Read new_tumbuka_bible 2 Samuele 5 Bible Online

2 Samuele 5 - new_tumbuka_bible bible

2 Samuele 5

¹Penepapo mafuko ghose gha Israele ghakiza kwa Davide ku msumba wa Heburoni, ndipo ghakati, “Ise na imwe tili ŵa ndopa zimoza.

²Mu nyengo za kumanyuma apo Sauli wakaŵa karonga withu, imwe ndimwe mukarongozga ŵaIsraele kuya karwa nkhondo na kuweraso nawo. FUMU yikati kwa imwe, ‘Iwe ndiwe uti uliskenge ŵanthu ŵane ŵaIsraele, ndipo uti uŵenge karonga wawo.’ ”

³Ntheura ŵarongozgi wose ŵa ŵaIsraele ŵakiza kwa karonga ku msumba wa Heburoni. Penepapo Karonga Davide wakachita nawo phangano panthazi pa FUMU. Pamanyuma ŵarongozgi ŵara ŵakamuphakazga mafuta kuŵa karonga wa Israele.

⁴Davide wakaŵa na virimika 30 apo wakambanga kuwusa ndipo wakaŵa karonga pa virimika 40.

⁵Ku Heburoni wakawusa ŵanthu ŵa chigaŵa cha Yuda virimika vinkhonde na viŵiri pachanya myezi yikhonde na umoza. Mu Yerusalemu wakawusa charu chose cha Israele na chigaŵa cha Yuda virimika 33.

⁶Karonga Davide na ŵasilikari ŵakhe ŵakaruta ku Yerusalemu kuya karwa nkhondo na ŵaYebusi awo ŵakakharanga mu msumba weneuwu. ŴaYebusi ŵakaghanaghananga kuti Davide kuti wanganjiramo chara, ntheura ŵakati kwa iyo, “Iwe kuti unjirengemo muno chara, nanga ŵangaŵa ŵachiburumutira na ŵakupendera ŵati ŵakuchimbizgire kuwaro.”

⁷Ndipouli Davide wakapoka linga la Ziyoni, ndipo wakalichema kuti, “Msumba wa Davide.”

⁸Pa zuŵa lenelira, Davide wakati ku ŵasilikari wakhe, “Munthu uyo wakukhumba kuya kakoma ŵaYebusi, wakwenera kuruta pakukwera pa ngarande ya maji iyi kuti wakarwe ŵakupendera na ŵachiburumutira awo nkhuŵatinkha chomene.” Chifukwa cha mazgu agha pakafuma chinthanguni chakuti, “Ŵachiburumutira na ŵakupendera kuti ŵati ŵanjire mu nyumba ya FUMU chara.”

⁹Davide wakakharanga mu linga lira, ntheura wakalichema kuti, “Msumba wa Davide.” Ndipo wakazenga msumba zingirizge kufuma ku Milo[4] ku mafumiro gha dazi, cha ku phiri mpaka mukati mwakhe.

¹⁰Davide wakakulirakulira mu nkhongono chifukwa FUMU, Chiuta Mwenenkhongono zose wakaŵa nayo.

¹¹Sono Huramu, karonga wa charu cha Ture wakatuma nthumi kwa Davide pamoza na makuni gha milanje ndiposo na ŵanthu ŵakupara mathabwa na nkhwantha pakuzengera mawe, kuti ŵakamuzengere nyumba ya ufumu.

¹²Ntheura Davide wakamanya kuti FUMU yamwimika kuŵa karonga wa Israele ndipo yakuzga ufumu wakhe chifukwa cha ŵanthu ŵakhe.

¹³Davide wakati wiza ku Yerusalemu kufuma ku Heburoni, wakatoraso ŵawoli ŵachoko na ŵawoli ŵanyakhe ndipo mu ŵeneaŵa wakababamo ŵana ŵanandi ŵanarume na ŵanakazi.

¹⁴Ndipo ŵana awo ŵakababa apo wakaŵa mu Yerusalemu ndi aŵa: Shamuwa, Shobabu, Natani, Solomoni,

¹⁵Ibihara, Elishuwa, Nefegi, Yafiya,

¹⁶Elishama, Eliyada na Elifeleti.

¹⁷ŴaFilisiti ŵakapulika kuti Davide waphakazgika kuŵa karonga wa charu chose cha Israele. Ntheura ŵakaruta mu unandi wawo kuti wakamupenjerezge Davide na kumukora mikori mwakuti ŵathiske lusoko ŵaIsraele. Kweni Davide wakamanya za ichi ndipo wakakhilira ku linga ku malo ghakukhora.

¹⁸Sono ŵaFilisiti ŵakiza ndipo wakabalalikana mu chidambo cha Refayimu.

¹⁹Ntheura Davide wakafumba kwa FUMU wakati, “Kasi ndirute kuti nkharwe nkhondo na ŵaFilisiti? Kasi muti muŵaperekenge mu mawoko ghane?” FUMU yikazgora yikati, “Ruta, pakuti nditi ndiŵapereke nadi ŵaFilisiti aŵa mu mawoko ghako.”

²⁰Penepapo Davide wakaruta ku Baala Perazimu ndipo wakaŵathereska ŵaFilisiti kwenekura. Ndipo iyo wakati, “FUMU yagumura ŵarwani ŵane panthazi pane, nga ndi umo maji ghakugumulira mronga. Ntheura ndimo malo ghara ghakachemekera kuti Baala Perazimu.”[5]

²¹Para ŵaFilisiti ŵakachimbiranga, ŵakareka vikozgo vyawo penepara ndipo Davide na ŵasilikari ŵakhe ŵakatora na kuruta navyo.

²²ŴaFilisiti wakizaso na kubalalikana mu dambo la Refayimu.

²³Sono Davide wakafumbaso kwa FUMU ndipo yikamuzgora kuti, “Ungarutanga kuya karwa nkhondo ku maso kwawo chara, kweni uŵazingirire kunyuma zawo ndipo ukakhilire pa iwo pafupi na makuni gha balisamu.

²⁴Para wamkupulika kuswaya muchanya mu makuni gha balisamu, ukanozgekenge, pakuti pa nyengo iyo ndipo FUMU yadangira kale panthazi zako kuti yikakome ŵaFilisiti.”

²⁵Ntheura Davide wakachita nga ndi umo FUMU yikamulangulira ndipo wakakoma ŵaFilisiti kufuma ku Geba mpaka ku Gezere.