Read new_tumbuka_bible 2 Samuele 7 Bible Online

2 Samuele 7 - new_tumbuka_bible bible

2 Samuele 7

¹Karonga Davide wakati wakhazikika mu nyumba yakhe ya ufumu, FUMU yikamupumuzga ku ŵarwani ŵakhe wose awo ŵakamuzingirizga.

²Karonga wakayowoya na nchimi Natani wakati, “Wonani ine nkhukhara mu nyumba ya ufumu yakuzenga na makuni gha milanje, kweni Bokosi la Phangano la FUMU likukhara mu hema.”

³Natani wakamuzgora karonga wakati, “Chitani chilichose icho chili mu mtima winu, pakuti FUMU yili namwe.”

⁴Kweni usiku wenewura mazgu gha FUMU ghakiza Natani ghakati,

⁵“Ruta ukamuphalire muteŵeti wane Davide ukati, ‘FUMU yikuti: Kasi iwe ndiwe uti undizengerenge nyumba kuti ndi kharengemo?’

⁶Ine kuti ndili kukharamo mu nyumba chara kufuma pa zuŵa ilo nkhafumiskira ŵaIsraele mu charu cha Eguputo mpaka sono. Kweni ndanguŵa wakwendakwenda mu malo ghakupambanapambana uku ndili mu hema nga ndi malo ghakukharamo mwane.

⁷Kulikose uko ndili kwendako na ŵaIsraele wose, ine kuti nkhayowoyapo kwa murongozgi waliyose chara uyo nkhamulangula kuti waliske ŵanthu ŵane ŵaIsraele pakuyowoya kuti, ‘Kasi nchifukwa uli undandizengere nyumba ya milanje?’ ”

⁸“Kweni sono umuphalire muteŵeti wane Davide kuti: FUMU Mwenenkhongono zose yikuti, ‘Ine nkhakutora iwe apo ukaŵa ku thengere uko ukaliskanga mberere na mbuzi kuti uŵe karonga wa ŵanthu ŵane ŵaIsraele.

⁹Ine nkhaŵa nawe kulikose uko wendako ndipo ndaŵathereska petu ŵarwani ŵako wose awo ŵakaŵa panthazi pako. Ndipo sono nditi ndikuzge zina lako kuti liŵe la lumbiri lukuru chomene kuyana na mazina gha lumbiri ŵanthu ŵakuzirwa ŵa mu charu.

¹⁰Nditi ndiŵasorere malo ŵanthu ŵane ŵaIsraele na kuŵakhazika mwenemumo mwakuti ŵakharenge mu chikaya chawo na chawo kwambula na yumoza wakuŵatimbanizga. Ŵanthu ŵaheni kuti ŵati ŵaŵasuzgengeso chara nga mpha kudanga,

¹¹kufuma mu nyengo iyo nkhimikira ŵeruzgi kuti ŵawusenge ŵanthu ŵane ŵaIsraele. Ine nditi ndikupumuzge ku ŵarwani ŵako wose.’ ” Chinyakhe FUMU yikuti kwa iwe, “Nditi ndikuzge mphapu yako.

¹²Para mazuŵa ghako ghamara ndipo waruta kuya kagona pamoza na ŵasekuru ŵako, ine ndamkuwuska yumoza wa ŵana ŵako wakubaba iwe wekha kuti waŵe karonga ndipo ndizamkukhozga chizumbe cha ufumu wakhe kwa muyirayira.

¹³Iyo ndiyo wizamkundizengera ine nyumba yakuchindikira zina lane ndipo ine ndizamkukhozga chizumbe cha ufumu wakhe kwa muyirayira.

¹⁴Ine ndamkuŵa wiske ndipo iyo wamkuŵa mwana wane. Para wizamkunanga, ndizamkumuthyapula na muchiza na maluswazu nga ndi umo ŵapapi ŵakuthyapulira ŵana ŵawo.

¹⁵Kweni phangano lane la chisungusungu pa iyo, kuti ndamkureka kulifiska chara nga ndi umo nkhachitira na Sauli uyo nkhamuwuskapo kuti iwe uŵe karonga mu malo mwakhe.

