiuta ndi nguru yane, ndiyo lusengwe lwane na chiponosko chane. Chiuta ndiyo linga lane, malo ghane ghakubisamamo na Muponoski wane, Iyo wakundiponoska ku ŵanthu ŵa vivulupi.

⁴Ine nkhuchema kwa FUMU, yeneiyo yikwenera kurumbika, ndipo yikundiponoska ku ŵarwani ŵane. Rumbani FUMU!

⁵“Majigha gha nyifwa ghakandizingirizga, mwezga wa pharaniko ukundigundizga.

⁶Vikondo vya ku malo gha ŵakufwa vikandikora malundi, misampha ya nyifwa yikandijandizga.

⁷Mu kukweŵeka kwane, nkhachema kwa FUMU, kwa Chiuta wane ndiko nkhachemerezga. Wali mu nyumba yakhe, wakapulika mazgu ghane, kulira kwane kukapulikikwa kwa iyo.

⁸“Penepapo charu chikasunkhunyika na kundindima, malufura ghakuchanya ghakasunkhunyika, ghakandindima chifukwa FUMU yikakaripa.

⁹Josi likafuma mu mphuno zakhe, moto wakumyangura ukafuma mu mlomo wakhe, makara ghakulilima ghakafuma mu mlomo wakhe.

¹⁰Wakakerula mtambo na kukhilira pasi, mdima ukuru ukaŵa kusi ku malundi ghakhe.

¹¹Wakagara pa mukerubi na kuwuruka, wakawoneka wakuwuruka mukati mu mphepo.

¹²Wakazgora mdima kuŵa chidiko chakhe, maŵingu gha vura gha bii, ghakaŵa hema lakhe.

¹³Kufuma ku kung'azima kwa uŵapo wakhe, makara gha moto ghakagolera.

¹⁴“FUMU yikadudumira kuchanya, Chiuta Chikurukuru wakayowoya mazgu ghakhe.

¹⁵Wakaponya mivwi kuŵambininiska ŵarwani, kududumira kwa ŵaleza kukaŵachimbizga.

¹⁶Pasi pa nyanja pakawoneka, malufura gha charu ghakakhara pakweru, para FUMU yikaŵachenya mwa ukari, para yikathuta muvuchi mu mphuno zakhe.

¹⁷“FUMU yikanyoroska woko lakhe kuchanya na kundikora, yikandizuwura mu maji ghanandi.

¹⁸Yikandithaska ku ŵarwani ŵane ŵankhongono, ŵeneawo ŵakanditinkhanga, pakuti ŵakaŵa ŵankhongono kuruska ine.

¹⁹Wakandizira pa nyengo ya visuzgo vyane, kweni FUMU yikaŵa nchirikizgo yane.

²⁰Yikanditorera ku malo ghasani, yikandithaska chifukwa yikakondwera mwa ine.

²¹“FUMU yikandipa njombe kwakuyana na urunji wane. Yikandipa njombe pakuti ndine wambula kalema.

²²Ine nkhusungilira nthowa za FUMU, ndilije kuchitapo chiheni pakumureka Chiuta wane.

²³Pakuti malangulo ghakhe ghose nkhughasungilira, nkhapatukako ku marango ghakhe chara.

²⁴Nkhaŵa wambula kafukwa panthazi pakhe, nkhajisunga pakureka kuchita uheni.

²⁵Ntheura FUMU yandipa njombe, kwakuyana na urunji wane, nga ndi umo yikuwonera kuti ndili wakuphotoka.

²⁶“Awo mbakugomezgeka kwa imwe, namwe mukujirongora kuŵa wakugomezgeka, Awo mbambula kalema, namwe mukujirongora kuŵa ŵambula kalema.

²⁷Ku awo mbakuphotoka, namwe mukujirongora kuŵa ŵakuphotoka. Awo mbakubendera mu mtima, imwe mukujirongora kuŵa wakuchenjera.

