Read new_tumbuka_bible 2 Samuele 4 Bible Online

2 Samuele 4 - new_tumbuka_bible bible

2 Samuele 4

¹Para Ishibosheti mwana wa Sauli wakapulika kuti Abinara wali kufwa mu msumba wa Heburoni, nkhongono zikamumalira ndipo ŵaIsraele wose ŵakaŵa na wofi ukuru chomene.

²Sono Ishibosheti wakaŵa na ŵanthu ŵaŵiri awo ŵakaŵa ŵarongozgi ŵa ŵasilikari, yumoza wakaŵa Baana ndipo munyakhe wakaŵa Rekabu. Iwo ŵakaŵa ŵana ŵa Rimoni wa fuko la Benjamini ndipo wakakharanga ku Beyeroti. Beyeroti chikaŵa chigaŵa chimoza cha ŵanthu ŵa fuko la Benjamini.

³Ŵanthu ŵa ku Beyeroti ŵakachimbilira ku muzi wa Gitayimu ndipo ŵakukhara kwenekura nga mbalendo mpaka muhanya uno.

⁴Yonatani mwana wa Sauli wakaŵa na mwana uyo wakapendera malundi, zina lakhe Mefibosheti. Iyo wakaŵa na virimika vinkhonde apo wakapulikiranga za uthenga wa nyifwa ya Sauli na Yonatani kufuma ku Yezireyele. Mulezi wakhe wakati wapulika za makani gha nyifwa ya Sauli na Yonatani wakamutora na kuchimbira nayo, kweni pakuti wakachimbiranga mwaluŵiro, mwana yura wakawa pasi na kuzgoka chilima.

⁵Sono Rekabu na Baana ŵana ŵaRimoni ŵakaruta ku nyumba ya Ishibosheti ndipo wakafika kwenekura apo nyengo yikaŵa 12 koloko. Ishibosheti wakapumulanga chifukwa chakocha kwa dazi.

⁶Iwo ŵakaya kanjira waka mu nyumba mukati nga ndi para ŵakukhumba kutora tirigu ndipo ŵakamugwaza Ishibosheti pa nthumbo. Penepapo Rekabu na mwana munyakhe Baana ŵakafuma mwa chisisi na kuruta.

⁷Iwo ŵakati ŵanjira mu nyumba Ishibosheti wakaŵa wagona pa chitara chakhe ku chipinda. Ŵakamugwaza na kumukoma ndipo ŵakadumulako mutu wakhe. Penepapo ŵakatora mutu wakhe na kuruta nawo pakwenda usiku wose kwizira ku nthowa ya ku Araba.

⁸Mutu wa Ishibosheti ura, ŵakiza nawo kwa Davide ku Heburoni ndipo ŵakati kwa karonga, “Mutu wa Ishibosheti mwana wa Sauli murwani winu uyo wakakhumbanga kumukomani uwu. Muhanya uno FUMU yazomerezga kuti imwe karonga sekuru wane muwezgere nduzga pa Sauli na pa mphapu yakhe.”

⁹Davide wakazgora Rekabu na munung'una wakhe Baana ŵana ŵa Rimoni wa ku Beyeroti kuti, “Nkhurapira mwa FUMU iyo yandiponoska ku maunonono yose,

¹⁰para munthu yunji wakandiphalira kuti Sauli wafwa, wakaghanaghananga kuti wandizira na uthenga uweme. Ntheura nkhamutora na kumukoma ku Zikilagi. Yeneiyi ndiyo yikaŵa njombe yeneiyo nkhamupa pakwindizira na uthenga wakhe.

¹¹Asi chomene kuti kuruskenge para ŵanthu ŵaheni ŵakukoma munthu wambula chifukwa uyo wakaŵa mu nyumba yakhe wagona pa chitara chakhe. Kasi ndingareka uli kuwezgera nduzga ndopa zakhe pa imwe na kumumarizgani nkhanira pa charu?”

¹²Penepapo Davide wakalangula ŵasilikari ŵakhe kuti waŵakome. Ŵakaŵadumula mawoko na malundi ghawo, ndipo mathupi ghawo ŵakaya kapayika pa nkhuni mu mphepete mwa chiziŵa ku msumba wa Heburoni. Kweni wakatora mutu wa Ishibosheti na kuwusunga mu dindi pamoza na Abinara mu Heburoni.