¹⁶Ndipo nyumba yako na ufumu wako vizamkukhalirira kwa muyirayira panthazi pane. Chizumbe chako chiti chikhozgekenge kwa muyirayira.”

¹⁷Natani wakamuphalira Davide mazgu ghose agha kwakuyana na umo FUMU yikamuyowoyera ndiposo na umo wakaviwonera mu mboniwoni.

¹⁸Penepapo Davide wakanjira mu Chihema chakusoperamo Chiuta ndipo wakakhara pasi na kuromba kuti, Mwe FUMU Chiuta, kasi ine ndine njani, ndiposo mbumba yane nkhanthu uli kuti mundikwezge kufika apo ndili?

¹⁹Ndipouli ichi changuŵa chinthu chichoko chomene kwa imwe, Mwe FUMU Chiuta. Mwayowoyaso vya mbumba ya muteŵeti winu vinthu vikuru ivyo vizamkuchitika mu nyengo iyo yikwiza. Kasi ntheura ndimo mukuchitira na ŵanthu ŵinu, Mwe FUMU Chiuta?

²⁰Ndipo kasi Davide wangayowoya chinthu uli kwa imwe? Pakuti imwe, Mwe FUMU Chiuta mukundimanya ine nda muteŵeti winu.

²¹Mwachita vikuru vyose ivi chifukwa cha phangano linu na kwakuyana na khumbo linu kuti ine nda muteŵeti winu mundisambizge.

²²Nadi imwe, Mwe FUMU Chiuta, ndimwe ŵakuru, kwakuyana na ivyo tili kupulika na makutu ghithu palije Chiuta munyakhe pa dera pa imwe, kweni ndimwe pera Chiuta wa unenesko.

²³Ndipo kasi ndi fuko linyakhe ndi ilo likuyana na ŵanthu ŵinu ŵaIsraele ŵeneawo ŵakaŵa mu Eguputo kweni imwe Chiuta mukaruta kuya kaŵawombola ku uzga kuŵa ŵanthu ŵinu? Imwe mukajitorera lumbiri pa charu pa imwe mwekha, pakuŵachitira vinthu vikuru na vya minthondwe pakuŵa chimbizgira mafuko ghanyakhe na ŵachiuta ngoza ŵawo panthazi pa ŵanthu ŵinu awo mukaŵawombola kufuma ku Eguputo.

²⁴Muli kwimika ŵaIsraele kuŵa ŵinu na ŵinu kwa muyirayira, ndipo imwe, Mwe FUMU, mwaŵa Chiuta wawo.

²⁵“Ntheura sono, Mwe FUMU Chiuta, khozgani kwa muyirayira mazgu gheneagho mwayowoya kwa ine muteŵeti winu na nyumba yakhe, ndipo muchite nga ndi umo mwayowoyera.

²⁶Ntheura lumbiri lwinu lukulirengekulirenge kwa muyirayira. Penepapo ŵanthu ŵati ŵayowoye kuti, ‘FUMU Mwenenkhongono zose ndi Chiuta uyo wakuwusa ŵaIsraele.’ Ndipo mbumba ya muteŵeti winu Davide yirutilire kukhozgeka panthazi pinu nyengo yose.

²⁷Imwe, Mwe FUMU Mwenenkhongono zose, Chiuta wa Israele mwavumbula ichi kwa ine muteŵeti winu, pakuyowoya kuti, Nditi ndizgore mbumba ya nyumba yako kuŵa yakuwusa.” Sono nda muteŵeti winu nkhwiza na chikanga pakupereka lurombo ulu kwa imwe.

²⁸“Ndipo sono, Mwe FUMU Chiuta, ndimwe Chiuta pera. Mazgu ghinu nga unenesko, ndipo mwapangana kufiska chinthu chiweme ichi kwa muteŵeti winu.

²⁹Ntheura sono chimukondweskani kutumbika mbumba ya muteŵeti winu, mwakuti yikakhalirire kuŵa yakugomezgeka panthazi pinu. Pakuti imwe, Mwe FUMU mwayowoya ndipo na thumbiko linu mbumba ya muteŵeti winu yiti yitumbikikenge kwa muyirayira.”