²⁸Imwe mukuthaska awo ŵakujiyuyura, kweni awo ŵakujikuzga mukuŵawona, kuti muŵakhizgire pasi.

²⁹“Nadi, imwe, Mwe FUMU, ndimwe nyali yane, FUMU, ndimwe mukuŵala mu mdima wane.

³⁰Na wovwiri winu, ndingathereska mpingo wa nkhondo, ndipo kuŵa pamoza na Chiuta wane, ndingamanya kuŵenuka linga.

³¹“Imwe Chiuta, nthowa zinu ndizakufikapo, mazgu gha FUMU ghakuneneska. Chiuta ndi nguru ku wose, awo ŵakugomezga na kubisama mwa iyo.

³²Pakuti Chiuta munyakhe palije, kweni imwe FUMU pera. Jarawe linyakhe lakubisamamo palije, kweni imwe Chiuta withu pera.

³³Chiuta mweneuyu ndiyo linga lane lakukhora, ndiyo wakuwuskapo urwani mu nthowa zane.

³⁴Wakukhozga malundi ghane nga ndi gha nyiska, wakundisungilira makora mu malo ghakukwera.

³⁵Wakusambizga mawoko ghane karwero ka nkhondo, mwakuti ghakumanya kugoŵa uta wa mkuŵa.

³⁶“Mwe FUMU, mukundipa nguru ya chiponosko, ndipo wovwiri winu wandikwezga.

³⁷Mukukuzga nthowa zane zakwendamo, ndipo malundi ghane kuti ghakuteremuka chara.

³⁸Nkhaŵachimbilira ŵarwani ŵane na kuŵathereska, kuti nkhawerere chara mpaka nkhaŵamara petu.

³⁹Nkhaŵatimba na kuŵawiskira pasi, mwakuti ŵakatondeka na kuwuka wuwo, nkhaŵakandirizgira pasi na malundi ghane.

⁴⁰Imwe mukandipa nkhongono zakurwera nkhondo, ŵarwani ŵane mukaŵathereskera pasi pa malundi ghane.

⁴¹Ndimwe mukandichimbizgira ŵarwani ŵane, wose awo ŵakanditinkhanga nkhaŵamara petu.

⁴²Ŵakachemerezga, kweni pakaŵavye wakuŵaponoska, ŵakalirira kwa FUMU, kweni yikaŵazgora chara.

⁴³Nkhaŵathibura nga ndi fuvu, nkhaŵang'anya na kuŵakandira pasi, nga ndi mathipa gha pa msewu.

⁴⁴“Mukandithaska ku awo ŵakulimbana nane, mukandisungilira kuti ndiwuse mafuko Ŵanthu awo nkhaŵamanya chara ŵakanditeŵetera.

⁴⁵Ŵalendo ŵakiza kwa ine wakukhwaŵa pasi, ŵakati ŵapulika vya ine wakandilambira.

⁴⁶Ŵalendo ŵakathika lusoko, ŵakiza ŵakumbwambwantha, kufumira mu malinga ghawo.

⁴⁷“FUMU njamoyo, ndiyo Jarawe lane lakutumbikika, wathuwuskike Chiuta, Jarawe na Muponoski wane.

⁴⁸Chiuta ndiyo wakandovwira kuwezgera nduzga, wakuthereska mafuko kuti ghaŵe pasi pane.

⁴⁹Chiuta wakandithaska ku ŵarwani ŵane. “Mukandikwezga kuŵa pachanya pa ŵarwani ŵane, mukandithaska ku ŵanthu ŵakuchita vivulupi.

⁵⁰Pa chifukwa ichi nkhumurumbani imwe, Mwe FUMU, mukati mu ŵamitundu, na kwimba sumu zakurumba zina linu.

⁵¹Chiuta wakumupa karonga wakhe kutonda kukuru, wakurongora chisungusungu ku wakuphakazgika wakhe, kwa Davide na mphapu yakhe kwa muyirayira.”