Read new_tumbuka_bible 2 Samuele 6 Bible Online

2 Samuele 6 - new_tumbuka_bible bible

2 Samuele 6

¹Davide wakawunganyaso vigwe vya ŵasilikari 30,000 kufuma mu charu chose cha Israele.

²Ndipo Davide na ŵasilikari ŵakhe ŵakawuka ku Baala Yuda kuti ŵakatora Bokosi la Phangano la Chiuta. Bokosi ili likachemekanga na zina la FUMU, FUMU Mwenenkhongono zose, mweneuyo wakukhara pa chizumbe chakhe pakati pa ŵakerubi ŵaŵiri.

³Ŵakaya kalitora Bokosi la Phangano la Chiuta lira mu nyumba ya Abinadabu yeneiyo yikaŵa pa phiri ku Gibeya ndipo ŵakalinyamulira pa gareta liphya. Uza na Ahiyo ŵana ŵa Abinadabu, ndiwo ŵakendeskanga gareta liphya lira,

⁴uku layegha Bokosi la Phangano la Chiuta ndipo Ahiyo ndiyo wakendanga panthazi pakhe.

⁵Davide na ŵaIsraele ŵanji ŵakasekereranga na kuvina chomene panthazi pa FUMU uku ŵakwimba sumu, mabango, viding'indi, ng'oma, ŵakalimba na vifyoliro.

⁶Para ŵakafika pa luwugha lwa tirigu ku Nakoni, ng'ombe zikakhuŵara mwakuti Bokosi la Phangano likakhumba kuwa. Ntheura Uza wakalikora kuti lireke kuwa.

⁷Penepapo FUMU Chiuta wakamukwiyira chomene Uza ndipo wakamukoma penepara chifukwa chakukhwaska Bokosi la Phangano lira kwambula kwenerera ndipo wakafwa papo pafupi na Bokosi lira.

⁸Davide kuti wakakondwa chara pakuwona kuti FUMU yikamukwiyira na kumukoma ntheura Uza. Penepapo malo ghara wakaghathya kuti, “Perezi Uza”,[6] ndipo ghakuchemeka ntheura mpaka sono.

⁹Davide wakopa FUMU zuŵa lenelira ndipo wakati, “Kasi Bokosi la FUMU lingiza uli kwa ine?”

¹⁰Ntheura Davide kuti wakakhumbaso chara kulitorera Bokosi la FUMU lira ku Yerusalemu, msumba wakhe, kweni wakalitorera ku mphepete ku nyumba ya Obedi Edomu mu msumba wa Gati.

¹¹Bokosi lira likakhara mu nyumba ya Obedi Edomu, muGiti, myezi yitatu. Ndipo FUMU yikamutumbika Obedi Edomu na mbumba yakhe yose.

¹²Karonga Davide wakapulika kuti FUMU yatumbika mbumba ya Obedi Edomu na vyose ivyo wakaŵa navyo chifukwa cha Bokosi la Phangano lira. Penepapo Davide wakaruta kuti wakalitore Bokosi lira kufuma mu nyumba ya Obedi Edomu na kwiza nalo ku msumba wakhe wa Yerusalemu uku wakusekerera chomene.

¹³Ndipo ŵanthu awo ŵakayegha Bokosi la Phangano la FUMU, para wakati ŵendapo nthangalaro zinkhonde na yimoza, Davide wakapereka sembe ya ng'ombe na kana ka ng'ombe kakututuŵa kwa FUMU.

¹⁴Ndipo Davide uku wavwara malaya gha bafuta gha efodi wakavina panthazi pa FUMU na nkhongono zakhe zose.

¹⁵Ntheura Davide pamoza na ŵaIsraele wose ŵakiza nalo Bokosi la Phangano la FUMU na mphomo ya chikondwerero chikuru ndiposo na kulira kwa mbata.

¹⁶Apo Bokosi la Phangano la FUMU likanjiranga mu msumba, Mikala mwana mwanakazi wa Sauli wakalingizga pa dangazi ndipo wakawona Karonga Davide wakudukaduka na kuvina panthazi pa FUMU ndipo iyo wakamuseka mu mtima wakhe.

¹⁷Ŵasilikari ŵara ŵakiza nalo Bokosi la Phangano la FUMU na kuliŵika mu malo ghakhe mukati mu hema ilo Davide wakalijintha. Penepapo Davide wakapereka sembe yakocha na sembe ya wenenawene panthazi pa FUMU.

¹⁸Para Davide wakati wamara kupereka sembe yakocha na sembe ya wenenawene yira, wakatumbika ŵanthu mu zina la FUMU Mwenenkhongono zose.

¹⁹Ndipo wakagaŵira vyakurya ŵanthu wose, ŵanarume na ŵanakazi mwakuti waliyose wakapoka chingwa chipapati chimoza, thuŵi ya nyama yakocha, ndiposo na kachingwa kapapati ka mpheska zakomira. Pa umaliro ŵanthu wose ŵakawera waliyose ku nyumba yakhe.

²⁰Ndipo Davide nayo wakawera kuti wakatauzge ŵa mu nyumba yakhe. Penepapo Mikala mwana mwanakazi wa Sauli wakiza kuti wakumane nayo ndipo wakati kwa iyo, “Imwe, karonga wa Israele mwajiseŵanya chomene muhanya uno pakujivura ntheura panthazi pa ŵateŵeti-kazi ŵa nduna zinu nga ndi munthu wakufuntha, wambula na soni wuwo.”

²¹Davide wakati kwa Mikala, “Ine nkharongora kusekerera kwane panthazi pa FUMU yeneiyo yikandimika kuŵa karonga wa ŵanthu ŵakhe ŵaIsraele. FUMU ndiyo yikasora ine, kuti ŵakaŵa ŵawuso panji waliyose wa nyumba yakhe chara. Ine kuti ndirekenge kuvinira FUMU para nkhuyichindika chara.

²²Ine nditi ndijiyuyure kuruska apa ndipo nditi ndiwonekerenge wakuyuyurika kwa iwe, kweni ŵateŵeti-kazi awo wayowoya ndiwo ŵati ŵandichindikenge.”

²³Ndipo Mikala mwana mwanakazi wa Sauli kuti wakababako mwana chara mu umoyo wakhe wose.