Read new_tumbuka_bible 2 Samuele 24 Bible Online

2 Samuele 24 - new_tumbuka_bible bible

2 Samuele 24

¹FUMU yikaŵakwiyiraso ŵaIsraele ndipo yikakhuŵirizga Davide kuti waŵawukire pakuyowoya kuti, “Ruta ukapende ŵaIsraele na ŵaYuda.”

²Ntheura karonga wakamuphalira Yowabu pamoza na ŵarongozgi ŵa ŵasilikari awo ŵakaŵa nayo kuti, “Rutani mwende mu mafuko ghose gha Israele kufuma mu charu cha Dani mpaka ku Beyeresheba. Mukaŵapende ŵasilikari wose mwakuti ndimanye unandi wawo.”

³Kweni Yowabu wakazgora karonga wakati, “FUMU, Chiuta winu wasazgirepo ŵasilikari nanga ŵangaŵa ŵanandi uli kwandaniska na 100, ndipo maso gha karonga sekuru wane yichiwone ichi. Kweni kasi nchifukwa uli karonga sekuru wane wakukhumba kuchita ichi?”

⁴Ndipouli mazgu gha karonga ghakaruska gha Yowabu na gha ŵarongozgi ŵa ŵasilikari. Ntheura ŵakafumapo panthazi pa karonga kuruta kuya kaŵapenda ŵaIsraele.

⁵Ŵanthu ŵara ŵakambuka mronga wa Yorodani ndipo ŵakamba kupenda ŵanthu mu msumba wa Aroyere, uwo uli pakatikati pa chidambo mu charu cha Gadi mpaka ŵakaya kafika ku msumba wa Yazere.

⁶Ŵakaruta ku chigaŵa cha Gileyadi na ku Kadeshi mu charu cha ŵaHiti.[11] Ŵakarutaso mu charu cha Dani[12] ndipo kufuma kura ŵakazingirira kuya Sidoni.

⁷Pamanyuma ŵakiza ku linga la Ture na ku misumba yose ya ŵaHivi na ya ŵaKanani. Wakafumako kura na kuruta ku Beyeresheba ku cha ku mwera kwa charu cha Yuda.

⁸Ntheura ŵakati ŵenda mu charu chose, wakiza ku Yerusalemu pakati pajumphapo myezi yinkhonde na yinayi na mazuŵa 20.

⁹Ndipo Yowabu wakiza kapereka kwa karonga unandi wa ŵasilikari awo ŵakapendeka. Mu charu cha Israele mukaŵamo ŵanarume ŵankhongono ŵakukwana 800,000 awo ŵangarwa nkhondo. Ndipo mu charu cha Yuda mukaŵa ŵanarume ŵankhongono ŵakukwana 500,000 awo ŵangaraŵa nkhondo.

¹⁰Davide wakasuzgika chomene mu mtima wakhe pamanyuma pakupenda ŵasilikari wose ŵara ndipo wakuti kwa FUMU, “Ndananga chomene pa icho ndachita. Ntheura Mwe FUMU, nkhumuŵeyani wuskanipo kwananga kwa muteŵeti winu. Ndachita chinthu cha kupusa chomene.”

¹¹Para Davide wakawuka na mulenje, mazgu gha FUMU ghakiza kwa nchimi Gadi, muwoni wa Davide ndipo wakati,

¹²“Ruta ukamuphalira Davide kuti, FUMU yikuti nkhukupa vinthu vitatu. Usankhepo chimoza icho ukukhumba kuti ndichite kwa iwe.”

¹³Ntheura nchimi Gadi wakaruta kwa Davide ndipo wakati kwa iyo, “Kasi ukukhumba kuti kuŵe njara mu charu chako virimika vitatu? Panji ukukhumba kuti uchimbirenge waka ku ŵarwani ŵako pa myezi yitatu para wakukuchimbizga? Panji ukukhumba kuti kuŵe nthenda yakofya mu charu chako pa mazuŵa ghatatu? Sono ughanaghane, undipe zgoro kuti nkhaŵaphalire awo ŵangundituma.”

¹⁴Penepapo Davide wakati kwa Gadi, “Ine ndili mu visuzgo vikuru chomene. Rekani tijiŵike mu mawoko gha FUMU, pakuti yili na chiwuravi chikuru. Kweni tireke kujiŵika mu mawoko gha ŵanthu.”

¹⁵Ntheura FUMU yikatuma nthenda yakofya pa ŵaIsraele kwamba na mulenje mpaka pa nyengo iyo yikamikira ndipo ŵanthu ŵakukwana 70,000 ŵakafwa kufuma ku charu cha Dani mpaka ku Beyeresheba.

¹⁶Ndipo para mungelo wakanyoroskera woko lakhe ku Yerusalemu kuti wakome ŵanthu ŵa msumba ura, FUMU yikagowoka ndipo yikati kwa mungelo wakukoma yura, “Mbwenu! Sono wezgako woko!” Pa nyengo iyi mungelo wa FUMU yura wakaŵa pa luwugha lwa tirigu lwa Arawuna, muYebusi.

¹⁷Para Davide wakawona mungelo uyo wakakomanga ŵanthu wakati kwa FUMU, “Ine ndine ndili kwananga na kuchita uheni. Kweni ŵanthu aŵa ndi mberere. Kasi ŵachitachi? Nkhumuŵeyani kuti mulange waka ine na ŵa mu mbumba ya ŵadada.”

¹⁸Pa zuŵa lenelira nchimi Gadi wakiza kwa Davide ndipo wakati kwa iyo, “Rutani, mukazenge jochero la FUMU pa luwugha lwa tirigu lwa Arawuna, muYebusi.”

¹⁹Penepapo Davide wakachita nga ndi umo FUMU yikalangulira mwa nchimi Gadi.

²⁰Para Arawuna wakalaŵiska, wakawona Karonga Davide na ŵateŵeti ŵakhe ŵakwiza kwa iyo. Ntheura wakaruta ndipo wakasindamira pasi panthazi pa karonga kupereka nchindi.

²¹Arawuna wakafumba karonga wakati, “Nchifukwa uli karonga sekuru wane wiza kwa muteŵeti wakhe?” Davide wakazgora wakati, “Ndiza kuti ndigule luwugha lwa tirigu kwa iwe mwakuti ndiyizengerepo FUMU jochero kuti nthenda yakofya yifumemo mu ŵanthu.”

²²Penepapo Arawuna wakati kwa Davide, “Karonga, sekuru wane, torani ndipo mupereke icho nchiweme kwa imwe. Ng'ombe zakuti mupereke kuŵa sembe yakocha izi ndiposo vya kubulira tirigu na magoliwoli gha ng'ombe kuti ghaŵe khumi agha.”

²³Vyose ivi, mwe karonga, Arawuna wakupereka kwa karonga, FUMU, Chiuta winu wapokerere waka sembe zinu.

²⁴Kweni karonga wakati kwa Arawuna, “Chara, nkhukhumba kuti ndigule kwa iwe. Kuti ndingapereka sembe yakocha kwa FUMU, Chiuta wane chara kwambula kuti ndalipirapo kanthu.” Ntheura Davide wakagula luwugha lwa tirigu na ng'ombe zira pa mtengo wa ndarama za siliva zakukwana 50.

²⁵Ntheura Davide wakayizengera FUMU jochero penepara na kupereka sembe yakocha na ya wenenawene. Penepapo FUMU yikapulika kuŵeyerera uko Davide wakachitira charu ndipo nthenda yakofya nayo yikafumako ku ŵaIsraele.