Read new_tumbuka_bible 2 Samuele 3 Bible Online

2 Samuele 3 - new_tumbuka_bible bible

2 Samuele 3

¹Nkhondo pakati pa mbumba ya Sauli na mbumba ya Davide, yikatora nyengo yitali chomene. Davide wakakulirakulira mu nkhongono apo nyumba ya Sauli nkhongono zikacheperachepera.

²Ŵana ŵa Davide awo ŵakababikira mu Heburoni ŵakaŵa aŵa: Wa uŵere wakaŵa Amunoni mweneuyo nyina wakaŵa Ahinowamu wa ku Yezireyele.

³Mwana wa chiŵiri wakaŵa Kileyabu mweneuyo nyina wakaŵa Abigelu, chokoro cha Nabala wa ku Karimele. Wa chitatu wakaŵa Abisalomu mweneuyo nyina wakaŵa Maaka, mwana mwanakazi wa Talimayi karonga wa ku Geshuru.

⁴Mwana na chinayi wakaŵa Adoniya mweneuyo nyina wakaŵa Hagiti. Wa chinkhonde wakaŵa Shefatiya uyo nyina wakaŵa Abitala.

⁵Wa chinkhonde na chimoza wakaŵa Itireyamu uyo nyina wakaŵa Egila. Ŵana wose aŵa ŵakababika apo Davide wakaŵa mu Heburoni.

⁶Nyengo yose apo pakaŵiranga nkhondo pakati ŵasilikari ŵa Sauli na ŵa Davide, Abinara wakamba kuŵa wankhongono kuruska waliyose mu ŵasilikari ŵa mbumba ya Sauli.

⁷Sono Sauli wakaŵa na muwoli muchoko zina lakhe Rizipa, mwana mwanakazi wa Aya. Ndipo Ishibosheti wakati kwa Abinara, “Kasi nchifukwa uli ukunjira mwa Rizipa muwoli wa ŵadada?”

⁸Abinara wakakaripa chomene chifukwa cha mazgu agho Ishibosheti wakayowoya, ndipo Abinara pakuzgora wakati, “Kasi iwe ukughanaghana kuti ine ndili nga ndi ncheŵe iyo yikurondezga ŵaYuda ŵarwani ŵithu? Kwamba pakudanga, ine ndaŵa wakugomezgeka kwa Sauli, ŵawuso, ŵabali ŵakhe na ŵabwezi ŵakhe. Ine kuti nkhamuperekanipo kwa Davide murwani withu chara kuti wamuthereskani. Kweni muhanya uno iwe ukundipacha kuti nkhunjira mu mwanakazi uyu, Rizipa!

⁹Chiuta wandilange ine Abinara ndipo kwakuruska usange nkhureka kumuchitira Davide icho FUMU yikapangana mwakurapa kwa iyo,

¹⁰kuti yizamkuwuskako ufumu kufuma mu nyumba ya Sauli na kwimika chizumbe cha Davide kuti wawuse Israele na Yuda kufuma ku Dani mpaka ku Beyeresheba.”

¹¹Para Ishibosheti wakapulika mazgu gha Abinara kuti wakayezga kuyowoyapo chilichose chara, chifukwa wakamba kumopa chomene.

¹²Abinara wakatuma nthumi kuti zirute kwa Davide ku Heburoni kukamufumba kuti, “Kasi charu ichi wawusenge ndi njani?” Tiyeni tipangane ndipo ine nditi ndimovwirani kukopa ŵaIsraele wose kuti ŵaŵe ŵinu.

¹³Davide wakazgora wakati, “Nchiweme. Ine nditi ndichite phangano na iwe. Kweni nkhukhumba chithu chimoza kufuma kwa iwe. Para ukwiza kwa ine, ungizanga wekha chara, pekhapekha wize na Mikala mwana mwanakazi wa Sauli.”

¹⁴Ndipo Davide wakatuma nthumi kuti zirute kwa Ishibosheti mwana wa Sauli, “Undipe muwoli wane Mikala mweneuyo nkhamujalira na vikumba vya mavwaro gha ŵaFilisiti 100.”

¹⁵Ntheura Ishibosheti wakatuma nthumi kuti zikamutore Mikala ku mufumu wakhe Palitiyele mwana wa Layishi.

¹⁶Mufumu wakhe Palitiyele wakamurondezganga kumanyuma uku wakulira masozi nthowa yose mpaka wakaya kafika ku Bahurimu. Penepapo Abinara wakati kwa iyo, “Werera urutenge ku nyumba yako.” Ndipo wakawerera.

¹⁷Sono Abinara wakayowoyeskana na ŵarara ŵaIsraele ndipo wakati kwa iwo, “Mu nyengo iyo yajumphapo, mukakhumbanga kuti Davide waŵe karonga winu.

¹⁸Sono muchite ichi, chifukwa FUMU yili kuyowoya kwa Davide kuti, ‘Kwizira mwa iwe Davide muteŵeti wane, nditi ndithaske ŵanthu ŵane ŵaIsraele kufuma ku ŵaFilisiti na ku ŵarwani ŵawo ŵanyakhe wose.’ ”

¹⁹Abinara wakayowoyaso ku ŵanthu ŵa fuko la Benjamini. Pamanyuma wakaruta ku Heburoni kuti wakamuphalire Davide vyose ivyo ŵaIsraele na ŵaBenjamini wose wakazomerezgana ŵachitenge.

²⁰Para Abinara, uyo wakaŵa na ŵasilikari 20 ŵakafika kwa Davide ku Heburoni, Davide wakamunozgera chiphikiro Abinara pamoza na ŵasilikari ŵakhe ŵara.

²¹Ndipo Abinara wakati kwa Davide, “Ndizomerezgani sono kuti ndirutenge mwa kuti nkhawunganye ŵaIsraele wose kuti ŵize kwa imwe karonga sekuru wane mwakuti ŵizakachite phangano na imwe ndipo imwe muŵawuse wose nga ndi umo mtima winu ukukhumbira.” Ntheura Davide wakamuzomerezga kuti warutenge mu mutende.

²²Pa nyengo yeneiyo ŵasilikari ŵa Davide wakafika kufumira ku nkhondo pamoza na Yowabu uku ŵayegha vya kuskogha vinandi. Kweni Abinara kuti wakaŵa na Davide ku Heburoni chara, wakaŵa waruta kale pakuti wakamuwezga kuti warutenge mu mutende.

²³Para Yowabu na ŵasilikari wose awo ŵakaŵa nawo ŵakafika, ŵakaphalirika kuti Abinara mwana wa Neri wangwiza kwa karonga ndipo karonga wamuwezga kuti warute mu mutende.

²⁴Penepapo Yowabu wakaruta kwa karonga ndipo wakati kwa iyo, “Kasi karonga mwachitachi? Abinara wangwiza kwa imwe. Nchifukwa uli mwamureka waka kuti warutenge. Wonani waruta!

²⁵Kasi mukumumanya Abinara mwana wa Neri? Iyo wangwiza kuti wamupusiskani na kumanya mendero ghinu na kuwona chilichose icho imwe mukuchita.”

²⁶Ndipo Yowabu wakati wawerako kwa Davide, wakatuma ŵanthu kuti wakamuwezge Abinara. Ŵakati ŵamusanga pa malo gha maji ghakuchemeka Sira, wakiza nayo kweni Davide kuti wakachimanya ichi chara.

²⁷Sono para Abinara wakafika ku Heburoni, Yowabu wakamutorera pa mphepete pafupi na chipata nga ndi para wakukhumba kuyowoya nayo mu ubende. Ŵali kwenekura, Yowabu wakamugwaza Abinara pa nthumbo ndipo wakafwa penepapo. Wakachita ichi kuti wawezge nduzga pa Abinara chifukwa wakakoma munung'una wakhe Asahele.

²⁸Pamanyuma para Davide wakapulika za ichi wakati, “Ine pamoza na ufumu wane kuti tili na mrandu panthazi pa FUMU kwa muyirayira chara chifukwa chakukoma Abinara mwana wa Neri.

²⁹Mrandu wakukoma uwu uli pa mutu wa Yowabu na pa mbumba yose ya ŵawiske. Ntheura mbumba ya Yowabu yireke kuŵapo yambula na yumoza wa nthenda ya kusurura mafira, panji wa vyoni, panji wakupendera, panji wakukomeka na lupanga, panji kufwa na njara.”

³⁰Yowabu na munung'una wakhe Abishayi ndiwo wakakoma Abinara chifukwa wakakoma munung'una wawo Asahele mu nkhondo ku Gibeyoni.

³¹Penepapo Davide wakalangula Yowabu na ŵasilikari awo wakaŵa nawo kuti, Parurani malaya ghinu na kuvwara vigudulu mwendenge panthazi pa Abinara uku mukutengera. Karonga Davide wakarondezga kasarasara yura.

³²Abinara wakasungika ku msumba wa Heburoni, ndipo karonga wakalira chomene ku dindi. Ŵanthu ŵanyakhe nawo wakalira ntheura pera.

³³Karonga Davide, pakumulira Abinara wakati, “Kasi Abinara wangafwa nga ndi umo chindere chikufwira?

³⁴Mawoko ghako kuti ghakakakika chara, malundi ghako kuti ghakaŵa mu unyoro chara. Ndipouli wafwa nga ndi munthu uyo wakomeka na ŵachigaruka!” Ŵanthu wose ŵakamuliraso Abinara.

³⁵Penepapo ŵasilikari ŵakayezga kumukoserezga Davide kuti warye chakurya apo dazi likaŵa lichali waka. Kweni Davide wakarapa wakati, “Chiuta wandilange ndipo wasazgirepo kwakuruska usange nkhucheta chakurya panji chilichose pambere dazi lindanjire.”

³⁶Ŵanthu wose ŵakachipulikiska ichi ndipo chikaŵa kondweska chomene. Nadi chose icho karonga wakachitanga, chikaŵa kondweskanga ŵanthu.

³⁷Ntheura dazi lira ŵasilikari wose na ŵaIsraele wose ŵakamanya kuti karonga wakaŵa na khumbo la kukoma Abinara mwana wa Neri chara.

³⁸Penepapo karonga wakati ku ŵasilikari ŵakhe, “Kasi mukumanya chara kuti nduna ndiposo munthu mukuru chomene wafwa muhanya uno mu Israele?

³⁹Ndipo muhanya uno, nangauli ndine karonga wakuphakazgika nkhongono zandimalira. Ŵana aŵa ŵa Zeruya mbanonono chomene kwa ine. FUMU yekha ndiyo yiwezgere nduzga munthu uyo wachita chiheni ichi kwakuyana na uheni wakhe.”